Элькунамы  вуизы ӝог эмъюрттэт сётонъя 22 выль автомобильёс

Удмурт Дунне
By Удмурт Дунне Декабрь 14, 2017 10:09

11-тӥ декабре Ижысь ӝог эмъюрттэт сётонъя станциын соос чуренак сылӥзы — ӵыж-вылесь, туала куронъёсъя бичам «скоройёс». Пӧлазы 2  реанимобильёс. Машинаослэсь усьтонъёссэс чидатэк витизы валтӥсь врачъёс. Автомобильёс чакламын Можга, Балезино, Вавож, Грак, Эгра, Кияса, Сюмси, Ува ёросъёслы, Сарапул, Глазов, Вотка городъёслы. Реанимобильёс — Ижлы.

Шаерамы вуизы 22 выль «скорой» машинаос.

— Усьтон дуре ми быдэс бригадаен лыктӥм, — вераз Эгра ёрос больницалэн валтӥсь врачезлэсь ужзэ быдэсъясь Татьяна Новокшонова. — Ёросамы туннэ нуналлы 8 «скороймы», но со тырмыт ӧвӧл. Угось пинал ваён юртамы Дэбесысь нылкышноос  но лыкто. Милям вань сюлэм но сэр висёнъёсъя, сюрес вылын шуккиськонэ шедемъёслы юрттэт сётонъя центръёсмы. Жаляса верано, ӝог юрттэт сётонъя бригадаосмы воксё тэк уг сыло. Машинаосмес выльдоно ини. Соин ик туж шумпотӥськом, туннэ эшшо одӥг машиналэсь усьтонзэ басьтом шуыса.

Усьтонъёсты люкылонэ пыриськизы Правительстволэн Тӧроез Ярослав Семёнов, Правительстволэн Тӧроезлэн воштӥсезлэсь ужзэ быдэсъясь Анастасия Муталенко, тазалыкез утёнъя министрлэсь ужзэ быдэсъясь Игорь Титов но мукетъёсыз.

— Ӝог эмъюрттэт сётонъя станциослэсь автопарксэс выльдон одӥгез валтӥсь ужпум луэ, сое ми быдэстӥськом Россиен ӵош,  — шуиз Ярослав Семёнов. — Та 22 автомобильёс басьтэмын элькун бюджетысь коньдонэн. Нош ар пумын вуыны кулэ эшшо 38 машина — Россилэн бюджетэз чотын.

Автомобильёсысь 90 процентэз тӥрлык поттэмын Россиысь предприятиосын, вань Удмуртиын бичамъёсыз но. Кылсярысь, электрокардиографъёс поттэмын «Аксионын». Соосты ушъяз Россиысь тазалыкез утёнъя министр Вероника Скворцова  но,  элькунамы туэ августэ вуылыкуз.

Элькунысьтымы «скоройёсты» выльдон кутскиз 2015-тӥ арысен. 70 процентэз автомобильёс воштэмын ни. Соос басьтэмын Удмуртилэн, Россилэн бюджетъёсысьтызы коньдонэн, мыло-кыдо юрттӥсько благотворительной фондъёс но.

Элина Кумачёва

 

 

 

 

Удмурт Дунне
By Удмурт Дунне Декабрь 14, 2017 10:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*