Балезино ёрос: Усьтӥськиз поликлиника но сюлмаськонъёс лачак на

Удмурт Дунне
By Удмурт Дунне Декабрь 29, 2017 13:53

Александр Бречалов Удмуртие лыктэмез бере ик шуге-леке вуэм 2 ёросэн (Сарапул но Балезино) тодматскиз вал. 26-тӥ декабре со эскериз, ма воштӥськемын Балезино ёросын со дырысен.

емельянова

Балезиноын кун но бизнес џош ужамъя усьтћськиз «Доктор плюс» поликлиника.

Татын арлы быдэ тулыс тудвуэн шугъяськонъёс кылдыло. Юон вузы урод. «Девиз» но «Лесобаза» микрорайонъёсын улӥсьёслы эмъяськыны нокытын. Сюресъёссы шаерысьтымы тужгес уродъёсыз пӧлы пыро. 8 толэзь ӵоже балезиноослэн улонзы умой пала воштӥськиз-а?

емельянова

Выль поликлиника 5 сюрс адямилы чакламын. Со ужа 7 часысен 19 часозь, отын 12 мурт ужа, азьланяз соослэн лыдзы будэтэмын луоз.

Таяз учыре но Александр Бречалов нырысь ик тужгес сюлмаськытӥсь интыосы вуылӥз. «Девиз» микрорайонысь поликлиникаез оптимизациен валче 2 ар талэсь азьло пытсазы. Со интые кун но бизнес ӵош ужамъя «Доктор Плюс Балезино» поликлиника усьтӥськиз. Бизнес элькунлэсь бюджетсэ 12 миллион манетлы шыръяны юрттӥз. Ужан кабинетъёсы туала тӥрлык пуктылэмын.

Выль поликлиника 5 сюрс адямилы чакламын. Со ужа 7 часысен 19 часозь, отын 12 мурт ужа, азьланяз соослэн лыдзы будэтэмын луоз. Педиатр, терапевт, хирург, ЛОР-врач, диагностика но УЗИ лэсьтонъя врачъёс калыкез пумитало, ӝог юрттэт сётонъя но процедурной кабинетъёс ужало. Басьтэм анализъёссэс эмъясьёс асьсэос нуо ёрос больницаысь лабораторие. Усьтӥськем поликлиникалы тужгес шумпотэмын арлыдоос: отын ужасьёс, пе, котьку капчи мылкыдын пумитало.

емельянова

«Лесобаза» микрорайонын эмъяськыны луэ автобусэ интыяськем ФАП-ын.

 

«Лесобаза» микрорайонын но улонзы капчияз. Ӵукналы быдэ нимысьтыз чаклам интые вуылэ питранъёс вылын ужась ФАП. Одӥгез, пе, урод: ФАП-ысь эмъясьёс доры вазиськемлэсь азьло больницаысь медкартаез басьтоно.

Туэ апрель толэзе Александр Бречаловлы куриськонэн вазиськиз вал та микрорайонысь Школьной ульчаысь 17-тӥ юртын улӥсь Алёна Калинина, коркамы куашкан калэ вуэмын шуыса. Та юрт азьвыл общежитие вылэм, тупатъян ужъёс кемалась лэсьтымтэ. Вылӥ кивалтӥсь вуылэм бере уж интыысьтыз вырӟиз: ву, шуныт сётон гумыос тупатэмын, лэсьтӥськон ужъёс вуоно арын но азинтэмын луозы.

Александр Бречалов огдырлы дугдылӥз ёрос больница доры. Азьвыл автобус дугдылон инты татын вылымтэ. Али выль остановка гинэ ӧвӧл, автобус ветлон сюресъёс — Азин но М. Горький ульчаос — асфальтэн шобыртэмын.

Шаерысьтымы кивалтӥсь ёросысь активен но кенешон ортчытӥз. Калык люкаськемын вал зал тыр, котькудӥз сюлмаськытӥсь юанъёссэ сётыны быгатӥз.

— Вакчи дыр куспын бадӟым уж ортчытэмын ке но, ёросын сюлмаськытӥсь ужпумъёс лачак на, — шуиз Александр Бречалов. — Нырысетӥ интыын сыло сюресъёс, бадӟым спецтехникаен ветлыны луонтэм интыос 10-лэсь ятыр лыдъясько. Соос пӧлысь одӥгез — тужгес кыдёке интыяськем Сергино черкогуртозь нуись сюреслэн оглюкетэз — тупатъямын ни.

Балезино ёрослэн азинсконъёс басьтыны луонлыкъёсыз трос, нош со куашкан калэ вуэмын, ужбергатӥсьёс пегӟо. Ёросэз азинтыны кун ласянь юрттэт висъяськоз, шуиз А. Бречалов, нош кытчы со коньдонэз висъяно, балезиноос асьсэос сэрттозы-пертчозы: ву сузянлы, ульчаосты югдытонлы, сюресъёсты выльдонлы, колхозъёсты ӝутонлы яке мукет ужпумъёслы.

Валентина Емельянова

 

Удмурт Дунне
By Удмурт Дунне Декабрь 29, 2017 13:53