Элькун коньдэт: Улом кисымыя

Удмурт Дунне
By Удмурт Дунне Декабрь 5, 2017 10:54

28-тӥ ноябре ужзэ мытӥз Кун Кенешлэн 2-тӥ сессиез. Эскерем ужпумъёс пӧлын валтӥсез луиз бюджетэз 1-тӥ лыдӟемен юнматон.

Коньдон ужпумъёсъя министр С. Евдокимов: вуоно арын тросэз удысъёс котькуд манетсэс лыдъяно луозы.

Парламентарийёсын ӵош кенешонэ пыриськизы Удмуртилэн Тӧроез Александр Бречалов, Федерация Кенешлэн ёзчиез Любовь Глебова, Кун Думаысь депутатъёс Андрей Исаев, Валерий Бузилов, Алексей Загребин, Игорь Сапко но мукетъёсыз. Ваньзы уртче эшшо одӥг пол чаклазы, кыӵе луоз экономикамы. Экономикая министрлэсь ужзэ быдэсъясь Михаил Зайцев тыро-пыдо доклад лэсьтӥз. Вакчияк верано ке, шуиз: огсыр азинтӥськом, бадӟым оскон пыӵато промышленной предприятиос но, гурт хозяйствоос но. 2016-тӥ арын элькунмы 540,6 миллиард манет тыр вуз поттӥз вал, туэ 574 миллиард манет котыр луоз, вуоно арын — эшшо 1,5 процентлы ятыргес.

Бюджетэз кутон азьын туэ 2-тӥ ползэ ортчизы ни калык кылзонъёс, озьы мылкыдзэс вераны быгатӥзы калык огазеяськонъёс но, парламентэ сюрымтэ партиос но.

— Оглом калык кылзонъёсы 200 пала адями пыриськиз, 15 пала ӵектонъёс вуизы, кылсярысь, памятникъёсты утёнлы, учебникъёс басьтонлы, инвалидъёслы ужан интыос кылдытонлы ватсаса коньдон висъяны куремын, — шуиз Бюджетъя, вытъя но коньдон ужпумъёсъя ялан ужась комиссилэн кивалтӥсез Юрий Тюрин. — Ваньмыз со лыдэ басьтэмын луоз, элькун бюджетэ ватсаса коньдон пыртыны быгатӥм ке.

Нош туннэ югдур сокем ушъяськымон ӧвӧл: улом соин, кӧня коньдон луоз кисыямы. Банкъёслэсь пунэмаськыны уз луы ни — сотэк но тыронъёсмы 49 миллиард манетлэсь ятыр люкаськемын.

— Вуоно арын пунэмъёсмес 47, 24 миллиард манетозь кулэстыны чакламын, — вераз коньдон ужпумъёсъя министр Станислав Евдокимов. — Соин ик туэ бюджетэз юнматӥськом профицитэн — таӵеез туж кемалась ӧй вал ни. Профицитлэн быдӟалаез 1, 206 миллиард манет.

Доход люкетэз 1-тӥ лыдӟемен юнматэмын 59,651 миллиард манет, расход люкетэз — 58, 445 миллиард манет.

Озьыен, тросаз удысъёсын котькуд манетсэс лыдъяно луозы. Но пенсиос, пособиос, уждун дыраз луозы, эшшо ик соосты йылэтыны чакламын. В. Путинлэн май указъёсаз шедьымтэ бюджетникъёслэн но уждунзы 4 процентлы будоз — коньдон проектын чакламын.

Нялтас вераса, бюджетэз 2-тӥ лыдӟемен юнматыку, солэн доход люкетэз 4,826 миллиард манетлы йылэтэмын луоз ни. 4,2 миллиард манетлэсь ятыр вуыны кулэ федерал казнаысь, 610 миллион манет пала люкаськоз налогъёс чотын. Озьы гурт удыслы, Сюрес фондлы кӧня ке уксё ватсаны луоз. Станислав Евдокимов верамъя, али уката сюлмаськытэ муниципал кылдытэтъёслы трансферъёс висъяны коньдонлэн ӧвӧлэз, озьы ик капитальной вложениослы бюджетлэн проектаз 1,21 миллиард манет гинэ учкемын — кылем арынлэсь ог 30 процентэз гинэ.

270 миллион манет висъямын Ижысь Прасовской пролкаын школа пуктонлы. Озьы ик коньдон луоз, пе, Ижысь Ленин ёросын поликлиника ӝутонлы но Глазовысь физико-математической лицейын спортзал усьтонлы.

— Зэм, бюджетлэн проектэз капчи ӧвӧл, — шуиз Кун Кенешлэн Тӧроез Алексей Прасолов. — Расходъёсмы туэ 67 миллиард манет, вуоно арлы соосты 58 миллиардозь кулэстыны чакламын, доходъёсмы 65 миллиард луизы ни вал, вуоно арын 59 миллиард гинэ возьмаськом. Но туж оскиськом, та лыдпусъёс воштӥськозы на шуыса. Кун Кенешен, Правительствоен уртче ужалом тросгес инвестициос кыскон, ужазинлыкез будэтон понна. Бюджетмылэн проектэзлы ӟеч дунъет сётӥз ни Москва, озьыен, отысь ватсаса коньдон басьтыны быгатом шуыса осконмы уг кысы.

Оскон сярысь элькун парламентарийёс азьын вераськиз Кун Думалэн депутатэз Андрей Исаев но. Со вакчияк но валамон вераз Россилэн 2018-тӥ но матэктӥсь 2019-тӥ — 2020-тӥ аръёслы бюджетэз сярысь.

— Улосъёслы коньдонэн юрттэт туэ 20 миллиард манетлы йылэтэмын, — шуиз со. — Удмуртия трансферъёс чотын ог 14 миллиард манетлэсь трос уксё басьтыны кулэ, со пӧлысь ог 8 миллиардэз — дотациос.

Андрей Исаев ватсаз: Россиысь Правительствоысь Кун Думае вуэм дэмланъёсын Удмуртилэн кыкез бадӟым куронъёсыз лыдэ басьтэмын — 198,8 миллион манет вуоз Ижысь Ленин ёросын нылпи сад усьтонлы но 148,6 миллион манет — Дэри ёросысь Совхознойын школа пуктонлы.

Ватсаса лыктӥсь коньдон сярысь вераськонэз азинтӥз Удмуртилэн Тӧроез Александр Бречалов но. Пусйиз: 270 миллион манет висъямын Ижысь Прасовской пролкаын школа пуктонлы. Озьы ик коньдон луоз, пе, Ижысь Ленин ёросын поликлиника ӝутонлы но Глазовысь физико-математической лицейын спортзал усьтонлы.

— Ваньмыз со — Кун Кенешлэн, Правительстволэн озьы ик Кун Думае быръем депутатъёсмылэн одӥг кыткетын ужамзылэн емышъёсыз, — пусйиз Удмуртилэн Тӧроез. — Валаськом, азямы уката бадӟымесь куронъёс пуктоно. Вань на трос федерал программаос, кудъёсаз асьмеос ум пыриськиське, нош мукет улосъёс соос чотын уно миллион манетъёс доразы кыско. Асьмелы но бере кылёно ӧвӧл.

Элина Кумачёва

Туспуктэм: udmurt.ru, А. Горбунов

Удмурт Дунне
By Удмурт Дунне Декабрь 5, 2017 10:54