Вуоз-а Удмуртилы сюресъёсты тупатъяны ватсаса коньдон?

Удмурт Дунне
By Удмурт Дунне Ноябрь 17, 2017 11:58

Удмуртилэн Тӧроез Александр Бречалов та нуналъёсы Москваын ужа. 15-тӥ шуркынмонэ со пумиськылӥз Россиысь транспортъя министрен Максим Соколовен.

— Вераны быгатӥськом, Россилэсь ватсаса юрттэт басьтӥмы ке, 2018-тӥ арын та ужпумез быдэсак сэрттыны-перчтыны быгатом, — шуиз Александр Бречалов.

Кивалтӥсьёс вераськизы, кыӵе луонлыкъёсыз но куронъёсыз Удмуртилэн сюрес лэсьтон удысын. Зэм но, Удмуртия понна сюресъёсын герӟаськем ужпум валтӥсез луэ. 2017-тӥ арын оштолэзьлы кылдэм югдурез учкид ке, шаерысьтымы 87 гуртъёсы йӧнала сюрес ӧй вал, нош лымы шунаку, я зорыку, со гуртъёсы воксё но пырыны ӧз луылы. Али та лыдпус 61-озь уськытэмын.

— Вераны быгатӥськом, Россилэсь ватсаса юрттэт басьтӥмы ке, 2018-тӥ арын та ужпумез быдэсак сэрттыны-перчтыны быгатом, — шуиз Александр Бречалов.

Максим Соколов: Удмуртиын сюресъёсын герӟаськем удыс умой азинске.

Кивалтӥсь ватсаз на, гуртысь сюресъёсты тупатъяса, муниципал кылдытэтъёсты но азинтыны луоз. Та бордын ик элькунмы азьланяз ужалоз. Со сяна, 2030-тӥ арозь элькунмы малпа тупатъяны Игра – Глазов – Яр – Пудем – Киров улосвылэн межаозь сюресэз, озьы ик Кам вамен выж дорозь сюресъёсэз. Костино-Камбарка сюресэз «кезьыт» амалэн выльдыны-тупатъяны малпамын. Озьы 700 миллион манет шыръяськоз.

— Туэ ар понна «Кышкыт луисьтэм но ӟеч сюресъёс» проектэз быдэсъямъя но гурт сюресъёсты выль сямен лэсьтыны кутскемъя адӟиське, Удмуртиын сюресъёсын герӟаськем удыс умой азинске шуыса, со быгатэ сэрттыны-пертчыны бадӟым ужпумъёсты, озьыен улосвылын экономика но ӝутӥське, — вераз Максим Соколов.

Иське, сюресъёсты тупатъяны Удмуртилы ватсаса юрттэт висъялозы-а, уз-а? Министр пусйиз, та юан эскеремын луоз. Нош уксё висъямын луиз ке, элькун быгатоз тупатъяны гуртысь куд-ог сюресъёсты гинэ. Валтӥсь курон: соос гуртысь социальной объектъёс доры яке школае нуыны кулэ.

Сергей Захаров

Туспуктэм: www.udmurt.ru

Удмурт Дунне
By Удмурт Дунне Ноябрь 17, 2017 11:58