«Вместе» люказ пӧртэм выжыысь егитъёсты

Удмурт Дунне
By Удмурт Дунне Ноябрь 16, 2017 16:00

Туннэ Эшъяськон юртын усьтӥськиз «Вместе» ассоциацилэн сессиез. 4 нунал ӵоже пӧртэм выжыосысь азьветлӥсьёс проектъёс гожъяны дышетскозы.

«Вместе» ассоциацилэн кивалтӥсез Мария Царёва вера огазеяськонлэн ужез сярысь.

Та сессия туэ 3-тӥзэ ортче ни. Таяз вие шаерамы вуизы Камчаткаысь, Ханты-Мансийск автономной округысь, Алтайысь, Башкортостанысь но мукет улосвылъёсысь егитъёс. 4 нунал ӵоже соос проектъёс гожъяны дышетскозы, каруфандинг амалэн матэгес тодматскозы, тросгес саклык висъялозы, проектъёссы огдыре пӧртэм выжыысь калыкъёсты мед огазеялозы шуыса. Та ужпумен ик выре «Вместе» ассоциация но.

«Монами» студиысь тусбурчи Андрей Соловьёв вера ужез сярысь.

— Нациосын ужан понна нокыӵе университетын уг дасяло. Соин ик, мон сямен, та сессия — удысмылы ӧнерчиосты дышетон инты, — шуиз йӧскалык политикая министр Лариса Буранова. — Татчы ӧтемын мерлыко огазеяськонъёсысь азьветлӥсьёс, тросэз тӥ пӧлысь ужало пӧртэм выжы-калыкъёсын, озьыен, та удысэн тодмо. Оскисько, сессия тӥледлы трос пайда ваёз шуыса.

Нырысетӥ нуналаз ик куд-огъёсыз тодматӥзы ни асьсэ огазеяськонзылэн ужаменыз. Омск улосвылысь Татьяна Губина вераз «Север» центрезлэн ужрадъёсыз сярысь. Таос, пӧртэм грантъёс утылыса, ортчытъяло Омск улосвылын улӥсь калыкъёслэсь шулдыръяськонъёссэс. Куд-ог элькунъёсын пӧртэм выжыысь калыкъёсты эшъяськытон понна кун ласянь нырысетӥ вамышъёс лэсьтӥсько, шуыны луоз. 2014-тӥ арын Алтай Элькунын кылдытэмын вал Йӧскалык политикая но калыкъёсын ужанъя комитет. Элькунын уло 90-лэсь уно калыкъёс. Башкириын но кылем арын гинэ кылдытэмын пӧртэм выжыысь егитъёслэн кенешсы.

Оглом вераса, та сессие егитъёс вуизы выль кусыпъёс тупатыны, ог-огзылэсь дышетскыны. Малпам проектсъёссы азьланяз, оло, улонэ но пыӵалозы.

Мария Векшина

Удмурт Дунне
By Удмурт Дунне Ноябрь 16, 2017 16:00