«Удмурт-а мон!?» форумын тужгес усто проектъёс уксё утыны быгатозы

Удмурт Дунне
By Удмурт Дунне Ноябрь 21, 2017 14:44

«Удмурт-а мон!?» форумын тужгес усто проектъёс уксё утыны быгатозы

1-тӥ толсуре ортчоз «Удмурт-а мон?!» форум. Татын удмурт егитъёс дышетскозы проект гожтыны, нунал пумын соослэн тужгес усто малпанъёсынызы тодматскоз Удмуртилэн Тӧроез Александр Бречалов но. 

— Форуме ог 150 муртэ возьмаськом, асьсэ проектной малпанъёсынызы вуозы Башкириысь, Татариысь, Киров улосвылысь удмурт егитъёс но, — вера форумез огез радъясь Елена Рябина. — Форумын ужалоз 5 секция: лулчеберет, наука но дышетон, мультимедиа, туризм, ульчаосты — азбаръёсты умоятон. Котькуд секциын проект гожтозы, пӧлысьтызы тужгес умойзэ быръёзы, нунал пумын 5 тужгес ӟеч малпанъёсын тодматэмын луозы Удмуртилэн Тӧроез Александр Бречалов но ӧтем куноос.

Озьыен, кыӵе проектэз устоен лыдъялоз таиз я соиз спонсор, солы уксё сётыны быгатоз. Оскон вань: форум бере малпанъёс улонэ пыӵалозы.

Кыӵе проектэз устоен лыдъялоз таиз я соиз спонсор, солы ик уксёзэ сётоз. Оскон вань: форум бере малпанъёс улонэ пыӵалозы.

Форумозь арня но ӝыны сяна дыр ӧз кыльы ни. Соин ик дыртэ: тӥ пушкын трос малпанъёс пӧзё ке, улонэз ӟечгес каремды потэ ке, гожтӥське но лыктэ форуме. Анкета вань «Удмурт Кенеш» огазеяськонлэн вотэсбамаз.

Вераны кулэ, «Удмурт-а мон?!» форум туэ 2-тӥзэ ортче ни. Радъяло сое «Удмурт Кенеш» но «Шунды» огазеяськонъёс.

Форумлэн радлыкез:

09.00 — 10.00 часъёсы — форуме вуэмъёсты пумитан.
10.00 — 12.00 часъёсы — форумез сӥё-дано усьтон.
12.00 — 14.00 часъёсы — пӧртэм ӧръёсъя ужан:
• лулчеберет
• наука но дышетон
• мультимедиа
• туризм
• ульчаосты-азбаръёсты умоятон (благоустройство);
14.00 — 15.00 часъёсы — нуназеян;
15.00 — 17.00 часъёсы — Удмуртилэн Тӧроеныз Александр Бречаловен пумиськон, форумлы йылпумъянъёс лэсьтон;

17.00 — 18.00 часъёсы — удмурт кырӟасьёслэн концертсы.

Мария Векшина

Удмурт Дунне
By Удмурт Дунне Ноябрь 21, 2017 14:44