Учебникез удмурт кылэ берыктонэ К. Герд но пыриськем

Удмурт Дунне
By Удмурт Дунне Ноябрь 13, 2017 10:44

80 ар талэсь азьло, 1937-тӥ арын 1-тӥ ноябре, Соловки лагерьын быдтэмын вал удмурт азьветлӥсь, писатель, югдытӥсь Кузебай Герд. Солэсь улэм-вылэмзэ, творчествозэ эскерыса, трос гожъямын, ужъёсыз печатламын, озьы ке но та дырозь со сярысь уно тодмотэмез на.

Алигес редакциямы пыраз калык художник Семён Виноградов, кияз ӵужектэм, кытӥ-отӥ кышъям бамъёсын, вылбамъёстэк книга. Та, пе, природоведениея учебник, сое удмурт кылэ берыктонэ пыриськем К. Герд. Тодӥськом, удмурт югдытӥсь удмурт нылпиослы учебникъёс кылдытон бордын трос ужаз. Ма кадь таиз книгаын йӧспӧртэмез?

Тунсыкоез вань: мукет таӵе книга асьме дорын шедьтэмын ӧвӧл. Учебник 1924-тӥ арын Москваын поттэмын. Нимаське «Пал’ёсыз тодон» (орфографиез утемын), авторез М. И. Ильин шуыса пусъемын. Отын удмурт нылпиослы анай кылынызы валэктэмын музъем, омыр, пӧйшуръёс, куазь, калыкъёс но трос мукетыз сярысь.

— Та учебникъя мынам дядяе, атаелэн выныз Андрей Петрович Виноградов, дышетскиз, — вераз С. Виноградов. — 1930-тӥ аръёсы К. Герд репрессиос улэ сюриз, солэсь ужъёссэ быдтыны тыршизы. Тодӥсько на, кызьы дорамы куд-ог учебникъёсысь удмурт азьветлӥсьёслэн патретъёссы гожмамын, бышкамын вал. Озьы карыны курылӥллям школаысь дышетӥсьёс. Тазэ книгаез быдтонлэсь утён вылысь дядяе К. Герд шуыса гожтэмен вылбамъёссэ кесям. Озьы гинэ со утиськыса кылем. Пичи дырысен та учебник мынам ӝӧк выл книгае вал. Школаын дышетсконо книгамы сярысь, со трослы паськытгес усьтылӥз мыным дуннеез. Мон котьку синмаськыса учкылӥ книгае пыртэм пӧртэм калыкъёслэн тусбуйёссы пӧлысь куйы вылын пукись чебер удмурт кышномурт шоры. Со Можга ёросысь Гозек гуртысь Ольга Кузьминична (яке Кузьмовна) Андреева дышетӥсь вылэм. К. Герд сое туспуктэм эскпедициосыз дыръя но книгае пыртэм. Берло та кышномуртэн аслым но тодматскыны шуд усиз.

Татчыозь учебникез мурт синъёслэсь палэнын вози. Алигес малпаськонэ уси, кин солэн зэмос авторез, угось вылбамъёсыз кесямын. Вазиськи Йӧскалык библиотекае но Историяя, кылъя но литературая Удмурт институтлэн библиотекаяз, но отын книгалэн копиосыз гинэ утиськемын.

Со копиосын гожтэмын, книгаез удмурт кылэ берыктон бордын ужазы С. И. Русских, И. Г. Векшин, К. П. Герд шуыса. Отын ик пусъемын, М. И. Ильинлэн книгаяз уно кулэ люкетъёсыз ӧй вал, соосыз выльысь гожъяно, куд-огзэ мукет учебникъёсысь ватсано луиз шуыса. Кылсярысь, К. Гердэн гожтэмын «Глобус», «Котьмарлэн паськытомемез но шымырскемез», «Коралл’ёс», «Пассат тӧл’ёс», «Климат чур’ёс» главаос.

Учебниклэн авторез сярысь тодыны С. Виноградовлы юрттӥз Удмурт кун университетысь тодосчи Риф Насибуллин. Солэн малпамезъя, М. И. Ильин со Илья Яковлевич Маршак, Самуил Маршак писательлэн выныз. Илья Маршак аслыз кушем ним басьтэм, еврей выжыысь луэмзэ ватон вылысь. М. Ильин советской писатель, инженер-химик вал, СССР-ысь калыкъёслы учебникъёс поттон бордын ужаз. Та учебник сяна, удмурт калык дорозь вуиз А. Борисоваен берыктэм «Великой план сярысь верос», А. С. Бутолинэн берыктэм «Тӧдьы вылтӥ сьӧдэн» книгаосыз. М. Ильинлы книгаос поттыны юрттӥськиз Е. Сегал кузпалыз. Соосын дасям книгаос пӧлысь удмуртэ берыктэмын вал «Школьниклэн сумкаез» (берыктӥз Г. Медведев), «Машинаос сярысь верос» (берыктӥз А. Кардопольцев) но мукетъёсыз.

Ангелина Снигирёва

Удмурт Дунне
By Удмурт Дунне Ноябрь 13, 2017 10:44