Пичи Пурга ёросысь Быстровоын «Удмурт Кенеш» огазеяськонлэн азьветлӥсьёсыз люкаськылӥзы.

Удмурт Дунне
By Удмурт Дунне Ноябрь 8, 2017 11:10

Пичи Пурга ёросысь Быстровоын «Мон гуртын улӥсько!» ужрад ортчиз. Отчы ёросысь «Удмурт Кенеш» огазеяськонлэн азьветлӥсьёсыз пыриськизы.

«Удмурт Кенеш» огазеяськонлэн тӧроез Т. В. Ишматова

— Милям, ваньмыз алама шуыса, ӝожтӥсько, — шуэ Татьяна Витальевна. Нош сентябре Сыктывкарын ортчем ӧтчамын асьме элькунмес умой ласянь пусйизы. Кылсярысь, Комиын, Мордовиын анай кылэз дышетон программае пыртэмын, нош учебникъёссы ӧвӧл. Милям учебникъёсмы вань, но мукетыз ӝожомытэ — соос эскеронъёс пыр ӧз потэ на.

Ӝутэмын вал ёрос радио пумысен юан. Сое ворсаны ӧдъяло. Калык шып медаз пукы вал, малпанзэ мед шараясал.

Котырес ӝӧк сьӧрын гурт калыклэн ас мылкыдызъя ортчытъяськись ужрадъёс сярысь но вераськизы: кызьы гожъяно азинскыны юрттӥсь проектъёс, кызьы туала гуртын радъяно веме.

Кылсярысь, Баграш-Бигра гуртлэн старостаез

А. Матвеев вераз, гуртазы, пе, веме люкаса, библиотекалы, музейлы, гурт администрацилы 2 этажъем юрт пуктӥське. Гуртоос ужез йылаз-пумаз вуттон понна коньдонзэс но сётӥзы, ужазы но. Но коньдон тырмымтэен, баграш-биграос юртэз липыны уг быгато. Огъя 480 сюрс манет кулэ ке, бичамын 200 сюрсэз гинэ.

«Мон гуртын улӥсько!» ужрадын шулдыртӥз «Мылкыд» ансамбль.

Гуртмес шулдыргес карон пумысен малпанъёссэс усьтӥзы Аксакшурысь шаерчи Валерий Баймурзин, «Удмурт нылкышно кенешлэн» ёрос ёзэныз кивалтӥсь Зинаида Елизарова, егитъёслэн «Шунды» огазеяськонзылэн ёзчиез Елена Пименова, ёросысь Егитъёслэн парламентсылэн тӧроез Наталья Фролова, Норья муниципал кылдытэтлэн йырыз Николай Зайцев, Вуж Мӧнья муниципал кылдытэтлэн йырыз Виктор Сергеев но мукетъёсыз. Люкаськемъёслэсь мылкыдзэс ӝутӥз Вуж Мӧньялась «Мылкыд» ансамбль.

Ваньзы ик одӥг малпанэ вуизы: кенешъёсты, вемеосты улӟытыны кулэ. Озьы гинэ удмуртъёс азинскыны луонлыкъёс шедьтозы.

Сергей Агичев

Туспуктэм: Сергей Агичев

Удмурт Дунне
By Удмурт Дунне Ноябрь 8, 2017 11:10