Пичи кенеш: Удмурт кылъя учебникъёсты палэнэ дунтэк уг вутто ни

Удмурт Дунне
By Удмурт Дунне Ноябрь 17, 2017 14:29

Арлы 2 пол «Удмурт Кенеш» огазеяськонлэн азьветлӥсьёсыз Пичи кенеше люкаськыло. Туэ понна 2-тӥез пумиськонзы ортчиз кылем арняе. 

Кенешон дыръя.

 

Со сӥземын вал Удмуртилэн кунлык басьтон нуналэзлы, соин кутскиз автономия понна нюръяськем Трокай Борисовлэн но Кузебай Гердлэн синпелетъёссы доры сяська понон бордысен.
Сяська понэмзы бере «кенешчиос» Кун Кенеше вамыштӥзы. Соослы пайдаё ужаны сӥзизы Кун Кенешлэн Тӧроез Алексей Прасолов, Тӧролэн но Правительстволэн администрациенызы кивалтӥсь Сергей Смирнов.

— Ми тӥледын валче ужаны чакласькомы, сое валаны луэ быръёнъёс бере Тӧролэн Александр Бречаловлэн тӥледын пумиськон ортчытэмезъя но, — шуиз Сергей Смирнов. — Тӥлесьтыд возьмаськом ас малпанъёстэс шараямдэс но улонэ пыӵатыны тыршемдэс, дӥсьтысагес ужамдэс.

Пичи кенешын ӧтчам ортчем бере огазеяськонлэн ужамезлы йылпумъянъёс лэсьтӥз «Удмурт Кенешлэн» тӧроез Татьяна Ишматова. Со сяна эскеремын вал кӧня ке лэчыт юанъёс, кылсярысь, Удмуртилэн кунлык басьтэм дырысеныз 100 ар тырмонэз пусъён пумысен. Шаерамы кылдытэмын нимысьтыз комиссия, со дася юбилеез ортчытыны план, нош кивалтэ соин А. Бречалов. Шумпотымон, со комиссие пыре «Удмурт Кенешлэн» дано тӧроез Валентин Тубылов но. Люкаськемъёс азьын со вакчияк мадиз кунлык басьтон нуналлэсь асьмеос, удмуртъёс, понна макем быдӟым но дуно луэмзэ.

Макем тросгес кылъёсты тодӥськод — сокем тон азинскем адями.

Тужгес лэчыт юанъёс ӝутскизы удмурт кылъя учебникъёс пумысен. Трос вераськонъёс вал ини, федерал перечене пырон понна соос одно ик экспертизаез ортчыны кулэ, нош со туж дуно шуыса. «Удмурт Кенеш» огазеяськонлэн экспертно-консультативной комитетэныз кивалтӥсь Игорь Семёнов верамъя, эскеронъёс со книгаосты поттэмлэсь дуногес усё. Мукетыз лэчыт ужпум озьы ик учебникъёсын герӟаськемын — соосты палэнысь удмуртъёс доры вуттон.

Жаляса верано, элькунысьтымы Дышетонъя но наукая министерство удмурт кылъя учебникъёсты шаерамы гинэ вӧлмытыны быгатэ, пе.

— 2005-тӥ арын дунтэк мукет улосъёсы но келяны луонлыкмы вал, но соку малы ке палэнысь школаос асьсэос соосты кулэ ӧз каре, — шуиз Дышетонъя но тодосъя министерствоысь йӧскалык дышетонъя ёзэтэн кивалтӥсь Валентина Корепанова. — Табере сыӵе луонлыкмы ӧвӧл ни.

— Озьы ке, удмурт кылэз палэнын нокин уз ни дышеты, — шараяз малпанзэ Игорь Семёнов. — Кылсярысь, Мордовия анай кылъя дышетскон книгаоссэс палэнын улӥсь эрзяос но мокшаос дорозь вуттэ, асьмелэн но озьы луыны кулэ. Удмуртъёсты удмуртъёс кулэ ӧз ке каре, кин кулэ кароз?

Та юанъёсты ӵектэмын вал эскерыны, нимысьтыз комиссия кылдытыса. Озьы ик азьвылгес ини Удмуртилэн Тӧроез А. Бречалов ӵектӥз вал йӧскалык дышетонлы сӥзем пумиськон ортчытыны. Ӵапак со пумиськонын та лэчыт юанъёсты эшшо огпол ӝутыны но пыр-почгес эскерыны луысал, уго кивалтӥсьёстэк соосты сэрттыны секыт луоз, шуо «кенешчиос».

Елена Рябина 

Туспуктӥз А. Горбунов

Удмурт Дунне
By Удмурт Дунне Ноябрь 17, 2017 14:29