Пермь улосысь Гондыргуртын удмуртъёслэн Тол вӧсьсы ортчиз

Удмурт Дунне
By Удмурт Дунне Ноябрь 27, 2017 15:45

Пермь улосысь Гондыргуртын удмуртъёслэн Тол вӧсьсы ортчиз

Тужгес арлыдо вӧсясьсы.

Вашкала дыръёсы та вӧсяськон арлы быдэ ортчылэм вань бусы ужъёс йылпумъяськем, урожаез утялтэм-интыям бере, бер сӥзьыл. Но совето вакытъёсы сям-йылол вунэтэмын вал. 2011-тӥ арын гинэ, Пермь улосысь удмуртъёслэн национально-культурной центрзылэн кивалтӥсез Станислав Гадиятов сюлмаськемен, сямез улӟытоно кариськизы. Малпам уж борды дэмен басьтӥськизы.

 

— Кышкан вал: люкаськоз-а калык? Валалоз-а? — тодаз вае Станислав Идиятович, — но нырысь араз ик туж трос калык вуиз. Удмуртъёс гинэ ӧвӧл, мукет выжы калыкъёс но. Соослы тунсыко вал вашкала удмурт сям-йылолэз учкыны.

Али Тол вӧсь арлы быдэ ноябрь пумын Пермь улосысь Гондыргуртын ортче. Юромо та нуналлы колхоз висъя кунян. Нылкышноос, коркась корка ветлыса, ӝуклы кеньыр бичало. Вӧсясьёс, дун-чылкыт нюлэскын Инмарлы вазиськыса, сое вандо, кӧня ке бадӟым пуртыосын ӝук пӧзьто. Нялтас вераса, туэ 10 пурты пӧзьтэмын вал. Вӧсясьёс Инмарлы куриськем бере вань люкаськем калык вӧсям ӝук сииз. Та нуналэ ик гуртын ортчизы шулдыръяськонъёс: вал вылын ворттылонъёс, шудонъёс, пӧртэм ӵошатсконъёс.

Туэ Тол вӧсе Пермь улосысь гинэ ӧвӧл, Башкортостанысь, Удмуртиысь, Екатеринбург палъёсысь но удмуртъёс вуылӥзы. Та нуналэ ик ӝыт Гондыргуртысь культура юртын бадӟым концерт радъяськиз.

Маин туэ Тол вӧсяськон азьвылъёсызлэсь висъяськиз но малы та нунал азьын одно ик мунчое пырыны кулэ вал? Кыӵе кылъёсын вазисько вӧсясьёс Инмарлы Кылдысинлы? Та сярысь пыр-почгес лыдӟоды «Удмурт Кенеш» огазеяськонлэн 12-тӥ декабре потоно «Герд» газетысьтыз.

Елена Миннигараева

Удмурт Дунне
By Удмурт Дунне Ноябрь 27, 2017 15:45