Пермь улосын мыло-кыдо ужа «Удмурт Кенешлэн» ёзэз

Удмурт Дунне
By Удмурт Дунне Ноябрь 9, 2017 10:51

Пермь улосын, 2010-тӥ арын ортчытэм лыдъян-чотанъя, 21 сюрс пала удмуртъёс уло. Татын мыло-кыдо ужа «Удмурт Кенешлэн» ёзэз.

Со кылдӥз 1990-тӥ арын инвожо толэзе кылбурчи Шарипзян Меншарапов кивалтэмъя. Нош 2000-тӥ арысен туннэ нуналозь та ужез нуэ Станислав Гадиятов.

Чайковскийысь «Зарни сӥзьыл» ансамбльысь кенакъёс пиналъёс пӧлын.

Огазеяськон кема дыр ӵоже нокытын пусъемын ӧй вал, со возиськиз удмуртлыкез утьыны но азинтыны мылкыд карисьёс вылын гинэ, нош 2008-тӥ арысен Пермь улосысь «Удмурт Кенешлэн» ёзэз регистрациез ортчиз. Озьыен, табере солы пичиен ке но коньдонэн котькуд ар юрттэ ёрос администрация, озьы ик кулэ луэмезъя улослэн губернаторез. Пермь удмуртъёслэн валтӥсь ёззы ужа Куеда ёросын, солэн вань на филиалъёсыз Чернушка но Чайковский каръёсын. Соосын мылысь-кыдысь кивалто Салават Гизатуллин но Людмила Филиппова.

— Улон пӧзе, уж трос, — шуэ «Удмурт Кенешлэн» Пермь улосысь ёзэныз кивалтӥсь Станислав Гадиятов. — Мон ачим куарусён пумын гинэ вуылӥ Коми шаерлэн шоркараз. Сыктывкарын ортчиз Россиысь фин-угор калыкъёслэн 6-тӥ ӧтчамзы. Съездлэн ужаз пыриськыса, тодӥ, кыӵе шуг-секытъёссы мукет калыкъёслэн но диаспораослэн, кыӵе проектъёсты соос улонэ пыӵато, маин уло. Ӧтчамлэсь азьвылгес Пермь улосысь Барда ёросын «Традиционный орнамент в культуре народов Пермского края» семинар ортчиз. Ужрад сӥземын вал калык дӥсез утёнлы. Пермь удмуртъёслэн дӥсьсы туж аспӧртэм луэ, мукет удмуртъёсын ӵошатыса. Камсьӧр удмуртъёс троссэ башкиръёслэсь но бигеръёслэсь асэстӥллям, лэся, но соин валче утьыны быгатӥллям асьсэлэсь вашкала тодметъёссэс. Семинарын радъямын вал мастер-классъёс, ужазы секциос, ми отчы мыло-кыдо пыриськимы.

Ми удмуртъёслэсь вань календарной праздникъёссэс пусйиськомы. Кылсярысь, ноябрь пумын милям луоз Куриськон. 2009-тӥ арысен 1 нуналэ 2 праздникез пусйыны кутскимы. Лымшорозь буре вайиськомы Инмарез — куриськиськом, нош собере ортчытӥськом Дӧдьыкытконэз. Люкаськиськом вашкала Куриськон интыын, Куеда ёросысь Бадӟым Гондыр но Эсет гуртъёс вискысь арамаын. Ужрад шулдыр ортче, шудонъёсын-ӵошатсконъёсын. Пумаз ӵошен ӝук сииськомы. Куриськонэз радъяны 2011-тӥ арысен уксё висъя улосмы.

Котькуд удмурт гуртын творческой коллективъёс вань. Кылсярысь, Бадӟым Гондырысь арлыдоослэн «Купанча» коллективзы З. Останиналэн кивалтэмез улсын туэ «Патриоты края. Патриоты России» ёрос конкурсын 3-тӥ инты басьтӥз.

Туж ушъямон Чайковскийысь «Зарни сӥзьыл» ансамбль. Отысь артистъёс кылем арняе гинэ ай бертӥзы Москваысь творческой коллективъёслэн 46-тӥ калыккуспо конкурс-фестивальысьтызы, 2 номинациосын вормыса! Кивалтӥсьсы — Людмила Филиппова — Россиысь Президентэн ялэм «Бабушкин сундучок — кладезь традиций» конкурсын грант утӥз. Табере ар ӵоже Чайковскийысь школаосын, библиотекаосын ортчыло перепеч пыжыны, уксётӥрлык лэсьтыны, пужыятӥськыны дышетӥсь но трос мукет мастер-классъёс. 2013-тӥ арын «Зарни сӥзьыл» пыртэмын Россиысь творческой коллективъёслы сӥзем «Богатство России» энциклопедие.

Туж умой, куке сям-йылолъёсмес, культурамес, кылмес мӧйыос но шор арлыдо муртъёс утьыны но азинтыны тыршо, но кыӵе умой луысал, пиналъёс но та уж борды басьтӥськысалзы ке, шуо пермь удмуртъёс.

— Куеда ёросын 9 удмурт гурт. Котькытын сямен ик, татын но удмурт калык ужаны быгатэ: «Выль сюрес», «Горд кужым», «Югдон» но мукет колхозъёс котьку азьмынӥсьёс пӧлын. Азинтӥське ужбергатон: кубистаен, кылсярысь, быдэс Пермь улосэз сюдо.

Нимысьтыз верам потэ дышетон сярысь. Калыкмылэн асваланэз зол ке но, ёросмылэн бадӟым люкетаз удмурт кылэз факультатив сямен гинэ дышето, урок сямен удмурт кыл возиське Кирга школаын гинэ. Анай кылэз рос-прос дышетон понна анай-атайёслэсь заявлениос люкало. Жаль, дышетэмысь дугдыкузы, сыӵе кагаз ӧз куре шуыса… Озьы ке но анай кылмы нылпи садъёсын но школаосын чузъяськемысь уг дугды — со туж шумпоттэ но умоезлы оскон сётэ, — шуэ Станислав Идиятович.

Любовь Михайлова

Туспуктэм: culturechaik.ru

Удмурт Дунне
By Удмурт Дунне Ноябрь 9, 2017 10:51