Пазял школаын юмшало дышетскыса

Удмурт Дунне
By Удмурт Дунне Ноябрь 9, 2017 10:18

Кылем арняе Можга ёросысь Пазял школаын 3-тӥзэ «Пазял юмшанъёс» ортчизы. Отчы ёросысь 7-тӥ-11-тӥ классъёсысь 80 дышетскисьёс но 10 дышетӥсьёс вуылӥзы.

— Каникулъёссы дыръя, ми пиналъёсты огазе люкаськом, — вера Пазял школаысь директорлэн воштӥсез Наталья Чувашова. — Нунал ӵоже визьзэс сынаськом, тунсыко арбериос, пӧртэм киужъёс лэсьтыны дышетӥськом. Программа быдэсак удмурт пиналъёслы чакламын ке но, арысь аре ӟучъёсыз но вуо, соослы но тунсыко потэ, кылэз уг ке но валало.

Та ужрадлэн пуштросэз туж узыр. Вань вуэм пиналъёсты 6 командаослы люко, одӥг школаысь дышетскисьёс пӧртэм командаосы мед сюрозы шуыса. Нунал ӵоже со командаос вуыло кӧня ке пумо мастер-классъёсы, тренингъёсы.

— Туэ малпамы Уробокуштон карыны, азьло со йылолэз ӵапак 2-тӥ шуркынмонэ ортчытъяллям, — шуэ Наталья Чувашова. — Бӧрысь удмурт кылэз но литератураез, шаермес но историмес тодэмзэс мертамы «Йырвизьмес сыналом, кеньырзэ эскером» шудонын.

Радъясьёс арлы быдэ та ужрадазы куноосты ӧтьыны тыршо. Кылсярысь, кылем арын Пазялэ вуылӥзы «шундыос» — соос мастер-классъёсын но дышетӥзы, шулдыртӥзы но. Туэ куное ветлӥзы егит кырӟасьёс Богдан Анфиногенов, Кирилл Кириллов но битбоксер Илья Едыгаров.

Нылпиос егит кырӟасьёсын Богдан Анфиногеновен, Кирилл Кирилловен но битбоксер Илья Едыгаровен.

— Со понна бадӟым тау «Удмурт Кенешлы», уго со туж юрттӥз сыӵе тунсыко адямиосты дорамы вайыны. Куноосын творческой пумиськон ортчытӥм, нош собере соос шулдыртӥзы на дискотекаямы, пиналъёсмы туж шумпотӥзы, — шуэ Наталья Чувашова. — Ужрад йылпумъяськем бере ваньмы ӵош флешмоб эктӥмы, нокыӵе зор милемлы ӧз люкеты.

Алёна Михайлова

Туспуктэм: vk.com («Пазял юмшанъёс 2k17»)

Удмурт Дунне
By Удмурт Дунне Ноябрь 9, 2017 10:18