Лулэз шунтоно нылпиез кадь. Вениамин Ившин писательлы — 70 арес.

Удмурт Дунне
By Удмурт Дунне Ноябрь 2, 2017 15:01

Вениамин Ившин — кылбурчи, журналист, кылысь кылэ берыктӥсь.

Вениамин Ившин — кылбурчи, журналист, кылысь кылэ берыктӥсь. Россиысь но Удмуртиысь культура удысын дано ужась, Удмуртилэн Кун премиезлэн лауреатэз, Эшъяськон орденлэн кавалерез. Бадӟымъёслы но покчиослы 20-лэсь уно книгаослэн авторзы. Та нуналъёсы Вениамин Никоноровичлы 70 арес тырмиз. Вераськонмы бергаз литература котыртӥ.

— Тодӥськоды-а, арлыдме верало ке, сюлмы шуг луэ. Аресъёс пельпумам зӥбыны кутско кадь. Нош тодэ вайытӥсь ӧвӧл ке, ачим мон соосты уг шӧдӥськы.

Тужгес тунсыко но яркыт вакытъёсы герӟаськемын литератураен но литература котырысь адямиосын, эшъёсын. Нырысь ик тодэ лыктэ Олег Поскрёбышев ӟуч кылбурчи. Со монэ Кез школаын 3 арзэ дышетӥз. Текстъёсты вольыт лыдӟонъя кружоказ туж трос пиналъёс ветло вал, быдэс параллельысь 4 класс. Кыӵе быгатылӥз со кылбур лыдӟыны, Н. Некрасовлэсь поэмаоссэ учкытэк вералляз! Со сяна, ёросысь «Звезда» газет бордысь творчествоя кружокез нуиз. Мон отчы но ветлӥ.

Школаме йылпумъякум, туж потэ вал нюлэсчи луэме. Но Олег Поскрёбышев шуиз: «Веня, тон кылбуръёс гожъяськод ук. Тонэ татын, вордӥськем шаерад, валалозы. Университетын туж ӟеч специалистъёс, дышетӥсьёс вань…» Озьы мон Удмурт кун университетэ мынӥ. Татын зэмзэ но туж ӟеч дышетӥсьёс вал: Даниил Яшин, Роза Яшина… Соос асьсэ шунытэнызы бинялтӥзы кадь. Студент дыръям ик мон ӝытъёсы, уйёсы возьмаськись луыса ужалляй нылпи садын, школаын. Коньдонэ доре келяны но тырме на вал.

Даниил Яшинлэн кружоказ мон староста вал. Асьме гожъямъёсынымы печатлам журнал но поттылӥм. Кружокамы студентъёс-суредасьёс Пётр Ёлкин, Анатолий Леонтьев но ветлӥзы, соос журналэз чебермазы. Бӧрысь А. Леонтьев ачиз но гожъяськыны кутскиз, берпуметӥ курсын дышетскыкуз, нылпиослы пичи книга поттӥз ни. Со кружоклэн кужымез бадӟым вал, ми пӧртэм ӝытъёс ортчытъям, гуртъёсы пумиськонъёсы потам. Нокызьы уд вунэты Зоя Богомолова литературоведэз но. Со кадь лякыт мылкыд кылдытӥсь адями ӧй вал, дыр. Со лэчыт ужпумъёсты, тани-тани писательёс куспын ожмаськон потоз кадь, быгатылӥз буйгатыны, ваче вуисьёс вискын кусып тупатыны.

— Литературоведъёс пӧлысь ик кылэме вань: З. Богомолова удмурт писательёсты, поэтъёсты укыр ушъяз, соин сэрен куд-огез быгатонлыксэс будэтон сярысь ӧз сюлмаське ни…

— Малпасько, сыӵе вераськонъёс пото вожъяськон бордысь. Мон котьку паймисько вал: Зоя Алексеевналы трос арес вал ни, но кыӵе со ассэ чебер возьылӥз! Туж быгатылӥз бадӟым кивалтӥсьёслы книга поттонлэсь кулэлыксэ возьматыны. Солэн юрттэменыз, куддыръя удмурт книгаос поттонлы коньдон но висъяллязы. Зоя Алексеевна ӧз яратылы этнофутуризмез. Но со дыре ик шуэ вал: бен, В. Маяковский, С. Есенин но пӧртэм литература ӧръёсы пырылӥзы. Котькудӥз со ӧр кыӵе ке яркыт нимъёс кельтӥз…

Творчествоен вырись муртэ вӧсь карыны кема ӧвӧл, со ваньзэ сюлмаз матэ басьтэ. Тужгес но удмурт гожъяськись. Нош Зоя Алексеевна бурдъяны выриз. Мон уг малпаськы, мултэс куасалтэ вал шуыса. Пенсие потыса но, со огшоры ӧз пукы, кылдытӥз творчество удысысь нылкышноослэсь огазеяськонзэс.

— Тӥ удмурт литератураысь классикъёс вӧзын ужаллямын, соосын эшъяськылэмын. Оло, мемуаръёс борды кутсконо ни?

— Кутски ни вал. Но ваньзэ гожъяно ке, кышкасько, куд-огзэ, оло, вӧсь карыны шедьто. Соин ик малпанэлэсь куштӥськи.

Тодам лыктэ: нылпиослы «Кизили» журнал усьтӥ гинэ, монэ Писательёслэн огазеяськонэнызы со вакытъёсы кивалтӥсь Семён Самсонов парторганизацилы секретаре ӵектӥз. Партсобраниос ортчытъяно, взносъёс бичано, писательёсын герӟаськем пӧртэм ужпумъёсты сэрттоно. Мар но ӧй вал! Кылсярысь, одӥгез писатель вылэ мукет улосын улӥсь нырысетӥ кышноез ӝожтӥськон келям, алимент, пе, уг тыры. Монэ та пумысен куаретыны вылӥе ӧтизы. Нош мон уг но тодӥськы вал, со писатель татын кыкетӥ кузпалыныз улэ шуыса. Косӥзы: огазеяськонысь вань писательёслэсь-коммунистъёслэсь семья кусыпъёссэс эскеры но иворты! Инмаре-куазе, мар улон вал со… Кык-куинь ар партсекретарь луыса ужам дыръёсы быдэс даур кадь потӥзы. М. Горбачёв партиез быдтэм бере капчияк лулӟи ни.

— Тӥляд бадӟымъёслы но, покчиослы но кылбур бичетъёсты вань. Кинлы гожъяны золгес яра?

— Пиналгес дыръям тросгес гожъяй арлыдоослы. Туж лӧпкытъяз Флор Васильев. Соку «Советской Удмуртия» газетын ужасько вал. Ваньзы нуназеяны кошко, мыным Флор Иванович жингыртэ (соку со «Кенеш» журналлэн редакторез вал): «Веня, васькы ай дорам». Васькисько, солэн азяз горд блокнот (малы ке блокнотэз ялан горд луэ вал), отчы гожтэм выль кылбуръёссэ мыным лыдӟе ни. Валасько, сыӵе дыръя куспатоно ӧвӧл. Нош лыдӟемез бере мылкыдме верасько вал, тани та кылзэ воштоно, соиз уггес тупа. Кылзылӥз но куддыръя тупатъялляз.

Туж ӝож вал, куке Флор Васильев, Николай Байтеряков поэтъёсты «тышканы» кутскизы. Кылсярысь, Н. Байтеряковез пыкылӥзы, кылбуръёсыз усем мылкыдоесь шуыса, нош со фронтовик ук, озьыен, азьлане мынӥсь, партилы сӥзем кылбуръёс гожъяны кулэ… Вакытэз сыӵе вал угось: цензура, ог-огед вылэ чагиськон. Но, малпасько, ӟечез тросгес вал.

Али тыршисько покчиослы гожъяны, кыр сяськаос сярысь пичи веросъёсын, кылбуръёсын книга дасясько. Но кинлы мон сое гожъясько, шуг вераны. Удмурт нылпи садъёсын ужасьёс но шуо ни: пиналъёсмы анай кылзэс уг валало, капчигес гожъяны тырше. Алигес туж пайми: «бугор» кылэз но валалозы на меда, пе…

— Трос выриды ӟуч классикъёсты берыктонэн. Мынам малпамея, берыктон — со аслэсьтыд ужъёстэ гожъямлэсь но секытгес…

— Зэм. Мон берыкъяй А. Пушкинэз, М. Лермонтовез, С. Есенинэз, Н. Некрасовез. Со понна туж бадӟым тау Флор Васильевлы. Со туж трос лэсьтӥз Совето Союзысь писательёсын кусыпъёсты юнматон понна. Нырысьсэ республикаямы ортчытӥз советской литературалы сӥзем бадӟым ужрад. Мероприятие быдэс Союзысь писательёс ӧтемын вал. Вуылӥзы Андрей Дементьев, Владимир Солоухин но трос мукетъёсыз. Флор Иванович мыным В. Солоухинлэсь кылбурзэ сётӥз: удмурт кылэ ӝог берыктоно, пе. Нырысь курадӟи, собере кошкиз ни. Кылбур тазьы йылпумъяське: «Имеющий в руках цветы плохого совершить не может…» Мон берыктӥ: «…Сяськаосты возись киос уз лэсьтэ ноку уродзэ…» Бӧрысь та кылбур журналъёсын но потӥз.

— Нош туала литература пумысен мар малпаськоды?

— Мон туж лякытак гинэ верасал: кин гинэ удмурт кылын уг гожъяськы, мон шумпотӥсько. Но лябез туж трос. Тужгес но чутэ кыл. Со ӟуч кылысь дыртыса суп-сап берыктэм кылъёс, конструкциос. Зэм, удмурт литератураын гинэ ӧвӧл, ӟучаз но шугъяськонъёс шӧдӥсько. Кемалась ӧвӧл шаерысьтымы ӟуч кылбурасен пумиськи. Ушъяське: мынэсьтым кылбурме Интернетын 2 миллион адями, пе, лыдӟиз. Я, шуисько, лыдӟы ай со кылбурдэ. Лыдӟиз. Сыӵе ӝожоми… Жаль, зэмос литература палэнэ кыле, жуг-жаг вылӥе ӝутске.

— Мар улонын вал-тӥсез?

— Улон адямиез уг жаля, туж дыртыса мынэ, тани-тани лёгаса кошкоз кадь. Асьмеос ум дунъяське вӧзысьтымы эшъёсмес, угось асьмеды но улон пешкытыны дась. Уг тырмы адямиез жалян. Жалян — со валан, оскон сётон. Таӵе вакытэ зэмос литература адямилы юрттыны кулэ, гожъяськисьлы мурт лулэз нылпиез кадь шунтоно, утёно.

— Нош ассэ гожъясез кин утёз?

— А. Пушкин гожтӥз вал: «Тебе ж нет отзыва…» Озьы луэ ни со. Но мукет ласянь, гожъяськись адямилы ручка кутон куддыръя аспӧртэм психотерапия луэ. Та дуннеын ваче вуонъёслэсь, вӧсь каронъёслэсь писатель пегӟыны быгатэ аслаз кылдытэм дуннеяз.

Елена Миннигараева

Туспуктэм: «Удмурт дунне» газетлэн архивысьтыз

Удмурт Дунне
By Удмурт Дунне Ноябрь 2, 2017 15:01