Кыӵе шуг-секытъёс кылдэмын нюлэс хозяйствоын

Удмурт Дунне
By Удмурт Дунне Ноябрь 13, 2017 11:06

Россиын нюлэс хозяйство сярысь валтӥсь закон 10 ар талэсь азьло кутэмын. Но туннэ нуналлы солэн трос тырмымтэосыз шараяськизы. Та пумысен котырес ӝӧк ортчиз Кун Кенешын. Отчы пыриськизы Кун Думаысь депутатъёс Валерий Бузилов но Александр Василенко.

Корам тэль интые будэтоно выльзэ.

Сюлмаськонъёс

Депутатъёсты, нюлэс поттонэн вырись адямиосты, огазеяськонъёсты та юанэз сэрттыны люказ Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссиен кивалтӥсь Владимир Варламов.

Нюлэс — Удмуртилэн одӥгез узырлыкез. Нюлэсмес мыло-кыдо басьто но солэсь выль вузъёс потто Россиысь но кунгож сьӧрысь предприятиос. Но та ужез эшшо ӟечгес нуыны люкето пӧртэм шуг-секытъёс. Соосын тодматӥз нюлэс хозяйствоя министрлэсь ужзэ быдэсъясь Сергей Журавлёв.

Солэн верамезъя, туннэ нуналлы бадӟым сюлмаськон кылдэмын законэз тӥяса поттэм нюлэсэз вузанэн. Закон рос-прос уг вера, кызьы со нюлэсэн ужаны кулэ. Озьы ик нокин уг чакла дасям нюлэслэсь кутӥськемзэ. Кылсярысь, куд-ог ужбергатӥсьёс корка лэсьтыны шуыса кор дасяло, нош зэмзэ ке, вузало сое но асьсэлы пайда потто.

Тэлез куасьмем, сисьмем, висись писпуослэсь чылкытатоно. Та ужъёсыз ас вылаз басьто интыосысь нюлэс хозяйствоос. Но ужъёсты быдэстонлы туж ичи коньдон висъяське, шуиз С. Журавлёв.

Эшшо одӥгез сюлмаськон кылдэмын нимысьтыз утёно интыослэсь — заказникъёслэсь, инкуазь паркъёслэсь — границаоссэс юнматонэн. Соос асьме дорын 1960-тӥ-1970-тӥ аръёсы кылдэмын, со дырысен документъёсы рос-прос воштӥськонъёс пыртылэмын ӧвӧл. Заказникъёс котырын улӥсьёс пу дасяны курадӟо, нюлэс ваёно луо палэнысь. Со трослы дуногес усе. Кылсярысь, сыӵе югдуре вуэмын Кез ёросысь Степанёнка муниципал кылдытэтын улӥсьёс. Соос пу ваё 30 иськем палэнысь.

Вань ке но, ӧвӧл

Нюлэс хозяйство сярысь законлэсь тырмымтэоссэ ас вылазы шӧдо ужбергатӥсьёс но. Удмуртиысь нюлэс поттӥсьёслэн огазеяськонэнызы кивалтӥсь Константин Вахрушев соослэсь сюлмаськонъёссэс шараяз.

— Шаерамы нюлэс поттонын законъёсты чакласа ужась арендаторъёс трос. Соос ас удыссэс азинтон понна трос кужымзэс понӥзы, уно коньдон кисьтӥзы, ӟеч техника но оборудование басьтӥзы. Но азьланяз кышкытлык вань, бизнессы Россиысь нюлэс хозяйствоя законлы луыса куашканы быгатоз шуыса. Угось арендае басьтэм вакытлэн дырыз ортчем бере предприятиос, нимысьтыз торгъёс пыр потытэк, азьвыл амалъёсъя ужаны уг быгато ни.

Сьӧлта ёросысь Депутатъёслэн Кенешенызы кивалтӥсь Александр Однолько тодматӥз ёросысь югдурен.

— Ёросамы нокыӵе промышленной предприятиос ӧвӧл, — шуиз со. — Нюлэс милям валтӥсь узырлыкмы, бюджетмес тырмытӥсь одӥгез ӧр. Ёросмы 64,4 процентлы нюлэсэн шобыртэмын. Туннэ нуналлы 66 процентэз тэльёсмы бускель Ува ёросысь 3 арендаторъёс киын. Соослы луонлык сётэмын, аукционъёс ортчытъятэк, нюлэсмес поттыны. Асьме адямиослы кылемын 34 процент тэльёсмы. Но татын выль могӟет: ог 20 ар лэсьтэмын ӧвӧл ни нюлэс коран, поттон, мерттон пумысен ужъёс. Со люкетэ нюлэсэн вырись ужбергатӥсьёслы. Нош Сьӧлталан 32 ужбергатӥсьёс та удысын ужало. Нюлэс коранэз умой-умой радъямтэен луиз озьы: нюлэс дасяны вуэмын, нош сое кораны ум быгатӥське.

Та сяна, сюлмаськон кылдэмын огшоры эстыны, лэсьтӥськыны нюлэс поттон пумысен но. Тросаз гуртъёсы газ вуымтэ на — адямиос пуэн шунтӥсько. Но гуртоос куасьмем писпуосты гинэ но поттыны уг быгато. Угось ар куспын дасяны лэзем нюлэс нырысь ик арендаторъёслы сётӥське, кылемзэ огшоры адямиос куспын люкыло. Озьы гуртоослы кыле ог 7 сюрс 600 кубометр, семьялы быдэ 1,5 кубометр. Валамон, со туж ичи.

Сюлмаськонзэ вераз Яр ёросысь ужбергатӥсь Андрей Саламатов. Со Яр но Глазов ёросъёсысь тэль поттэ, со сяна, корам интыосы выль нюлэс мерттэ. 2016-тӥ арысен та предприятие Удмуртиысь инвестициосты кысконъя проектъёс пӧлы пыртэмын. А. Саламатовлэн предприятиез кемалась ик ӧвӧл китаецъёсын огкыл гожтӥз. Но ужзэ азинтон понна нюлэс хозяйствоез радъяны юрттӥсь законъёс кутэмын мед луозы.

Коньдон сётӥськоз

Котырес ӝӧк сьӧрын чузъяськем сюлмаськытӥсь ужпумъёс пумысен Владимир Варламов шуиз:

— Нюлэс поттонэн герӟаськем юанъёс туж трос люкаськемын огшоры адямиослэн но, ужбергатӥсьёслэн но. Нырысь ик нюлэс коранэз, поттонэз, мерттонэз радъяно. Со понна, валамон, нюлэс хозяйстволы нимысьтыз коньдон висъяно луоз. Трос сюлмаськонъёс кылдэмын нимысьтыз утёно интыос пумысен, шаерысьтымы куд-ог ёросъёс пу дасяны курадӟо. Но асьме кужымен, Россиысь законэз тупатытэк, вань та ужпумъёсты вормыны ум быгатӥське.

Асьмеос тодӥськом на, азьвыл нюлэскысь сисьмем, куасьмем писпуосыз поттэм понна государство коньдон сётылӥз. Табере закон та понна калыклэсь уксёзэ куре. Адӟиськомы, тырмымтэос трос люкаськемын. Ваньзэ Кун Думаын 16-тӥ ноябре нюлэс хозяйство сярысь законъя кылзонъёсын ӝутомы.

Та борды Кун Думаысь депутат Валерий Бузилов ватсаз, вуоно арлы федерал бюджетэз учкыку, одӥгез валтӥсь юан герӟаськемын вал нюлэс хозяйстволы тросгес коньдон висъянэн. Со элькунын нюлэсэн кылдэм сюлмаськытӥсь ужпумъёсты тупатыны юрттоз, шуиз со.

Ангелина Снигирёва

Туспуктӥз А. Горбунов

Удмурт Дунне
By Удмурт Дунне Ноябрь 13, 2017 11:06