Куашкам коркась адямиос ульчае уз кыле

Ангелина Снигирева
By Ангелина Снигирева Ноябрь 12, 2017 15:05

Туннэ, 12-тӥ шуркынмонэ, Удмуртилэн Тӧроез Александр Бречалов журналистъёслы вераз: Ижысь Удмуртской урамысь 9 этажъем коркалэн подъездэз куашкамен йырин улыны ярантэмен лыдъямын 6 подъезд пӧлысь 3-ез.

— 5-тӥ подъезд сярысь вераськонэз ик ӧвӧл, — шуиз со. — 8 квартира быдэсак куашкамын, та подъездысь мукетъёсыз но ярантэм луэмын. Экспертизалэн нырысь чакламъёсызъя, кышкытлык вань артысь подъездъёслы но — 4-тӥ но 5-тӥ. Но пыр-поч эскеронъёс понна толэзь пала кулэ, таӵе ужын чыры-пырыос ӧвӧл. Эскеремын луозы коркась вань квартираос — 1-тӥ. 2-тӥ, 3-тӥ подъездъёсысь но.
Али улыны ярантэмен лыдъямын 101 квартира. Экспертиза ортчытыны ӧтемын федерал ӧнерчиос. Али коркан улыны лэземын ӧвӧл на, корка кузёосты полицейскойёс чаклам улсын таманлы лэзьяло кулэ луись арбериоссэс басьтыны гинэ.
— Квартиразэс ыштэм муртъёс выль улон инты басьтозы, — шуиз Тӧро. — Но со понна дыр кулэ: ортчытоно пыр-поч экспертиза, дасяно документъёс, утчано коньдонэн луонлык. Дыр кемагес кыстӥськиз ке но, одӥг адями но ульчае уз кыльы, соосты арендае басьтэм квартираосы интыялозы.
Кинлэн улон интыез изъянмемын, озьы ик коньдонэн юрттэт басьтозы.
Быремъёслэн семьяоссы коньдон басьтыны быгатозы арня ӵоже. Правительстволэн Тӧроез Ярослав Семёнов верамъя, вордӥськонэ (понедельнике), 13-тӥ шуркынмонэ (ноябре), комиссия чаклалоз, кинлы нимысьтыз коньдон висъяно. Матысь адямизэс ыштэм семьяос 1 миллион манет басьтозы.
Быремъёсты вато 11-тӥ-12-тӥ шуркынмонэ. Кыкезлэсь шӧйёссэс нуизы Ува ёросэ, отӥоссэ – Иже. Ватӥськонэн юрттӥське Ижкар муниципалитет.

УД

Фото басьтэмын Удмуртиысь Тӧролэн но Правительстволэн сайтысьтызы

Ангелина Снигирева
By Ангелина Снигирева Ноябрь 12, 2017 15:05