Геннадий Бекмановлы — 60 арес. Рольёссэ но, арлыдзэ но уг лыдъя

Удмурт Дунне
By Удмурт Дунне Ноябрь 20, 2017 14:02

Удмуртиысь калык артист Г. Бекманов.

60 арессэ пусйиз Удмуртиысь калык артист, Кузебай Герд нимо премилэн лауреатэз Геннадий Бекманов. Дано адямиос сярысь журналистъёс ӵем гожъяло — номыр гожтымтэез ӧвӧл ни кадь, соин ик юбилеез азьын юаськыны ми ӵектӥм лыдӟисьёсмылы.

— Кӧня роль шудӥды ни, театрын ужатозяды? Кыӵеосыз тӥледлы матынгес: серемес, драматичной яке кайгырись? (Ангелина Воробьёва, Сьӧлта ёрос.)

— Уд оскелэ, но ноку лыдъяме ӧвӧл. Театрын ужаны кутски 1981-тӥ арын, ваньмаз сямен спектакльёсын кыӵе ке роль сётъязы. Мон универсал, шудӥсько выжыкылын но, трагедиын но. Но сюлэмыя — мур пуштросо герой, историысь тодмо персонаж. Та ласянь берлоосыз пӧлысь туж но туж кельше «Чупчи крезь» спектакльысь Донды. Сое шудыкум, оскисько, мон Донды шуыса. Эшшо шудысал на… Лев Толстоез. Яке солэсь геройёссэ. Пинал дыръям мон сое ӧй валалля, нош 15 ар талэсь азьло романъёссэ выльысь лыдӟи но ас поннам сое выль сямен усьтӥ: улонын котьма мед луоз — адямиез вузаны уг яра.

— Нош кӧня кырӟан гожтӥды? Азьло тӥ пиосмурт кылбурчиослэн чуръёссыя кырӟанъёс кылдытъяды. Берло дыре учкиськоды нылкышно кылбуръёс шоры. Мар муген? (Алёна Ионина, Ижкар.)

— Тазэ но уг лыдъяськы. Маке уг вутскиськы ваньзэ люканы — огаз дискын 10, мукетаз… Вот уж сётӥды ай вуоно юбилейлы — ваньзэ радъяно. Но быгатӥсько вераны яратонозэ кырӟанме — со Анатолий Перевозчиковлэн кылъёсызъя «Аргурезь». Кылъёс бырйисько, кема копаськыса. Ӝӧк вылам огпалаз рольёсын маке ӝужда бумагаос кыллё, мукет палаз — быдэс гурезь кылбур сборникъёс. Дырын-дырын бугыръясько соосты. Куддыр быдэс книгаысь 1-2 чурез гинэ кельше кадь, но авторен кенешиськом, тупатъяськом, монъя кариськом но — сюлмысь пӧрме. Пиосмуртлэн-а, кышномуртлэн-а — мыным пӧртэмез ӧвӧл, авторлэн мылкыдыз-малпанэз мыным матын ке — кырӟан вордске.

— Артист ке ӧй луысалды, кин луыса ужасалды? (Любовь Михайлова, Ижкар.)

— Пастух. Яке лесник. Зэм, уг пӧяськы. Пичи дыръям мон туж вожъяськылӥ арганчиослы, туж потылӥз, мынам но арганэ мед луоз шуыса. Но анаймы милемды огназ будэтӥз… 3 гужем ужай арганлы уксё люкан понна! Озьы, 700 манет люкаса, Ижысь комиссионкае мынӥм — вылезлы эшшо 3 гужем ужано луысал на, дыр. Басьтӥм но, мон отын ик шудыны кутски. Вань калык абдраз. Вокзалын пукыны уг чидаськы ни, сокем шудэме потэ, нош анай уг лэзьы, милицаос куаретозы, шуэ. Мырдэм гуртозь чидай.

Соку мон малпалляй, пастухын ужаса гинэ, уксё поттыны луэ шуыса. Со сяна, туж яратылӥ инкуазез, нюлэсэз — лумбытэн, маке малпаськыса, поръясько вал.

Е. Загребин. «Эш-Тэрек». Шудо Г. Бекманов, В. Чернова. 1997-тӥ ар.

— Кызьы артистэ вуиды? Кин но мар донгиз та тунсыко сюрес вылэ? (Наталья Ветрова.)

— Малпамтэ шорысь. Армия бере йырсиме лӧс-лӧс лэзи, лемлет буяй но, арганме кыскаса, тӧлэз ӵыжаны кутски. Воксё азгынмисько ни вал, ярам, удмурт кылъя дышетӥсе Зинаида Семёновна Ниязова огпол шуиз: тон мар-о, кема-а тазьы эрказъяськыны малпаськод? Удмурт театр егитъёсты артистэ дышетскыны келя, давай, ӝог мын.

Мон нырысь куаляк луи — кыӵе артист? Мон огшоры арган кыскась гинэ. Но дышетӥсь ведь пӧяськыны уг быгаты, иське, эскероно. Мынӥ Уфаысь искусствоосъя институтэ. Соку ик 2-тӥ курсэ кутӥзы. Вот озьы ик улонэ берытскиз. Тау дышетӥселы.

— Юрттэ-а артист луэмды огшоры улонын? (Ангелина Воробьёва, Сьӧлта ёрос.)

— Люкетэ! Совето вакытъёсы черодын ӵем сылоно луылэ вал ук, вот сылӥсько озьы одӥг пол сурлы но шыпыртэмез кылӥсько: ма, со «Ой, шудо егит дыр», лэся, ук? (Сыӵе тодмо кырӟанэ вал 90-тӥ аръёсы.) Урдсӥнь-урдсӥнь черодысь потыса кошки, возьдаськыса кулӥсько вал. Юмоке сюрыны кема ик ӧвӧл.

Артистлы туж секыт «куэз» шуак вошъяны — рольысь потыны. Огзэ спектаклез шудӥськод но мукетыз сярысь малпаськод ни, ялан текстэз дышетӥськод, образ утчаськод. Куддыр часэн-часэн жӧлмаса тэк кыллиськод — нош йыр ялан ужа.

— Гуртысьтыды кыӵе адямиосын данъяськиськоды? (Николай Емельянов, Можга ёрос, Пычас гурт.)

— Тӥ малпаськоды, дыр, кыӵе ке кизилиосты верало. Нош мон понна тужгес дано огшоры гуртоосы: механизаторъёс Василий Дородов, Пётр Ряпалов, инженер Александр Вотяков. Соос сомында ар ӵоже музъем вылын ужало, кӧня пайда вайизы ни кунмылы. Жаль, сое туала вакытэ туж ик уг дунъяло.

— Творчествояды кинлэсь адӟем кариськоды? Улонын малы вожъяськиськоды? (Любовь Михайлова, Ижкар.)

— Пинал дырысеным кельше Андрей Макаревич кырӟась. Озьы ик сюлэмыя «Любэ». Вожъяськисько трос кылъёсты тодӥсьёслы, усто вераськыны быгатӥсьёслы.

— Егит дыръяды тӥ ужаллям педагог луыса но. Дышетскисьёсты пӧлысь кудӥз ке мынӥз-а тӥляд пытьыдыя? (Эльвира Симакова, Ижкар.)

— Бен, вал сыӵе учыр, «Спутник» клубын театральной студия нуи, но малы ке ӧй быгаты, дыр, пиналъёсты гочатыны — артист луэмъёсты уг тодӥськы.

Г. Бекманов

— Шуо, артист кизилиозь будэ режиссёрлы луыса. Тӥ шедьтӥды-а асьтэлэсь режиссёрдэс? (Любовь Михайлова, Ижкар.)

— Бен, мыным та ласянь удалтӥз, шуыны луоз. Со — институтысь педагогмы Александр Корякин. Собере кема аръёс ӵоже мон зэмос режиссёръёсты ӧй пумиталля. Но али шумпоттэ Алексей Ложкин. Со мынэсьтым чараклы егит, но сцена вылын ог-огместы туж капчиен валаськом.

— Берло аръёсы тӥ сцена вылэ ӵем потаськоды егит артисткаен Наталья Бурановаен. Олокыӵе но вераськонъёс ветло… (Анна Перевозчикова, Ижкар.)

— Остэ быри, ма, ми Москваын ӧвӧл ук воксё озьы шузимыны! Мон зэмзэ но туж синмаськемын Наташалы: со быгатӥсь актриса, ми соин ог-огмес, кыл вератэк, валаськом. Со чебер, сое яратэ учкись, нош мон кескич — тодӥсько, кинэн сцена вылэ потаны (серекъя). Но Натӥе бызиз ай тани гужем, табере шутэтскоз, дыр, кӧня ке…

— Малы ке театрысь чик адӟыны уг луы ни Валентина Бекмановаез. (Анна Перевозчикова, Ижкар.)

— Валентина театрын уг ужа ни, со тырше Октябрьский посёлокысь клубын. Но со сярысь умойгес луоз юаськыны аслэсьтыз, милям улонмы нимазъяськиз.

— Матысь тодмое туж синмаськемын тӥледлы. Солы пичи ке но оскон сётэмды луэ-а? Кыӵе нылкышноос кельшо тӥледлы? (Вера Бикузина, Ижкар.)

Нылкышноослэсь уг пегаськы, мед тодматскоз. Ваньмыз кельшо.

— Оскиськоды-а тӥ Инмарлы? (Любовь Михайлова, Ижкар.)

— Оскисько. Но нокызьы но уг валаськы, малы одӥгезлэн улонэз шудо-буро, кӧё-вӧё, мукетызлэн — кайгуо. Ярам, мон ӧжыт ӧй улы ни, олокыӵе но сьӧлыкъёсы люкаськемын, дыр, но маин янгыш пиналъёс? Малы со мынэсьтым пиме талаз? Дыр эмъя, шуо. Номыр уг эмъя — дыр но, мукетыз пинал но. Бадӟымзэ ыштэммы бере вордӥськиз на покчиез, нылмы кузьмаз кыкто внукъёс, мон соосты яратӥсько, но кайгу нокызьы уг вуны… Мон урод атай вал: тырмыт дыр ӧй висъя, ӧй эркия. Зэмзэ ке, мон али но уг тодӥськы, кыӵе луыны кулэ ӟеч атай — аслам ӧй вал бере…

— 60 арескын данакез воргоронъёс пенсие кошко ни. Тӥ арлыддэс шӧдӥськоды-а? (Любовь Михайлова, Ижкар.)

— Ма, со паспортъя ук озьы. Уг, аслым чик но арлыдо уг потӥськы, весь ужаме, весь яратэме потэ. Туж оскисько, монэ театрысь уз уллялэ шуыса. Мон отын улӥсько, шуыны луоз. Уже 7 часын ӵукна лыктӥсько ни, уж дурам лобыса мынӥсько. Паймисько, театрын ужам муртъёс бӧрысь премьераосы гинэ но уг ветло ке… Огласянь, бен, кышкасько, куке но мон но сцена вылэ потыны уг быгаты ни шуыса, но соку коть дворнике мед кельтысалзы, мед гинэ лэзьысалзы нуналлы быдэ театре ветлыны. Сотэк мон соку ик быро.

Калык интервью ялыкумы, сӥзим вал, Геннадий Иванович солы кельшем юан сётӥсез кузьымен шумпоттоз шуыса. Озьыен, 19-тӥ шуркынмонэ солэн юбилей ӝытаз мыноз Ижкарысь Любовь Михайлова.

Удмурт Дунне
By Удмурт Дунне Ноябрь 20, 2017 14:02