Егит усточиос

Удмурт Дунне
By Удмурт Дунне Ноябрь 15, 2017 15:45

Вормисьёсты ӟечкыла Ю. Толкач

13-тӥ шуркынмонэ Удмурт кун филармониын ортчиз егит усточиослэн «Воткинск — П. Чайковскийлэн дорез» 2-тӥ фестиваль-конкурссылы йылпумъян. Радъямын вал выставка — асьсэ ужъёссэс возьматӥзы пинал суредасьёс.

Вожвылъяськонэ пыриськизы Москва но Пермь улосъёсысь, Татарстанысь но Удмуртиысь 10-ысен 20 аресозь 210 пиналъёс. Соослэсь ужъёссэс эскеризы тодмо дышетӥсьёс: Москва консерваториысь Александр Тростянский, Айман Баймулдин; Казань косерваториысь Игорь Синекопов, Ижкарысь кырӟась Татьяна Силаева но крезьгурчи Юрий Толкач. Удмуртиысь калык суредась Пётр Ёлкин дунъяз пинал художникъёслэсь ужъёссэс.

Гала-концертэз усьтӥз культурая но туризмъя министр Владимир Соловьёв:

— Тӥляд сюресты одӥг — ӟеч музыкантъёс луыны. Эн азьтэмъяське, тыршелэ, угось азинлыко луэмлэн 90 процентэз потэ тыршем бордысь. Бадӟым тау нылпиослэн дышетӥсьёссылы. Шонер верало: нылпи — со быдэс шаер, аслаз кылыныз но аспӧртэмлыкеныз.

— Шумпотӥсько, ужрадын председатель луыны куризы, — шуиз Удмуртиысь калык суредась Пётр Ёлкин. — Мон туж гажасько Пётр Чайковскийлэсь творчествозэ. Озьы ик тодӥсько, Пётр Ильич котькыӵе карын дыр шедьтылӥз выставкаосты учкыны, со туж яратэ вал суредъёсты. Соин ик егит суредасьёслэсь конкурссэс музыкантъёслэн вожвылъяськонэнызы огазеянэз умой малпанэн лыдъясько.

Фестиваль-конкурс ортчиз 5 номинацияя. Фортепианоен шудӥсьёс пӧлын вормисе потӥзы асьме пиналъёс: Глазовысь Артём Михалев, Ижкарысь Виктория Григорьева но Фёдор Мерзляков; си (струнный) инструментъёсын шудӥсьёс пӧлын: Ижкарысь Девора Асанова, Илона Чиркова, Наталия Иванова но мукетъёс; пеллян инструментъёсын: Ижкарысь Иоанн Асанов, Лев Волков, Никита Мокин но мукетъёс; кырӟасьёс пӧлын: Кезысь Анастасия Дементьева, Ижкарысь Анна Александрова, Дэриысь Лидия Саламатова, пинал крезьгурчиос пӧлын: Сюмсиысь Дмитрий Останин. Гран-при сётэмын Москваысь Анастасия Зверевалы. Вормисьёсты данъязы дипломъёсын но кузьымъёсын.

Гала-концерт сяна, ортчизы котырес ӝӧк сьӧрын лэчыт ужпумъёс пумысен кенешонъёс, лулчеберет но искусство удысысь тодмо профессоръёс но дышетӥсьёс радъязы мастер-классъёс.
Конкурс радъяське 2 арлы огпол. Валтӥсь малпанэз: егит усточиосты классической крезьгуръёс вылын будэтон.

Любовь Михайлова
Туспуктэм: minkultura.udmurt.ru

Удмурт Дунне
By Удмурт Дунне Ноябрь 15, 2017 15:45