Дэри ёросысь «Удмурт Кенешлэн» ёзэз Э. Батуевлэн премиеныз пусйиз Н. Мерзляковез

Удмурт Дунне
By Удмурт Дунне Ноябрь 8, 2017 11:24

Дэри ёросысь Якшур муниципал кылдытэтлэн йырыз Николай Мерзляков огдышем кивалтӥсьёслэсь висъяське. Гурт сюлмаськонъёсты сэрттэм сяна, со кылбуръёс гожъя, ансамбльын кырӟа, книгаос поттэ, удмурт кылэз вӧлмытон сярысь сюлмаське. Эшшо Дано донор луэ. Та нуналъёсы «Удмурт Кенеш» огазеяськонлэн Дэри ёросысь ёзэз сое Э. Батуев нимо премиен пусйиз.

Якшур муниципал кылдытэтлэн йырыз Николай Мерзляков

— Николай Николаевич, кызьы малпаськоды, мар понна тӥледыз сыӵе дунъязы?

— Удмурт кылэз азинтыны тыршеме понна, дыр. Якшур муниципал кылдытэтэн кивалтыны кутскеме бере малпаськыны кутски нылпи садъёсын, школаосын удмурт кылэз дышетон сярысь. Сюлэм шуг: берло аръёссэ Дэри ёрос зол ӟучоме, тужгес но — школаос. «Удмурт Кенешлэн» ёросысь ёзэныз кивалтӥсь Лидия Биянова тырше ик, но одӥг адямилэн кужымез тырмоз шат? Соин ик юрттыны тыршиськом. Тани Дэри ёрос Кенешысь депутатъёсты басьтоно ке, пӧлазы удмуртъёс туж ӧжыт. Соин ик куддыръя кужымзы уг тырмы асьсэ малпанъёссэс улонэ пыӵатыны. Кылсярысь, туэ Дэри ёрос 80 аръем юбилейзэ пусъе. Солы сӥзьыса, депутатъёс нимысьтыз пус юнмато. Со пус вылын ёрос ӟуч сямен гинэ гожтэмын. Мон депутат ӧвӧл ке но, сюлмы ӧз чида, шуисько: ма, кызьы озьы луоз? Мыным дурбасьтӥз Василий Ложкин депутат. Но мылкыдмы озьы ик пыӵатэк кыльысал, дыр, ёросамы ик вордӥськем калык писатель Вячеслав Ар-Серги ӧй ке юрттысал. Со удмурт но ӟуч газетъёсамы, ёрослэн удмурт нимызлы дурбасьтыса, статьяос гожтӥз. Озьы утьыны луиз Дэрилэсь нимзэ. Та одӥгез пичильтык уж гинэ, но мон сое бадӟым вормонэн лыдъясько.

Монэ ӵемысь ӧтчало нылпи садэ. Котькуд ветлэмам нылпиослы удмурт книгаос кузьманы тыршисько, азьланяз анай кылыныды но лыдӟиське, шуисько. Нош нырысьсэ школае мынӥсьёслы кузьмасько «Удмуртия» издательствоын поттэм удмурт-ӟуч-англи кыллюкамез. Шуисько, отчы пырем 600 удмурт кылэз ке но, школадэс быдтытозь, тодыны тырше вал.

— Тӥляд быдэс улонды Якшур гуртэн герӟаськемын. Но, кылэме вань, ас вакытаз Якшурысь колхозэ тӥледыз, коньдон тырыса, вайиллям…

— О-о, вал сыӵе учыр. Али серекъясько ни: монэ 10 сюрс манетэн басьтӥзы. Но ваньзэ радызъя верало ай. Ачим мон Дэри ёросысь ик Шайтангуртын вордӥськемын. Семьяямы 4 пиос вал. Школаме йылпумъяй но, озьы тупаз: одӥгез бадӟым братэ больницае шедиз, мукетыз — армиын, нош мон бӧрсьыез — пичигес ай. Гуртын уж трос: турын дасяно, пудо утялтоно. Бадӟым люкетэз со вылам усиз. Гужем пумын анае шуэ ни: кытчы ке дышетскыны пыр вал… Мынӥ Иже выль кенакмы доры. Дэмлаз гурт хозяйствоя институтын дышетскыны. Озьы колхозмылэсь направление кури но пыри. Кыкетӥ курсысен, 1986-тӥ арын, ваньмес армие басьтӥзы. 3 ар зарезьын пограничной корабльын ортчиз. Бертӥ гинэ, Якшурысь нылашез кышно вайи. Нош солы милям гуртмы сюлмызъя ӧз луы, дораз бертӥз. Ма кароно? Якшурысь «Путь Ильича» колхозын валтӥсь бухгалтер луыса апае ужа вал. Ӵапак со апае доры куное мынӥмы. Отысен монэ председательзы Валерьян Арсентьевич Никитин синйылтӥз. Ми, пе, агрономлы туж ёрмиськом, ойдо дорамы. Шуисько: направлениея дышетскисько, аслам колхозам ик бертыны кулэ. Ничё, шуэ, вераськом. Шайтангуртысьтымы колхоз тӧро шуэм: 2 ар ӵоже дышетэм понна тырем коньдонэз берыктӥды ке, лэзё. Валерьян Арсентьевич 10 сюрс манет тыриз. Тӥни озьы мон «Путь Ильичае» шеди. 2 толэзь ужаса вуттӥ но, валтӥсь агрономе пуктӥзы ни.

— Асьтэдыз шедьтӥды кадь потӥз-а?

— Агрономлэн ужез мыным туж кельше вал. Со картаен шудэм кадь. Ваньзэ, азьвыл ик умой-умой малпаса, лэсьтоно, выль техникаез, технологиосты кутыны тыршоно, но ноку уд тоды: мар зэмзэ но луоз, кыӵе урожай тонэ вите. Одӥгез урод: гуртын, ялан ужаса, гужемез уд адӟиськы. Вис шеде толалтэ гинэ.

Агрономын мон 6 ар ӵоже ужай. Собере гуртоос понна туж секыт вакыт кутскиз, мон но нимаз ужбергатонэ кошки. Ог 10 ар ӵоже нимаз ужаса, нош ик колхозэ берытски, огдыре ик профкомен кивалтӥ, интыысь кенешамы депутат вал. Калыклэн кулэяськонъёсыз пумысен гурт но ёрос кивалтӥсьёсын ваче вуылӥ. Куд-огез шуылӥз: тыныд, пе, тазьы ветлытозь, аслыд кивалтон борды кутсконо ни.

— Озьы тӥ Якшур муниципал кылдытэтэн кивалтыны малпады?

— Туж тунсыко пӧрмиз. Кивалтӥсь луон понна 2 валтӥсь кандидат вал. Но кинэ быръёно — интыысь депутатъёс но ёрос йыр чаклало. Мон тодам вайи тятяелэсь верамъёссэ: пумитало дӥсья, келяло визья. Мынӥ базаре, берпуметӥ коньдонэным басьтӥ йӧно костюм, галстук. Малпай, дӥсе-тусы шоры учкыса, 50 процентэзлэн мылкыдзы мон понна мед луоз ни. Эшшо 50 процентсэ визьмын берыктоно. Кабинетазы оген-оген ӧтчазы. Кельшиськем, лэся…

— Муниципал кылдытэтэн кивалтӥськоды ке но, тӥледыз ӵемысь сцена вылын кырӟасен адӟоно. Калык та шоры кызьы учке?

— Капчиен. Кырӟанэн, культураен ӵош вамышъяськод ке, улыны но капчигес ук.

Валтӥсь агроном луыса ужакум, артистъёс но писательёс мыным бадӟым инмаръёс кадь потылӥзы ай. Огпол ёросамы вордӥськем писателен Вячеслав Ар-Сергиен тодматӥзы. Пумен эшъяським. Кылбуръёсме солы возьматӥ. Со, кӧня ке тупатъяса, «Удмурт дунне» газетын поттӥз.

Бӧрысь тодматски Николай Шабалин, Алексей Проскурин композиторъёсын. Соос мыным визь-кенешен юрттылӥзы. Тӥни озьы пумен крезьгур но, кылбур но гожъяны кутски. «Валентина» кырӟанме Геннадий Бекманов кырӟа, «Удмурт пи» кырӟанме — Наталья Буранова.

Кылбуръёсы туж секытэн вордӥсько. Тани нылылы сӥзем кырӟанлэсь оглюкетсэ вазен ик гожтӥ ни вал. Нош пумзэ — ог 3 ар ортчыса гинэ. Аслам крезьгуръя дышетскеме ӧвӧл бере, малпам гурме нырысь диктофонэ гожтӥсько, собере Вавож ёросысь эшелы, Владимир Коротаев композиторлы, келясько. Со нотаос вылэ гожъя ни.

— Тӥляд муниципал кылдытэтады 7 гурт пыре. Коньдон ласянь шугъяськонъёс тырмыт, дыр. Сыӵе дыръя кивалтӥсьёс ӵемысь шыръяло культура вылын…

— Милям но сыӵе дыръёс вал: клублэсь укнооссэ кирпичен ворсаллязы, мар со культуралы сомында коньдон быдтод шуылӥзы. Но кызьы культуратэк, кырӟан-веранъёстэк, ансамбльёстэк улод? Кырӟан вордӥськиз, дыр, адямилэсь но вазьгес. Инкуазьын котькытын крезьгур улэ ук! Зэм, туала вакытэ бадӟым клубез возьыны секыт — туж дуно усе. Но со аслэсьтыз дунзэ берыктэ. Культурая юрт, кырӟан-веран, книга лыдӟон но огъя культура адямиослы юрттэ шуг-секытъёсты вормыны, пайдаё шутэтскыны, мылкыдзэс буйгатыны-бурдъяны.

Мынам анае но туж яратэ лыдӟиськыны, быдэс улонзэ выж миськисьын ужаз ке но. Мон солы ӵемысь книга вайылӥсько. Кырӟаны быгатэме но анайлэсь пыӵаз, дыр. Пичи дыръямы, гур дорын пӧракуз, ми сое ӵемысь кырӟаны куриськом вал.

— Удмуртлык борды биниськем адямилэсь нокызьы юатэк уг луы: нылпиосты анай кылзэс тодо-а?

— Тодо но, верасько но. Пиналъёсы кыкназы но офицеръёс, пограничникъёс. Но нылы понна кӧня сюлмаськоно луиз! Чечняен ожмаськонъёс дыръя со школаын дышетске вал ай, оломар мылкыдыз бурдъяськиз ожгарчи луыны, 9-тӥ классэ Ижысь кадет школае кошконо кариськиз. Туж-туж куриськемысьтыз, лэзи. Малпай: быдэ вуоз но буйгалоз ай. Но нылы ӧз буйга. Школазэ йылпумъяз но шуэ: Москвае мыно военное дышетскыны. Вуим Москвае, нош отын дышетскыны, пе, кутомы быдэс Россиысь 25 нылмуртэ гинэ.

Нырысь кык арзэ туж секыт вал, туж ёрмим коньдонлы. Но али мон пичи но уг жаляськы, нылы кыдёкын, Кавказын, улэ ке но. Пыд вылаз йыг-йыг султӥз, ужез но туж яра. Зэм, одӥг гинэ пиме бордамгес возем потэ вал. Но со но военнойлэсь сюрессэ бырйиз но дышетскиз Санкт-Петербургын.

Али улонме учкисько ке — ма но ӧй вал! Нюкъёс-гопъёс, усёнъёс-ӝутсконъёс… Куд-дыръя, борддорысь борддоре кӧжы пазям кадь, одӥг ужпумез ик сомында быдэстыны тыршоно, нош пайдаез уг адӟиськы. Соку но буйгано ӧвӧл. Изэз ву пася шуэм сямен, малпам ужез но вормыны луоз, ялан тыршыса гинэ.

Елена Миннигараева

Туспуктӥз Елена Миннигараева

Удмурт Дунне
By Удмурт Дунне Ноябрь 8, 2017 11:24