Чеберайёс но Батыръёс Иже люкаськылӥзы

Удмурт Дунне
By Удмурт Дунне Ноябрь 10, 2017 16:12

10-тӥ шуркынмонэ Ижысь Эшъяськон юрт нылпиосын пачылаз. Татчы фестивале люкаськизы шаерысьтымы удмурт кылэз тодӥсь но валась тужгес мусоосыз Чеберайёс но кужмоосыз Батыръёс.

«Удмурт нылкышно кенеш» огазеяськон сюлмаськемен, туэ фестиваль 6-тӥзэ радъяськиз. Пичи кизилиосты нырысь бырйизы ёросъёсын. Озьы 19 районысь но 3 городысь удмурт кылэз дышетӥсь нылпи садъёс пӧлын аспӧртэм вожвылъяськон-фестиваль радъямын вал. Отын котькудӥзлэсь удмурт кылбур вераны, кырӟаны, эктыны быгатэмзэ гинэ ӧз учке. Удмурт дӥсьсэс но санэ басьтӥзы, буёлъёсты, лыдпусъёсты тодэмзэс эскеризы. Нылъёслэсь чаклазы йырси пуныны пӧрмытэмзэс, пиослэсь — кужмо луэмзэс. Тужгес устооссэ Иже вуттӥзы. Татын котькудӥз пичи номер возьматӥз. Нылпиослэн ымныръёсазы пальпотон пиштӥз. Нош «Пичи Чеберай» но «Удмурт Батыр» лентаос гадязы ошыкузы, кузьымъёсын но дипломъёсын пусйыкузы, удмурт кылэн эшъяськеменызы уката золгес данъяськыны кутскизы кадь.

— Будӥ ке, пожарной луо шуисько вал, табере удмурт луэме потэ, — ужрад бере вераз Ижысь Илья Морозов.

«Удмурт нылкышно кенешен» кивалтӥсь Надежда Степанова верамъя, фестивале арысь аре тросгес но тросгес удмурт пиналъёс пырисько, анай-атайёслэн но ог-огзыя нылпиоссэс удмурт будэтэмзы потыны кутске.

Елена Сараматова
Туспуктэм: vk.com

Удмурт Дунне
By Удмурт Дунне Ноябрь 10, 2017 16:12