Алексей Сидоров: Улон ӟечоме ке, йыруж синэ

Удмурт Дунне
By Удмурт Дунне Ноябрь 20, 2017 15:01

Алексей Сидоров — полицилэн Ижысь Октябрь ёросысь ёзэзлэн кивалтӥсезлэн воштӥсез.

100 ар талэсь азьло 10-тӥ ноябре Совето Союзын кылдӥз милиция. Туннэ нуналозь со трос воштӥськонъёс пыр потӥз. Но валтӥсез ужпум — калыклэсь улонзэ сак утён — ӧз воштӥськы.

20 арлэсь ятыр ини пельпум вылаз погонъёс нуллэ Пичи Пурга ёросысь Брангуртын вордӥськем Алексей Сидоров — полицилэн Ижысь Октябрь ёросысь ёзэзлэн кивалтӥсезлэн воштӥсез. Подполковник. Уйпал Кавказысь югдурез утьылэмын. Ӟеч тыршемез трос медальёсын пусъемын. Туэ Алексей Николаевич пыртэмын Иж городлэн Данъян пул вылаз.

— Алексей Николаевич, тӥ Ижысь гурт удысъя академиез йылпумъяды, нош улондэс чылкак мукет удысэн — полициен — герӟады. Ма муген?

— Пичи дыръям ялан шуылӥ: улонме одно ик авиациен герӟало. Школаме быдтытозям, авиамоделированиея кружоке ветлӥ. Дышетскон вискам ваньмон дыры кыле гинэ — кружоке лобӟыса мынӥсько вал ини, урам кузя ужтэк солань-талань чик ӧй ветлылы. Нырысь планеръёс лэсьялляй, берлогес самолётъёс борды басьтӥськи. Авиацилы сӥзем книгаосты-журналъёсты трос лыдӟылӥ. Со книгаосы но, ЯК-42 самолётэ но, 2 моторлэсь турболётэ но туннэ но школамылэн музеяз утисько.

Аръёс ортчемъя шӧдӥ: мыным лётчик луыны уз кылды. Соослы угось тазалык ласянь бадӟым куронъёс пуктэмын. Самолётлэсь пушсэ ӟеч тодылӥ бере, аслым шуылӥ: школа бере одно ик техникаен герӟаськем вузэ пыро!

Но школа йылаз-пумаз вуиз но, ыштӥськи: кытчы дышетскыны вамыштоно? Соку 4 ареслы бадӟымгес агае Ижысь гурт удысъя академиын тодон-валанзэ будэтэ вал. Анае отчы вамыштыны ӵектӥз. Но мон пумит луи, нокыӵе вылӥ образование кулэ ӧвӧл, ПТУ-ын дышетско но армие кошко, шуылӥ. Озьы Ижысь Свердлов ульчаысь ПТУ-е — азьвыл сое 8-тӥ «фазанка» нималлязы — куриськон гожтӥ, наладчике дышетсконо кариськи. Та сярысь тодӥзы заводын ужась ӵыжы-выжыосмы. Кутскизы ук мыным визь тырыны: заводын тыршыса, кыдёке уд вуы, нырысь вылӥ образование басьтоно! Верамзы йырам пыриз — ПТУ-ысь заявлениме кутыса, гурт удысъя академие нуи.

Т-62 танк азьын.

Агае сямен, инженер-электрикъёслэн факультетазы пыри. Но агаелы та удыс Инмарен сётэмын ке вылэм, мынам сюлэмам со чик ӧз биниськы. 3-тӥ курсэ вуыса, воксё акыльтӥ — 3 кузя эшъёсыным академической отпуске кошкимы. Та бӧрсьы мон Ижысь механикая заводэ ужаны интыяськи. 2 толэзь но тырши-а, ӧй-а — армие басьтӥзы. Службае ортчиз Калуга улосысь Козельск городысь военной частьын. Татын но техника котырысь ӧй кошкылы. Т-62 танклэн инъетэз вылын лэсьтэм артиллерийской тягачен нюлэс пушкытӥ сюрес вӧлдӥськомы, солдатъёслы ву, кӧттырон нуллӥськомы вал. 2 ар куспын старшой сержантозь будӥ. Будӥз визьмы но, воштӥськиз улон шоры учконэ но — службае бере гурт удысъя академиез йылпумъяй.

Дышетскон вискам академиысь ик экономикая факультетысь студенткаен, Брангуртысьтымы нылашен, семья кылдытӥмы. Улӥмы общежитиын. Отысь медаз уллялэ шуыса, Югдурез утёнъя министерствое дыртӥ. Угось тодӥсько вал, МВД-ын ужаськод ке, огъяулонниысь комнатаез бушатыны уг косо шуыса. Электрикъёслы сыӵе луонлык ӧз сётылэ.

Анаеныз-атаеныз.

Нырысь-валысь ГАИ-е йыгаськи. Ӧз кутэ. Кадръёсъя отделын меӵкытӥзы: 170 сантиметрлэсь лапег воргоронъёсты ум бась-тӥське. Мынэ, пе, ёросъёсысь отделъёсы. Верамын — лэсьтэмын. Пыри Ижысь Октябрь ёрослэн ёзаз. Татын но буш интыосмы ӧвӧл шуизы. Но участковой луыса ужаны быгатоды, пе. Ӵапак соку кабинетэ пыриз участковойёслэн кивалтӥсьсы (туннэ общественной порядокез утёнъя полицилэн кивалтћсезлэн воштӥсез — авт.) Сергей Козлов. Мыным ӝот-ӝот вазиз: мон тӥледыз бордам ужаны кутӥсько! Озьы 1996-тӥ арын 14-тӥ октябре милициысь стажёр луи. Ижысь Майской ульчаысь 12 номеро опорной пунктын 8 ар участковой луыса ужай.

Тодӥськоды-а?

  • Нуналлы быдэ полициысь дежурной часте калыклэсь 3 сюрслэсь ятыр вазиськонъёс вуо.

  • Ог 20 процентэз гинэ жингыртонъёс герӟаськемын зэмос йыружъёсын, законэз тӥян учыръёсын.

  • Дежурной частьысь 1 сотрудниклы уй-нунал ӵоже 300-лэсь ятыр вазиськонъёсты сэрттоно-пертчоно луэ.

— Со вакытэ ик, Ижысь сяна, Грозный городысь но югдурез утёно луиды. Кыӵеен тодады кылиз командировкады?

— 2001-тӥ арын Чечнялэн Старопромысловской ёросаз 3 толэзьлы келязы. Югдур секыт вал, котькуд нунал я отын, я татын пуштылонъёс шуккиськылӥзы. Боевикъёсын сэрен армиысь трос солдатъёс быризы. Ми но асьме ужасьёсмес утьыны ӧм быгатэ…

Блокпостъёс пыр машинаос шаплы медаз ширтэ шуыса, отчы змеевикъёс пуктылӥськомы вал. 20-тӥ июне Юра Анисимовмы но мукет пиосъёсмы ӵапак соосты пуктылыны потыны кулэ вал. Азьвыл соос ялан милям ужан машинаенымы ворттылӥзы, чехъёс — чеченъёсты куспамы озьы шуылӥмы — тодмаллязы сое, ӧз исаллялэ. Нош 20-тӥ июне машинамы тӥяськиз. Пиосмы амалтэк пуксизы чеченъёслэн чечен флаген чебермам «корт валазы». …Ӧз берытске ни. Боевикъёс сое пуштытӥзы. Чечен водитель но Юра Анисимов интыязы ик быризы, Эгра ёросысь Юра Кропотинлэн пыдъёсыз зол вӧсь луизы, инвалид кылиз.

Армиысь эшъёсыныз.

Та учыр бере котькуд ар 20-тӥ июне 12 часын нуназе ӵош ужась эшъёсыным вуылӥськомы Хохрякиысь шайвылэ, тодамы вайиськомы Юраез, Чечняын ортчытэм толэзьёсмес… Шумпотӥсько, та нуналъёсы та шайвылын сӥё-дано усьтэмын вал гранитлэсь дасям синпелет. Отчы пыртэмын чечен, афган, Быдӟым ожъёсын, уж дурын бырем югдурез утисьёслэн нимтулъёссы.

— Полицейскойёс туж ӵем потало семья вискын кылдэм керетонъёсы. Соос ӵемысь пуромыло кудӟем йырын. Шӧмаськем муртэ зӥбломытон понна формаен воргоронлэн лулсэрыз но, мугорыз но юн луыны кулэ, дыр.

— Та шуг-секытэн республикаысьтымы вань ёросъёсысь отделъёс пумиськыло. Семья вискын керетонъёс, жугиськонъёс угось азьвыл но, али но уг бырыло. Кытын юон дыр — отын ик йыружъёс но. Но законэ воштонъёс пыртэмен, дебоширъёсын ужаны капчигес луиз. Азьвыл аръёсы кышномурт, жугиськись картэз вылэ ӝожтӥськыса, милицие вазиське ке, ми номыр карыны ӧм быгатылэ. Пиосмуртэз кыл вылын визьмаськомы но кошкиськомы. Та бӧрсьы со нош ик мыжыкъёсыныз шонаськыны кутске. Озьы кышномуртлы 2 полэс секыт луэ: тыш но сюре, штрафез но ачиз ик тыре.

Али югдур мукет. Воргорон огпол кизэ ӝутэ ке, административной кыл кутон улэ кыскиськомы. Кыкетӥ ползэ жугиськыны дӥсьтӥз — уголовной уж ӝутӥськомы. Та сяна, учётэ султытӥськомы, чакланы шуыса, дораз ӵем пыралляськомы. Куд-огъёссэ изоляторе интыяськомы. 15 нунал ужатыса, визьмасько ик — куддыр доразы ум поталляське ини.

Бадӟым юрттэт сётэ на милемлы шыпытлык сярысь закон. Соя уйин 23 часысен ӵукна 6 часозь аляктыны уг яра. Но ӵапак та вакытэ юр-яр карись семьяосы ӧтёнъёс йыло. Ӵемысь полицие вазиськыло бускельёссы. Со туж умой. Ӵапак та вазиськонъёс юртто кышкыт йыружъёсты азьлапал ик алыны. Угось юэм мурт, жугиськем сяна, ачиз ӵемысь умойтэм учыре шедьылэ.

Зэм, полицейскойёслы котькыӵе югдурын асьсэды киязы кутыны быгатоно, калыкен кусып тупатыны тыршоно. Лек адями вылад мыжыкъёсын пырыку, жоб кылъёсын кышкатыку, йырдэ кур карыку, котькуд верам кылыд, выросэд законлэсь ортчемын луыны кулэ ӧвӧл. Со понна полицейскойёслы психологъёсмы но юристъёсмы арнялы быдэ сямен дышетонъёс радъяло. Законъёс ӵем вошъяськыло. Соосты ми вить чиньымес кадь ӟеч тодыны кулэ. Туала арын огшоры калык но законъёсты усто вала ини.

Шаерысьтымы участковойёслэн конкурсазы вормисьёс но кивалтӥсьёс.

— Тӥ чакламъя, 20 ар куспын республикаысь Югдурез утёнъя министерство макем зол воштӥськиз? Следовательёс шуо: удыстылэн огез «висёнэз» — кузьым басьтон.

— Ужаны кутскыкум, МВД-лэн системаез чылкак мукет вал. Совето Союз куашказ. Удмуртиын гинэ ӧвӧл, быдэс странаын югдур кышкыт луиз. Ужаны нокытын. Инты шедьтӥськод ке но, уждунзэ уд адӟиськы. Та мугъёсын сэрен Россиын йыружъёс но, коррупция но ӝужаны ӧдъязы. Азьвыл Ижын 1 нунал куспын ульчаын 3-4 лушкаськон учыр луэ вал. Таоссэ тыро-пыдо эскерыса уд вуттӥськы, квартираосысь лушкаськисьёсты утчаны потӥськод ини. Уез-нуналэз валатэк ужаллямы. Мукетъёсызлы сямен ик, коньдон ӧз тыре милиционеръёслы но. Соин но, вылды, кузьым басьтылӥсьёс шедьыло вал.

Али югдур чылкак воштӥськемын. Уждун тыро, улон инты басьтыны субсидия висъяло, санаторийёсын тазалыкез тупатыны луонлык сёто — тыршыны мылкыдыд гинэ мед луоз. Тужгес но али — берло 3 арез чаклано ке, йыружъёслэн лыдзы трослы усемын. Ӧжытгес пусйылӥськомы ини урамын, калыко интыосын кудӟем йырын законэз тӥян учыръёсты. Азьвыл трос пол кыл кутон улэ сюрылэм муртъёс но асьсэды шыпытгес возьыны ӧдъязы. Талэн мугъёсыз герӟаськемын улонмылэн ӟечлыкеныз. Улон умоямъя калык рос-просгес луыны тырше. Милям но ужан амалъёсмы выльдӥсько. Удысамы туала технологиос пыӵало. Соос юртто йыртэмасез но кырмыны, пӧлысьтымы кузьым басьтӥсез но шараяны.

— Октябрь ёрос — Иж городлэн сюлэмыз, шуо. Таин валче татын, шоркарысь мукет районъёсын ӵошатыса, югдур огыр-бугыргес, дыр.

— Огыр-бугыр соиз ласянь гинэ: татын ӵем ортчыло бадӟым ужрадъёс. Соин ик Октябрь ёросын калыкез кышкытлыклэсь утёнъя ёзъёс тужгес трос ужало. Ма, улӥсез но татын лачак — туннэ нуналлы пусйиськемын 136 сюрс адями. Та лыдпус азьланяз, оло, будоз на, угось лэсьтӥськон зол мынэ. Таин валче участковойёсмылэсь лыдзэс йылтоно вылэм. Туннэ соос отделамы 25 сяна ӧвӧл. Ужзы — пумтэм-йылтэм: быдэ вуымтэосты, пытсэт сьӧрысь потэмъёсты, учётын сылӥсьёсты эскероно, коркаосысь старшийёсын пумиськылоно, йыружъёсъя свидетельёсты утчано, рейдъёсы потано…

Ачим но городысь одӥг бадӟым ужрадэз но уг кельтӥськы. Митинг-а, концерт-а — ваньзэ чаклано: калык уг тулкымъяськы-а, ужасьёсмы тырмыт-а, кыӵе интые ватсаса наряд пуктоно, машинаосмы тӥяськемын ӧвӧл-а… Ужасьёсылэсь вылтуссэс гинэ но эскерисько. Кисыязы, блокнот, ручка, жетон сяна, мед луозы нырӵушет, йырсын. Пыдкук чиляны кулэ. Кизилиос, шевронъёс ваньмыз интыязы луыны кулэ. Соосты, линейкаен лыдъяса, форма борды ӝик-ӝик вурылоно. Та ласянь кивалтӥсьмы Дмитрий Бабаев юнэсь куронъёс пуктэ. Со чурыт сямзэ ӧй возьматысал ке, отделамы мукет ёросъёсын выллем югдур луысал, дыр: огез ужась кошке, мукетыз вуэ. Милям коллективамы ужало ас удысазы кема тыршем адямиос.

Иж городлэн Данъян пул вылаз пыртыку.

— Формадэс уд куялляське — 8 часын ӵукна я ӝыт тӥ уж дурын, шутэтскон нуналъёсы тӥ нош отделын. Семьяды та шоры кызьы учке? Асьтэлы шутэтскыны маза чик уд сётӥське шат?

— Семьяе таӵе улон радлыкелы дышиз ини. Тани-тани 50 аресэ тырмоз, но ужысьтым кошкеме уг поты, туннэ ик пенсие потыны быгатӥсько ке но. Шӧдӥсько: кужыме но, мылкыды но тырмыт на аслым кивоштӥсьёс будэтыны. Туала егитъёс визьмоесь но шаплыесь, но рос-прос югдурез утись луон понна та тырмыт ӧвӧл на.

Кык нылъёсы будо. Бадӟымез Ижысь медициная академиез йылпумъяз. Покчиез 7-тӥ классэ ветлэ. Мынам ужелы но формаелы воксё синмаськемын — следователь луо, шуэ. Талы али ик дасяське ини, ӟеч дышетскыны тырше.

Шутэтскон сярысь ке… Ку меда берпуметӥзэ гань-гань чорыганы, губияны шуд усиз вал ай? Брангуртысь коркаелэсь ог 150 метрлы палэнын тымет сылэ. Городысь 10-15 воргоронъёс отчы, машинае пуксьыса, чорыганы вуо. Нош мон потыны уг ваньмиськы. Огназ кылем анаелы юрттӥськытэк уг луы: мерттӥськоно, утялсконо, юртъерез тупатоно, пу дасяно… Городын дыръям одӥг-ог шутэтскыны вис сюрылэ ке, телевизор пыр авиацилы сӥзем документальной фильмъёсты, киноосты учкисько. Озьы мылкыды шуна, ужаны ӟигары потэ.

— Ужады юрттэ, дыр, удмурт кылын вольыт вераськыны быгатэмды но.

— Брангуртысь школаямы удмурт кылъя но литературая урокъёс мыно вал ке но, мон отын огпол но ӧй пукылы. Оло, соин: атае — удмурт, нош анае — бигер. Озьы ке но удмуртэз ӧй вунэты. Ӵош ужась эшъёсы куддыр паймыло: тӥ удмурт сямен но вераськыны быгатӥськоды?!

Алигес Иже Кирилл Патриарх вуылӥз. Со доры Брангуртысь песянайёсмы но лыктӥзы. Пӧлазы вал атаелэн сузэрез но — Галина Конева. Концерт йылпумъяськем бере песянайёс ульчае потӥзы. Монэ адӟыса, ӟыгыръяны кутскизы ук: ой, пе, формаен огпол но тонэ адӟеммы ӧй вал, кыӵе чебер адӟиськиськод! Зэм, пичи дыръям мон но формалы, погонъёслы синмаськемын вал — Галя апаелэн пиез соку милициын ужалляз. Оло, соин но улон монэ МВД-е вуттӥз. Та пумысен туннэ чик уг жаляськы.

Ольга Корепанова

Туспуктэмъёсыз геройлэн

Удмурт Дунне
By Удмурт Дунне Ноябрь 20, 2017 15:01