Адмилы но животлы кышкыт луись висён шараяськиз

Удмурт Дунне
By Удмурт Дунне Ноябрь 14, 2017 12:39

Ува ёросысь пудо эмъянъя станцие вазиськись шедиз: лапчиез (барсукез) кутэм, эскерон ортчытыны косэм. Озьы шараяськиз адямилы но животлы кышкыт луись трихинеллёз висён.

Пудо эмъянъя но диагностикая Элькун центрысь специалистъёс верамъя, Ува ёросысь кутэм лапчи пушкысь кышкыт нумыръёс шедьтэмын. Пӧйшур сутэмын. Трихинеллёзэз вӧлмыто на кырпарсь, гондыр. Зэм, со ӵемгес пумиське гидысь парсьёслэн мугоразы. Таос доры уго трихинелла комакъёс но шыръёс, сиён пыр вуыны быгатэ. Парсез нумыръёс тужгес ярато. Нурскетӥсьлэн быгытъёсыз соослы аляны тужгес ярало. Нумыръёслэн тэчкыоссы (личинка) но быгытъёсаз каръяськыны ярато, капсулаын кадь, парсь кулытозь но, улыны быгато. Таӵе дыръя соос гидысь вань животэз, адямиез черлатыны пӧрмыто.

Трихинеллёз висёнэз ӵем вӧлмыто парсьёс.

Нумыръёс трос люкаськыку, адями но, живот но ӝоканы кутске, паралич шукке.

Трихинелла нумыръёс куддыр синмын уг ик адӟисько — сокем пичиесь. Адямилэн тазалыкез юн ке, со висемзэ куддыр шӧдытэк ик улэ.

Чер кутскемлэн тодметъёсыз:

— кӧтэ йӧтэ;

— кӧт висе;

— сием потон мылкыд быре;

— ӧскем потэ.

Отӥяз адямилы эшшо но секытгес луэ. Ымнырыз, тужгес но синкабакъёсыз тӧрнало, быгытъёсыз висё, мугорыз лыдэ но ӟырдэктэ.

Куд-огез малпа: маке умойтэмзэ сии, ӝоген каньылгес луоз. Соин ик больницае но уг вазиськы. Адямилы, арня ортчыса, зэмен ик, капчигес луэ. Личинкаос уго, вирысь кошкыса, быгытъёсы каръясько, отчы гу выллем яра кылдыто. Ӵемысь каръясько соос урдлы, чырты но син котыръёсы. Адямилэн сюлэмыз шуген ужаны кутске, нервной системаез тӥяське.

Соин ик, висьыны кутскыку, ӝегатскытэк эмъясь доры вазиськоно. Трихинеллёзэз эмъяны луэ. Куддыр, сюлэ мумы нумыръёс кылемен, со висён выльысь берытске, но солэсь мозмытскыны луэ.

Пудо эмъянъя валтӥсь управлениысь специалист Вера Стерхова верамъя, черлам животэз, эмъяса курадӟем интые, умойгес луоз сутыса. Гидэз рос-прос тазатоно, нумыръёс аляны медаз быгатэ ни шуыса.

Висён палаське урод пӧзьтэм но пыжем сӥль, колбаса пыр. Чылкыт кӧйын тэчкыос уг сюрыло. Но бордаз сӥльыз кылемын ке, котькӧня сое ӵынаты, сылалты, со кышкыт луыны быгатэ.

Висёнлэсь утиськон вылысь сӥльлэсь сиёнъёсты шонер лэсьтоно. Соин ик тодады возе:

— гондыр, лапчи, нутрия, кырпарсь, парсь но мукет сӥльёсты одно ик кынтылоно;

— трихинеллаос мед кулозы шуыса, сиён пӧзьтыку, сӥль пушкын температураез 65 градуслэсь ичи медаз луы, пӧзьтэмъя лемлет интые буёлэз пурысь мед кылёз;

— умой луоз, сӥлез 2 но ӝыны час пӧзьтыса, сӥль юдэсъёс 8 сантиметрлэсь зӧкесь медаз луэ;

— шашлык котыкуды, уксус сярысь эн вунэтэ — со нумыръёсын нюръяськыны юрттэ;

— гидысь вань комакъёсты, шыръёсты быдтоно, через медаз вӧлмытэ шуыса;

— олокытысь олокинлэсь сӥльзэ эн басьялэ, уката ик — ульчаысь сэргын вуз карисьлэсь; сӥль бордын мед луоз эскеремез возьматӥсь клеймоез, бордаз — справка;

— кутэм пӧйшуръёсты одно ик эскерыны сётъяно, чылкыт шуыса тодэмды бере гинэ сиён лэсьтыны кутоно.

Елена Сараматова

Туспуктӥз А. Горбунов

Удмурт Дунне
By Удмурт Дунне Ноябрь 14, 2017 12:39