Сибирьысь сяська — Ханты-Мансийск

Удмурт Дунне
By Удмурт Дунне Ноябрь 1, 2017 16:24

Фин-угор калыкъёс дуннелэн пӧртэм сэрегъёсаз пазьгиськемын. Тужгес кезьыт палъёсын уло ханты, манси ӵыжы-выжыосмы. Милемлы шуд усиз 1 сюрс 440 иськеме, Ханты-Мансийске, вуылыны.

«Торум маа» музейын шашылэсь шобрет лэсьтыны дышето.

Поездын 2 уй но 1 нунал зуркаса, вазь ӵукна вуимы Пыть-Ях городэ. Кыре потӥм гинэ, синэз мальдытӥз тӧдьы-тӧдьы лымы. Зэмзэ но — уйпал! Ижкарын 5-10 градус шуныт — татын ӟар-ӟар кезьыт. Ханты-Мансийскозь эшшо 400 километр пала мыноно. Транспорт шедьтыны секыт вылымтэ, вокзалын ик сылӥсь автобус милемыз шумпотыса пуктӥз.

Автобус ӝог ширтэ. Сюрес вольыт, машинаос ӧжыт. Котыр лымы улысь мычиське гужам турын, шӧдћське, татын нюр интыос, одӥг-ог пумиськись писпуослэн мугоръёссы кырыжамын, уйпал тӧлъёс улын курадӟо, лэся. Тани-тани кытысь ке потозы кадь пужейёс, но одӥг улэп лул но уг адӟиськы. Сюреслэн кыкнапалтӥз ик кыстӥське нюлэс. Озьы шӧдтэк шорысь пыримы Ханты-Мансийске. Югралэн шоркарез сылэ вылэм тэль шорын.

Та город сярысь верало: Сибирьысь 7 вырйылъёс вылын усьтӥськем сяська, туж туала но чебер. Ваньмыз зэм, одӥг-ог вуж коркаос сюрыло ке но. Ханты-Мансийск шудон кадь адӟиське, ваньмыз сямен коркаос вылесь, одӥгез но мукетызлы уг кельшы. Шоканы но татын капчи. Оло городлэн нюлэс шоры интыяськеменыз, кедръёслы матын луэменыз, оло машина ӧжытэн…

Хантыослэн юртьерзы.

Тусмы огкадь

«Ханты-Ясанг» но «Луима серипос» газетъёсын ужась эшъёсмы милемыз Обско-угорской институтэ нуизы. Туэ институтлы 25 ар тырмиз, пе. Татын уйпал калыкъёслэсь историзэс, археологиез, кылзэс, литературазэс эскеро. Библиотекаязы 30 сюрслэсь трос книга утиське. Соосын тодматскыны вуыло тодосчиос, студентъёс. Татын ик кылдытэмын дышетонъя но наукая музей, люкамын тодмо ханты, манси тодосчиослэн ужъёссы, тӥрлыкъёссы. Институтын ик милемлы мадизы, кызьы вашкала хантыос но мансиос улӥзы, чорыгазы, пужей вордӥзы, нюрмульы бичазы, чорыгазы. Нялтас вераса, вашкала дыръёсы соос сӥль но чорыг гинэ сиыса улӥллям, емыш — туж шер. Чорыгез, сӥлез пӧзьто, куасьто вылэм, куддыръя ылен сиылӥзы, али гинэ вандэм пужейлэсь вирзэ юылӥзы. Ма али но кыдёкысь стойбищеосын, гуртъёсын тазьы сиськисьёс вань. Со интыысь культуралэн аспӧртэмлыкез. Угось уно толэзьёс ӵоже кыстӥськись тол куазен адямиослы кызьы ке кужым люкано, пужейёссэс утёно вал. Али уйпал калыкъёс, коть кыдёкын тундраын мед улозы, улонлэсь бере уг кылё, пӧртэм гаджетъёсты, туала техникаез куто. Татын 93,8 процентэзлэн улӥсьёслэн Интернетсы вань.

Со дыре ик тодосчиос ӧпкелё: ханты, манси кылъёсын песянай-песятайёс гинэ верасько на, анайёс-атайёс асьсэ понна лабырто, нош нылпиос кылзэс воксё уг ни валало. Соин ик бадӟым саклык, пе, висъяськом кыл узырлыкмес утёнлы. Нялтас вераса, туннэ нуналлы Ханты-Манси округын 30 сюрс хантыос, 15 сюрс мансиос уло. Хантыос пӧлын кылзэс тодо, пе, 30 процентэз гинэ. Мансиос пӧлын эшшо ӧжытгес. Ханты-Манси округлэн быдӟалаез 534,8 сюрс квадрат километр. Удмуртилэсь 13 поллы бадӟымгес. Нош улӥсьёслэн лыдзы Удмуртиын мындагес ик — 1 миллион 647 сюрс адями. Югра музъем 92 процентэз нюлэсъёсын шобыртэмын. 24,8 процентэз муос сётэмын выжы калыкъёслы пужей вордыны, чорыганы, нюрмульы бичаны. Тунсыко: тросэзлэн тусъёссы удмуртъёслэн кадь. Куддыръя шоразы удмурт сямен вазем потэ. Зэм, одӥг выжыысь луэммы шӧдӥське кылъя но. Кылсярысь, нянез соос но туж мусо гинэ «нянь» шуо.

Картинки по запросу ханты мансийск

Ханты-Мансийск. Туспуктэм: NG72.ru

 

Вашкалаез — туала

Ас выжы музъемзы вылын улӥсьёс областьын 2,2 процент гинэ. Озьы ке но уйпал калыкъёслэн культуразы шӧдӥське котькытын: Ханты-Мансийскысь трос этажо коркаослэн архитектураязы но гостиницаын, Эшъяськон юртын, Правительстволэн юртаз. Кабинетъёс но холлъёс вӧл-вӧлэсь, бадӟым укноос, котыр пуштыр-пуштыр сяськаос, трос кутӥсько тӧдьы но чагыр буёлъёс. Но калыклэн аспӧртэмлыкеныз матэгес тодматскемды потэ ке, вамыштоно «Торум маа» музеязы. Со интыяськемын кужым сётӥсь дун-чылкыт интыын. Та музее ми пу тубатъёс кузя кема гинэ тубим, нюлэс куше шедим. Татын адӟыны луэ зэмос уйпал чумез, хантыослэсь гужем но тол коркаоссэс, лапасъёссэс, таосыз, Кукри бабалэн коркаез сямен коръёслэсь лэсьтэм пыдъёс вылын сыло. Ханты-мансиослэн дэремъёссы но вуремзыя удмуртъёслэн выллем, зэм, айшет соос уг кертто. Нош мылазьзэс векчи весьёсын чебермало. Дэремъёссы вылын нулло пужей кулэсь лэсьтэм шуныт дӥсь. Тунсыко, корка котыразы кутӥськись посуда-лянэсъёссэс кызьпу туйлэсь лэсьтылӥллям. Нош кузь ӝытъёсы-уйёсы шашы турынлэсь шобретъёс пунылӥллям. Зэм, таоссэ шобырскон вылысь ӧвӧл, улазы валён вылысь. Шашы шобрет вылын пужей дӥсеныд коть кырын кӧл, уд кынмы, пе.

Вашкала калыклэн аспӧртэмлыкез туж яркыт адӟиське «Вэн корт» этногуртын. Иртыш шур вӧзы интыяськем гурт туристъёсты кыскон понна лэсьтэмын. Татын чумъёсыз но, куно пумитан бадӟым коркаез но вань. Мылкыд карисьёс шур дурын чорыгаса шутэтскыны быгато.

Но, малпасько, уйпал калыкъёслэсь пуш дуннезэс шӧдэмед потэ ке, одно ик ветлоно «Солнце» театрзылэн постановкаосаз. Милемлы «Дети неба» спектакль учкыны кылдӥз. Туж аспӧртэм, ноку вунэтонтэм мылкыд сётӥз со. Нырысь ик, постановкаез учкон понна, милемыз залэ ӧз, катанчи сьӧртӥ пыртыса, сцена вылэ поттӥзы. Нош отын бадӟым-бадӟым чум сылэ. Чум пушкы пыриськод, отын лачмытак тыремын пуконъёс, небыт тахтаос. Коть выдыса учкы. Азяд уйпал воргорон но кышномурт вашкала дыръёсы сямен, пуко, гур эсто, киужен выро. Тон пырак соос доры куное пырид но огминутскын вашкалае вуид кадь. Гур эстон висказ воргорон вашкала мадёсъёс вера, гурысь ӝутскись ӵын вадьсы нимысьтыз трафаретъёс тырыса, чумын аспӧртэм вужеръёс, выжыкыл дунне кылдыто. Пумен-пумен быдэс чум пӧрме вашкала дуннелы, отын жугисько, тупало, зэмлыкез утчало. Туж чебер, туж яркыт но паймымон…

Кык дуннеос вискын

Ханты-мансиос туж данъясько калыке потэм визьмо адямиосынызы, писательёсынызы, тодосчиосынызы. Валамон, угось пыдлось тундраысь, кытчы вертолётэн сяна вуыны но уг луы, потыны, валтӥсь вузъёсын тодон-валан басьтыны ваньмыз ӧз дӥсьтылы. Сыӵе дӥсьтӥсьёс пӧлын тодмо писатель Юван Шесталов. Сое дышетон понна атаез скалзэс вузано кариськем. Пыже турын тырем, скалзэ пуктэм, шур кузя васькем. Весь пукыса, пудо жаде, пе, нош пыд йылаз султӥз ке, пыжзы бекмыльскоз. Воргорон, скалэз лӥятыса, ялан пукем, киысьтыз сюдэм. Бер ӝыт кытчы ке ярдуре дугдылӥллям, шутэтскиллям. Озьы Шесталовлэн атаез, скалзэ вузан понна, арня пала шур кузя мыноно луэм, но пиезлы сюрес вылэ коньдон поттэм.

Ӧйтӧд, кызьы азинскысал уйпал калыкъёслэн улон-вылонзы, но 1970-тӥ аръёсы татысь шедьтэмын вал мувӧй. Озьы ас музъемъёссы вылын огсыр, инкуазен огкыл шедьтыса улӥсь калыкъёс доры палэнысь адямиос вуизы, пумен тросгес вышкаос пуксизы, инкуазь кырсёмыны ӧдъяз. Югдурез тупатон вылысь кылдытэмын вал «Спасение Югры» огазеяськон. Нош 1996-тӥ арын кылдӥз Уйпалась ас выжы музъемзы вылын улӥсь ӧжыт лыдъем калыкъёслэн ассамблеязы. Соин кивалтэ тодмо писатель, Ханты-Манси округысь Думалэн Тӧроезлэн воштӥсез Еремей Айпин. Соин но пумиськылыны милемлы шуд усиз. Еремей Данилович пусйиз, уйпал калыкъёслэсь культуразэс, выжы музъемъёссэс (родовые угодья), экономиказэс утён понна 40-лэсь трос законъёс кутэмын. Тужгес тунсыкоез, кылсярысь, дун-чылкыт вӧсяськон интыоссы сярысь. Та интыос сокем утисько, отчы палэнысь адямиосты, туристъёсты пыраны ик уг лэзё.

Уйпал калыкъёс дорын ми кӧня ке гинэ улыса вуттӥм. Валамон, вань ас-пӧртэмлыксэс адӟыса ӧм вуэ. Но ялан асьмеды шӧдӥмы дорамы кадь.

Елена Миннигараева

 

Удмурт Дунне
By Удмурт Дунне Ноябрь 1, 2017 16:24