«Удмурт дунне» мынэ этнографической диктантэ

Удмурт Дунне
By Удмурт Дунне Октябрь 31, 2017 14:15

«Удмурт дунне» мынэ этнографической диктантэ

Быдэс Россиын 3-тӥ шуркыномонэ 10.00 часын гожтозы этнографической диктант. Удмуртиын 200 интыосын парта сьӧры пуксёзы: библиотекаосын, школаосын, кунъюртъёсын… «Удмурт дунне» газетын но перооссэс вӧло ни.

— Ми, «Удмурт дунне» газетысь ужасьёс, вамыштомы Ижысь Ф. Васильев нимо библиотекае. Таӵе диктантэ одно ик ветлоно, озьы ми асьмелэсь улон шоры учконмес возьматӥськом. Со сяна, тунсыко, макем умой тодӥськод тонэн артэ улӥсь калыкъёсты, — малпало «Удмурт дунне» газетын ужасьёс.

Диктантэ пыриськыны быгатэ котькуд мылкыд карись, солы 15 ареслэсь тросгес ке. Тодон-валанъёссэс эскерисьёс 30 юанлы валэктон сётозы. Соос 2 пумоесь: одӥгъёсыз герӟаськемын Россиысь улосвылъёсын, калыкъёсын, мукетъёсыз — дуннеысь калыкъёслэн сям-йылолъёсынызы но улэм-вылэменызы.

Вераны кулэ, диктантлэн кичӧлтӥсез луиз Удмурт шаер. Туэ сое 2-тӥ арзэ гинэ гожто ай, но отчы Россиысь вань улосвылъёс но дуннеысь 94 кунъёс пыриськыны мылкыд каризы ни. Удмуртиын улӥсьёс ёрос центръёсазы, гуртъёсазы парта сьӧры пуксьыны быгатозы. Кытын диктантэз гожтыны луоз, тододы, mitetno.ru вотэсбаме пырыса.

Нош кин ӧз ваньмы диктантэз, нимысьтыз интые лыктыса, гожтыны, пырелэ mitetno.ru вотэсбаме, отын онлайн-юалляськон луоз. Йылпумъянъёсты но та бамысь шедьтоды, соос тодмо луозы 12-тӥ толсуре — Россиысь Конституцилэн нуналаз.

 

Мария Иванова

Удмурт Дунне
By Удмурт Дунне Октябрь 31, 2017 14:15