Шурали

Удмурт Дунне
By Удмурт Дунне Октябрь 12, 2017 16:30

Пичи Пургалась Н. Шутова тылобурдоез но кыткоз.

Пичи Пургалась авторенымы Нина Шутоваен ку, кызьы тодматскеммес уг но тодӥськы ни, али потэ, тодылӥ котьку, малы ке шуоно соин котьку капчи. Но тани дано лыдпусэныз валче маке гожтыны малпай но валай — со сярысь туж ӧжыт тодӥсько…

— Юбилейдэ пусъёд, дыр, ук? Кытчы куное мыноно? — юасько гужем вылтӥ.

— Чик мылкыды овӧл…

— Ма, тынад мылкыдтэм дырыд луылэ шат? — паймисько мон.

— Малпа ай, отын, ымдуръёстэ буяса-мараса, ӝӧк сьӧрын чонь-чонь пуконо, олокыӵе но визьмо кылъёсты кылзоно, тауэлэ-тауэлэ шуыса, йырез мыкыръяно… Сюлэм сэректоз ук! Туж сиемед потэ ке, табань кото…

Нина пичи дырысеныз шаян будӥз. Одӥг волятымтэ липет но ӧз кыльы, дыр, шуэ. Я шула, я ыбылӥське. Одӥг пол гуртын кыӵе ке юмшан дыр вал, со вискын нылаш малпаз «ас ужзэ» быдэстыны — кемалась потэ ни вал агаезлэсь диван улэ ватэм пӧйшуран пыӵалзэ эскеремез. Дорын нокин ӧвӧл — усто, пыӵалэз поттӥз но эскерыны кутскиз — маке патронэз мычиськемын кадь. Берен пыртыны турттэ, уг пӧрмыты. Тӥр кутыса, коканы кутскиз. Пыӵал как ыбиз ук! Быдэс коркан сьӧд ӵын, половик дур сутскемын. Усьтыр-табыр утялскиз но нэнэйёссэ-дядяйёссэ возьманы пуксиз. Нэнэез соку ик синйылтӥз метр кузьда вандэм половикез.

— Малы бон вакчиятӥд?

— Укыр кузь потӥз…

Но, кӧня ке дыр ортчыса, шаянтэмез шараяськиз ик: выж вылэ пулялэсь пась кылем. Соку дядяез куаретӥз: кунгож дурын Китаен война мынэ, отчы снайперъёс кулэ. Ойдо, котомка дася. Умой-умой оски, дасяськыны кутски, шуэ Нина.

Но визьмамзы кемалы ӧз тырмы. Школаын одӥгаз урокын ачиз кадь ик шаян пияш шоры рогаткаысь ыбыны мертаськиз но… «пуляез» дышетӥсь шоры вуиз. Собере вал вылын ворттылэмез потыны ӧдъяз. Нылашлы вал оскись ӧй вал бере, Нина амал шедьтӥз — дораз сиськыны бертэм пастухлэсь кенер борды думем валзэ мозмытӥз но эх ворттӥз ук! Кӧня ворттылӥз, уг тоды ни, сазьтӥськиз но — инбам берга, йырыз висе, пыдыз кужектэ. Но ӧз буйгатскы — ӝоген со шуласа ик ворттылэ ни вал. Бӧрысьгес мотоез-машинаез но серметаз. Зэм, картэз право басьтонлэсь алӥз — лобамезлэсь кышка.

— Сямы зӥбытгес луысал ке, кин луысал меда? — юа со аслэсьтыз ачиз. — Весь берпуметӥ парта сьӧрын пуки, тунсыко потылӥз, кин мар каре. Примерез-упражнениез ӝогак лэсьтӥсько но нош шаянтыны ӧдъясько. Ваньмызлы серем, нош дышетӥсьлэн уроксэ нуоно.

Зэм, школаын ужрадъёс дыръя сое туж яратылӥзы — Нина весь сцена вылын вал. Соин ик, школаез быдтыкуз, малпаз артист луыны.

— Кытысь-мар юалляськыны уг валаськы, — тодаз вае Нина. — Анатолий Ушаковез гинэ тодӥсько вал. (солэсь «Пань-пань котэм няньзэ» весь лыдӟытъязы бере, со монэ тодыны кулэ кожасько ук!) Озьы пырак со доры филармоние вамыштӥ. Соиз уж интыяз вылымтэ, адрессэ кури. Курисез но куре, верасез но вера. Кузпалыз Галина Иосифовна ӧсэз усьтӥз. Но шудэ вылымтэ: ӵапак со аре Ленинградысь артистъёсты дасян мастерскоез ворсаллям. Доре бертытэк ӧйлась. Нылпи садэ воспитателе кариськи. Ой, яратӥзы нылпиос монэн шудыны!

Ар ортчыса, газетысь ялон адӟи — ГИТИС-э удмурт группа люкало. Экзаменъёсты ортчи-мар, но запасэ гинэ кельтӥзы. Та рад кошки культпросветучилищее. Дышетскыны кутски гинэ, мын, пе, срочно Москвае, кин ке ГИТИС-ысь пегӟем, инты бушам. Тапыр кошки, но… беромид, пе… Я, кӧня ке нунал отын улӥ ик Татьяна Денисоваосын, Светлана Кибардинаосын, Валентина Моисееваосын ӵош, адӟи, кыӵе-мар со артистлы дышетскон. Нош ик бертӥ. Собере улон кожъёс монэ «Дась лу!» газетэ вуттӥзы. Мыным луыса, тӥ — Рябининаен Кутузова (Емельянова) — журналистэ потӥды ук, ӧд валаллялэ-а? Али кадь почерктэс но, мар гожъямдэс но тодӥсько, — нош ик шоккетэ Нина. — Ой, кыӵе редакциын ужаны яра вал, нош кыӵе Валера Сидоровен эшъяськылӥм — дото кылмы тупа вал, но нош ик лобатӥзы. Сокращение, пе!

Собере улон Можгала вуттӥз. Огпол эшъёсыныз общежитие лыктэм Толик нимо пияш. Нокызьы верантэм востэм! Тае кызьы ке «улӟытоно» ай шуыса, вӧзаз пукси но «мон тыныд бызьысал», шуисько. Со воксё абдраз. Но шумпотӥз ик, шӧдске, нуналлы быдэ ветлыны кутскиз. Огазеяським. Можгалан мон туж крутой вуз карись вал — ӝытлы ӝажыос вылэ вуз ӧз кыльылы ни — кыӵак вузаса быдтылӥ. 2 ныл вайыса вуттӥ ни вал, Толиклы шуак-дуак Пургала уж ӵектӥзы, квартира но, пе, вань. Ох, лӧптыса бертӥ ук дор палам. Татын эшшо пимы вордскиз на.

Ул но ул вал ни, 3 пинал, арнялы быдэ Юрие нэнэй-дядяй доры юрттыны бертылӥськом, арлыд но «зӥбломы ни» шуэ кадь. Но ма карод, уг зӥбломы бере — нош ик газетысь ялон адӟи: университетэ журналистикая факультетэ дышетскисьёсты куто. Я, сочинение гожто, дыр, но француз кылэз кызьы тодам ваём на? Экзаменъёс бере деканатэ возьдаськыса жингыртӥсько: кӧня баллэ? 12, пе, конкурсэз ортчид. Ма, пыри бере, дышетсконо луиз. Пумен Пичи Пургалась гимназиын журналистикая кружок нуи, собере тани Нылпи творчествоя юртэ уж ӵектӥзы — директорлы воштӥсе. О, татын туж тунсыко: дышетӥсь но тон, завхоз но, Тол бабай но, Баба Яга но — Выль аре, артист кариськыса, школаостӥ-садикъёстӥ ветлӥськом. Зэмос артистэз ӧтиллям кожало, яра ке, умой, эшшо золгес турттӥсько. Ма, исьнере вылэ пуксьыса, кытӥ-мар Иже но вуисько, отын редакциын ужась мӧзмыт тусо эшъёсме шулдыртыса кельтӥсько.

— Тон кылбур но гожъяськод кадь ук?

— О, мар гинэ со, кинлэн ке вордскем нуналаз ӟеч кыл кулэ ке, 5 минут ӵоже гожто, ачим ик тамада но карисько, утыр, куараме воштыса, Светлана Смагина сямен кырӟаса но лэзё. Пичи Пургалась кылбурчиос пӧлын батлэ ветлӥ, огшоры гинэ мынӥ вал но вормиськем… Ма, мон, газетын ужатэк но, Журналистъёслэн огазеяськонзылэн ёзчиез — мактаськоно ке мактаськоно ни, учыр сюрыку. эшшо туж ческыт кубиста сылалтӥсько, калыкез ведраен-ведраен сюдӥсько, курег но пукетӥсько, сапег но кышъясько, электроез но тупатъясько, тӥрен шыд но пӧзьтӥсько, нош тулыс олокӧня гектар мерттымон сяська уд будэтӥсько…

— Малы сомында?

— Азьтэм эшъёсы трос ук, — кит-кит серекъя маскара Нина. — Но газетэз лыдӟыса быдтытэк, номыр уж борды уг басьтӥськиськы! Картэ кемалась тодэ, «Удмурт дунне» вуон нуналэ мон «невыездной» шуыса. Гожъямъёсты мӧзмыт потыны кутско ке, ачим гожъяны кутскисько. Одӥг пол 1-тӥ апрель азьын йыре малпан чилектӥз — «Шӧкыч» баме пӧяса ялон сётӥ: «Умой выжыысь кечме вузасько, вӧзаз кечпиоссэ но, воз мында турын но кузьмасько». Дун кури 3 сюрс манет. Жингыръясьёслэсь ёрми! Огез воргорон жингыртӥз: кышное пе, кулэмын, пиналъёсы нимаз уло, 2 коркае… Тӥледлы бон кышно кулэ яке кеч шуыса юамелы ну серекъя ук. Арня ӵоже нунал лумбыт кӧня муртэн меда вераськи, акыльтӥ. Огзэ валай: удмурт калык шоккетэмез валась, огез но кӧтсэ ӝож ӧз кар.

Но эн малпалэ, асме ачим но юмоке пуктылэме вань. 2008-тӥ арын вал со, телевизор пыр кылӥ уже интыянъя службае султӥсьёслы уждунлэсь бадӟымгес коньдон сӥзё шуыса. Кутӥ но ужысь кошкон сярысь куриськон гожтӥ. Малпасько, коть ӝыны арзэ ке но ӟеч коньдон басьто, ай эшшо дунтэк кинлы ке дышетозы. Биржае мынӥ но, воксё мукет валэкто, оло удмурт телевидение мыдлань вераськем, оло ачим ӧвӧл валаськем, коть йырсидэ оген ишкы. Я, «Удмурт дуннее» та сярысь материал потэм бере гинэ ваньзэ пыр-поч валай ни, уж дурам ик берытски.

* * *

Кӧня ке ар талэсь азьло Шутова эше телефонам туж висись муртлэн куараеныз жингыртэ: кулӥсько, пе, простить кар… Йыры кур луыса, трубкаме куштӥсько ни вал: ма, кызьы-озьы висёнэн маскаръяськыны луоз?! Но та рад со ӧз маскаръяськы. Тау усто эмчиослы — быгатӥзы эшме выльысь пальпотытыны. Зэмзэ ке, улоназ сыӵе одӥг гинэ учыр ӧй вал, но со пыраклы мед кылёз ортчем дыре, азьпалан — шудо егит дыр! Мар со 50 арес шаплы кышномуртлы? Маскаръяськыны муг гинэ, — шуэ Нина Ивановна пятницае, 13-тћ числое, «Шӧкычлы» сӥзем фестивалямы сцена вылын шудыны дасяськыса.

Зинаида Рябинина

Удмурт Дунне
By Удмурт Дунне Октябрь 12, 2017 16:30