Шӧкыч: Ваменэс Насьта

Удмурт Дунне
By Удмурт Дунне Октябрь 9, 2017 17:25

Шӧкыч: Ваменэс Насьта

Таки ӧз удалты ини мыным эмеспиосын.

Нырысетӥез Ныртэм Ондӥ вал. Ныртэм, малы ке шуоно егит дыръяз жугиськыкуз, нырзэ куртчыны шедьтӥллям. Эмеспие юыны яратылӥз, йыромем така сямен, арняен-арняен доре ӧз бертылы. Нылы я асьме, я бускель гуртысь утчаса вае вал… Малы мыным сыӵе «йӧно» эмеспи? Коркасьтым донгаса поттӥ.

Кыкетӥез эмеспие — бускель гуртысь Горд Пашка. Таизлэн кизэ ӝуткан сямыз шараяськиз: нылы лыз-вож синъёсын ӵем ветлӥз. Кемалы чиданэ ӧз тырмы, тазэ но коркась поттоно кариськи. Нош соид пыкиське, ош кадь: мынам, пе, татын кышное улэ, тынад правоед ӧвӧл милемыз люкыны. Мон аслэсьтым правоме возьматӥ: локан ведраысь пож вуэн пылатӥ но ӵыжаса-донгаса коркась поттӥ.

Куинетӥез эмеспи дорамы йыгаськиз. Ма, кызьы уз? Нылы кельшымон. Кыкезлы кельшиз бере, куинетӥезлы но кельшоз.

Умой гинэ улӥськом ни вал: нылы скал кыске, эмеспие — тракторист. Гуртоослэн верамзыя, таиз эмеспие востэм, чалмыт, нош ужаны убир кадь. Но мон адӟисько ук: гурт ужез воксё уг тоды, ужысь бертыса, телевизор азьын гинэ кылльысал.

Огпол ӧй ни чида. Ну, Исьтапан, шуисько, корказь куашкан калэ вуэмын, мынэсьтым шат тупатэмме возьмаськод? Кенер пулъёс но палдэмын… Кылэм-адӟем ӧз кары. Та рад нылылы но, эмеспиелы но ӧс шоры возьматӥ — огнам уло, шуисько, огдэс но адӟеме но, кылэме но уг поты.

Пурӟытэме иназ мынӥз, лэся. Эмеспие коркалэсь ньыльзэ ик сэрегъёссэ ӝутӥз, сисьмем коръёссэ воштыса, кирпичлэсь фундамент лэсьто, пе. Ма, мон шумпотӥ ни: эмеспи кошкон азяз коркаме сэзъяса-выльдыса кельтоз.

Нош солэн, гоно бамлэн, воксё мукет малпанэз вылэм… Огпол уйин корка зуркамлэсь сайкай. Инмарлы кирос тырыса, мар вылам дӥсе вал, корказе потӥ. Номырзэ уг валаськы: коркае гызмыль кыстӥське бакча шортӥ. Валатски: усыкмем йыро эмеспие коркаме, лебёдка пыр канатэн кыскыса, бакча бере шур дуре васькытэ. Монэ коркаеным валче палэнтыса, асьсэлы выль юрт пуктыны малпам.

Я, мыным, Ваменэс Насьталы, егитъёслэн улон висказы нырме чуртнаме понна, озьы ик кулэ — бакча берын но яралоз ини.

Николай Трубачев

 

Удмурт Дунне
By Удмурт Дунне Октябрь 9, 2017 17:25