Шӧкыч: Кин сюдэ — вунэто

Удмурт Дунне
By Удмурт Дунне Октябрь 11, 2017 17:20

Шӧкыч: Кин сюдэ — вунэто

Кемалась ӧвӧл таӵе учыр луиз. Гуртысьтымы вуз каронние вайиллям колбаса. Басьяськисьёслэн висказы ик пырыны турттэ егит воргорон. Мон, пе, ужасько, дыртӥсько…

Ми, черодын сылӥсьёс, вератэк ӧм чидалэ.

— Ми но ужам, — шуиськом.

— Тодӥськом ми, кызьы тӥ ужады колхозады, — шуиз егит пи, — нуназеозь ужаськоды но бертӥськоды вал.

Со уг тоды, кыӵе секыт ужез гуртын улӥсьлэн. Котькыӵе куазен бусые но фермае мыноно, гыроно, кизёно, скал кысконо. Нош куазь дыртытэ, ваньзэ дыраз лэсьтоно. Гуртоос асьсэ понна гинэ уг ужало ук, сюдо городын улӥсьёсты — быдэс республикаысьтымы но странаысьтымы…

Жаляса верано, «деревенщина» но «колхозник» кылъёс ӵемысь ултӥяса верамын луо. Алигес, кылсярысь, телевизор пыр «Прямой эфир» возьматонын одӥг журналист (нимзэ-тулзэ уг вера) Мария Максаковалы вера: «Озьыен, тӥ улӥськоды цивилизованной интыын, нош ми — колхозникъёс». Туж кӧт ӝож, сыӵе валасьтэм поколение будэ шуыса. Сое тупатыны уз луы ни меда?

Кинотеатре нуытозь, нуэ вал гуртэ, возьматэ, кызьы но кытын нянь будэ, кытысь йӧл потэ.  Малпасько, та  ужпумез кун ласянь ӝутыны кулэ!

Мария Семенихина,       

Пичи Пурга ёросысь Кечолысь

ветеранъёслэн кенешенызы кивалтӥсь

 

Удмурт Дунне
By Удмурт Дунне Октябрь 11, 2017 17:20