Патриарх Кирилл сӥзиз 12 выль храм усьтыны

Удмурт Дунне
By Удмурт Дунне Октябрь 20, 2017 17:17

13-тӥ-15-тӥ октябре элькунамы вуылӥз Москваысь но быдэс Ӟуч кунысь Патриарх Кирилл. Пумиськылӥз элькунысьтымы кивалтӥсьёсын, Инмарлы оскисьёсын. Ортчытӥз службаос.

Патриархез пумитаны трос калык люкаськиз.

Таӵеез ӧй вал на

Патриарх Кирилл элькунамы нырысьсэ вуылӥз. Ӵапак 10 ар талэсь азьло дун-чылкыт Михаиллэсь соборзэ усьтонэ пыриськиз вал Патриарх Алексий II. Озьы, бадӟым вис карыса, элькунысьтымы оскисьёс понна нош ик бадӟым кузьым лэсьтэмын. Патриарх Кирилл служба ортчытӥз Глазовысь, Сарапулысь соборъёсын, озьы ик Ижысь дун-чылкыт Александр Невскийлэн храмаз но дун-чылкыт Михаиллэн собораз.

— Мон нырысьсэ ортчи быдэс митрополиетӥ — мукет интыосы вуылыкум, таӵеез ӧй вал на, — вераз бадӟым куно. — Угось одӥг лыктэмен, ваньзэ адӟыса вуттыны уг луы. Но та рад адӟиськыны турттӥ ёросъёсысь православнойёсын но. Малпасько, ӵапак ёросъёс туннэ уката азинскыны кулэ, соослэн улон-вылонзы медаз висъяськы бадӟым городъёсын улӥсьёслэнлэсь.

Нялтас вераса, одӥг интыысь мукетаз ӝог вуон понна Патриарх лобаз вертолётэн, тодӥз уго: сое отын возьмало.

Тусыз сайкыт

Кирилл Патриархлэсь туссэ матысен адӟон вылысь кӧня ке сюрс калык службаосы кыстӥськиз. Пӧртэм ӧй вал югдур Ижысь дун-чылкыт Михаиллэн собораз но. Служба ог 10 часын кутскиз ке но, кин но со отчы 7 часын ик лыктӥз ни — интытэк медаз кыльы шуыса.

— Мон черке ӵем уг ветлӥськы ке но, туннэ лыктытэк ӧй чида, — вераз Ижын улӥсь Надежда Ипатова. — Ваньмыз туж умой радъямын вал, Патриарх Кириллэн тусыз туж сайкыт.

— Пиенымы ӵош лыктӥм, — шуизы егит кузпалъёс Лекомцевъёс. — Со милям висисьгес вордскиз, соин ик туж оскиськом, Инмарен валче солы юрттыны быгатом шуыса.

Службае вань лыктэмъёслэн синъёсазы адӟиськиз осконзы — азинлыко, эшъяськыса улонлы, тазалыклы…

— Медаз гинэ луэ ваче вуонъёс, семьяын но, кунъёс куспын но, — служба ортчытэмез бере огшоры но валамон кылъёсын вазиськиз Патриарх калыклы. — Картэн кышно керето ке, пиналзы будыса соосты валамысь, кылзӥськемысь дугдэ. Кунъёс куспын ваче вуонъёс кӧня улонъёсты быдто. Бен, туала вакытэ ваче керетонозь вуыны кема ӧвӧл — дуннеез басьтӥз Интернет. Озьы адямиос ог-огзы борды туж каньылэн сузьтӥськыны быгато. Котькудӥзлэн азинлыко луэмез потэ, нош сюрес сюбег луылэ, таӵе дыръя артэ мынӥсьтэ кельтон вылысь пыдэз пуктэм, оло, потэ. Но котьку но котькытын мукетъёсыз понна лэсьтоно озьы, кызьы соос тон понна мед лэсьтозы кадь.

Оскисьёс доры Патриарх буш киын лыктымтэ — кузьымъёс люкылӥз: Михаил Архангеллэсь, Инмар Анайлэсь, Христос Утисьмылэсь обросъёссэс.

Храмъёс усьтӥськозы на

Удмуртиын 3 нунал ӵоже ужатозяз ик, Патриархен ӵош вал Удмуртилэн Тӧроез Александр Бречалов но. Нош соин ӵош — быдэс делегация: Правительстволэн Тӧроез Ярослав Семёнов, Ижысь но Удмуртиысь митрополит Викторин, ёросъёсысь епископъёс но мукет.

— Россиын улон-вылонмы меӵак герӟаськемын Удмуртиын промышленностьлэн азинскеменыз но. Туж секыт война аръёсы но Удмуртия вормонэз матэктон понна туж трос лэсьтӥз. Мар веранэз туала вакыт сярысь. Мынам ваньзэ ас синъёсыным адӟеме, удмурт калыкен ӵош вӧсяськеме потӥз, — вераз Патриарх.

Нялтас вераса, храмъёсын службаос нуэм сяна, Патриарх вуылӥз «Калашников» концернэ но «Ижмаш» музее.

— Удмуртия али нюръяське Россиысь одӥгез кужмо, азинлыко улос луон понна, — вераз кунолы А. Бречалов. — Валаськом: экономикаез ӝутон сярысь сюлмаськонэн ӵош вунэтоно ӧвӧл осконэз но. Соин ик дорамы вуэмды — туж бадӟым юрттэт, оскон, кужым сётэ мыным но Удмуртилэн Тӧроезлы сямен, озьы ик элькунамы вань улӥсьёслы но.

Патриарх Кирилл элькунмылы, кивалтонэ вуэм выль егит командалы азинсконъёс сӥзиз, оскемзэ вераз: Удмуртиез азинтон понна трос лэсьтозы.

Нош Ижысь епархилы Патриарх Кирилл кузьмаз 12 напрестольной Евангелиосты, соосты пононо выль усьтӥськем храмъёслэн алтарьёсысьтызы престолъёс вылэ. Озьы со элькунамы тросгес черкъёс усьтыны сӥзиз. Бадӟым куномы ачиз но буш ӧз кошкы — солы сётэмын Воткаысь Благовещенской соборлэн макетэз — али отын выльдон ужъёс мыно. Нош ас вакытаз та соборын черке пыртӥзы тодмо композиторез П. Чайковскиез. Озьы Патриархлы валатон сётэмын: сое выльысь возьмаськом, Воткаысь соборез усьтыку.

Элина Кумачёва

Удмурт Дунне
By Удмурт Дунне Октябрь 20, 2017 17:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*