«Палэзян» фестивальын луоз фин-угор мода, крезьгур но суредан искусство

Удмурт Дунне
By Удмурт Дунне Октябрь 10, 2017 09:37

18-тӥ-21-тӥ коньывуонэ шаерамы люкаськозы фин-угор дуннеысь быгатӥсь егитъёс. Соос понна 7-тӥ арзэ ортчоз этнокультурая «Палэзян» калыккуспо фестиваль.

Туэ дорамы вуыны чаклало Венгриысь, Марий Элысь, Мордовиысь, Комиысь, Пермь улосысь коллективъёс. Соос туала этнокультуралэсь узыр пуштроссэ адӟытозы. Егитъёс понна ортчозы пӧртэм мастер-классъёс, лабораториос, пресс-конференциос, перформансъёс, суредъёсын, киужъёсын адӟытонъёс, крезьгуро ӝытъёс, эктонъёс.

Нош малы палэзь? Фестивалез радъясьёс, Ижысь Эшъяськон юртысь ужасьёс, верамъя, та емыш огазеясь пус выллем луэ.

— Ужрадамы тыршимы люканы фин-угор дуннеысь туала ӧръёсты — модаез, туспуктонэз, суредэз, киужез, кырӟанэз, эктонэз — но тодматыны егитъёсты но вань мылкыд карисьёсты туала фин-угор дуннелэн аспӧртэмлыкеныз, — вера «Палэзян» фестивалез одӥгез радъясь Ольга Степанова. — Кылсярысь, нырысетӥ нунал сӥземын луоз этномодалы. Кылем арын дӥськут вурисьёс ог-огзэс ужъёсынызы тодматӥзы ке вал, туэ кенешимы ужпумъёс но вормонъёс сярысь трогес вераськыны. Котырес ӝӧк сьӧры модалэн шуг-секытъёсыз сярысь вераськыны ӧтчало этнодӥськутэн ужась дизайнеръёс Олег Ажгихин но Полина Кубиста. Валтӥсез но яркытэз ужрад ортчоз «Резиденция» уй клубын. Отын крезьгур дуннеысь трос пӧртэм ӧръёсъя — реп, фолк, рок, поп — кырӟасьёслэн куараоссы чузъяськозы.

18-тӥ коньывуонэ Ижысь Эшъяськон юртын ортчозы:

16.00 часын — туала этномодалы сӥзем нырысетӥез котырес ӝӧк. Сое нуоз модая «Ажиотаж» агентстволэн директорез Олег Ажгихин но удмурт дизайнер Полина Кубиста. 0+

18.00 часын — усьтӥськозы Григорий Степановлэн туспуктэмъёсыныз «Мукет адӟон. Другое Измерение» но Ксения Ворончихиналэн горд сюен быдэстэм ужъёсыныз но туспуктэмъёсыныз «Бус. Туман» адӟытонъёс. 0+

19.00 часын — Комиысь, Марий Элысь, Пермь улосвылысь но Удмуртиысь туала дизайнеръёслэн «Палэзян. Этномода» коллекциоссэс возьматон. 0+

19-тӥ коньывуонэ

Венгриысь «Magyarhang» ансамбльысь артистъёс Ижкарысь 11 номеро школаын пиналъёсты фин-угор культураен тодматозы.

Берло «Палэзяны» вуэм куноос Ижкарысь «Интеграл» лулчеберетъя юртын ИжГТУ-ысь студентъёсты шулдыртозы. 18+

19.00 часын — Эшъяськон юртын «Эктон корка+» ӝыт ортчоз. Отчы пыриськоз Венгриысь «Magyarhang» ансамбль. 18+

20-тӥ коньывуонэ

20.00 часын «Резиденция» уй клубын «Палэзян» этноӝыт ортчоз. Отын калыкез шулдыртозы Москваысь OYME, Венгриысь «Magyarhang», Татарстанысь Shoner Paul, Марий Элысь Александр Речкин, Удмуртиысь «Малыми», «Suomi», «Post-Dukes», «Эрик» но Алексей Пикулев. 18+

21-тӥ коньывуонэ Венгриысь «Magyarhang» ансамбльысь артистъёс но туала удмурт кырӟасьёс Яр каргуртын концерт пуктозы. 12+

Ангелина Снигирёва

Кызьы ортчиз фестиваль кылем аръёсы?

«Палэзян» концертын тузон пурӟиз!

 

Мурӝолын палэзян…

Удмурт Дунне
By Удмурт Дунне Октябрь 10, 2017 09:37