Октэмын 720 сюрс тонна ю тысь. Табыдӟа урожай ӧй вал на!

Удмурт Дунне
By Удмурт Дунне Октябрь 23, 2017 15:45

12-тӥ октябре шаерысьтымы хозяйствоос но фермеръёс уборказэс быдтӥзы. Рос-прос йылпумъянъёс лэсьтозы ноябре. Но куд-ог ужпумъёсъя туннэ вераськыны луэ ни.

Ю тысь уг тэры кеносэ

Куазь кезьытэн 20-тӥ май котырын гуртоос куалектӥзы вал: мае возьмано азьланяз? Мукет аръёсы та вакытэ кизён йылпумъяськемын луэ ни вал уго. Нош туэ Яр, Кез ёросъёс кизьыны ик ӧз кутскылэ. 10-тӥ июне асьмеос кизимы на. Ярано коть, отӥяз куазен удалтӥз. Быдэс Россиын татчыозь адӟылымтэ урожай калтӥзы. Кылсярысь, 13-тӥ октябрьлы 130 миллион тонна тысь люкамын. Нош бусыос ваньмыз бушатымтэ на.

Удмуртиын ю-нянь калтон йылпумъямын, берпуметӥ комбайнъёс гараже султытэмын. Асьмелэн историямы но тужгес трос урожай люкамын туэ — 720 сюрс тонна. Кеносъёсы тэрытытэк, инбам улэ но люкамын. Та пӧлысь 300 сюрсэз фуражлы мыноз ик. Пудо сиён но кулэ, эсьма, гуртоос пудозэс маин сюдыны уз ёрме. Солэсь азьвыл тол вылтӥ ик фураж но комбикорм уксёен палэнысь вуттӥсьёс сюрылӥзы. Собере, бер киземен, ю тысь кисьмаса ӧз вутты, сое кидыслы но няньлы кельтонлэн толыкез уз луы.

— Котькуд гектарысь 22,8 центнер ю-нянь люкаськиз, — журналистъёслы шуиз гурт удысъя но сиён-юонъя министрлэсь ужзэ быдэсъясь Александр Прохоров. — Вавож но Грак ёросъёс 30 центнерлэсь трос ю калтыны быгатӥзы.

Пудо сиён йырлы быдэ 33,7 центнер люкаськиз.

Бадӟым урожайлы, огласянь, шумпотоно, мукет ласянь, куректоно. Ю-нянь кот вал бере, сое куасьтонлы но кужым тросгес кулэ луиз. Фуражлы дасям тысез гинэ но 2 пол куасьтылӥзы. Валамон ни, кидыс дасян бордын сюлмаськонъёс эшшо бадӟымесьгес. Кылем арын сярысь, кидыс туннэ 70 процентлы гинэ тырмыт.

— Уборкаез бер кутскимы но кема выримы бере, тол улэ кизьыны тырмыт ӧм вуттэ, — шуэ Александр Прохоров. — Озьы, 750 сюрс гектар интые, 559 сюрс гектар киземын, со но трослы бере кыльыса. Кылсярысь, уйпал ёросъёслы озимойёсын 25-тӥ август берозь вырыны уг яра ни — урожай уз сёты я кынмоз, нош соос, ӟечезлы оскыса, 10-тӥ сентябрёзь кизизы. Юос улысь муосты бушатыса ӧм вуттэ бере, тол улэ но ичи гыримы. 300 сюрс гектар интые, 175 сюрс гектар небӟытэмын. Зэм, Дэри, Можга ёросъёсын вань чаклам бусыоссэс гырыса вуттыны кулэ. Нош Каракулино палан ог 40 процентэз гинэ бусыоссы гыремын ай.

Таӵе югдурен валче вуоно тулыс гуртоослэн ужзы уногес луоз: кидыс утчано, бусыосты паськытатоно. Александр Прохоров верамъя, чакламын жаген шобырскем бусыосты но выльысь кизьыны.

Пудо толъёз кӧттыро

Туэ удалтӥз пудо сиён люканэн но. 3 миллион 220 сюрс тонна силос, сенаж, турын, куро дасямын. Кылем арын сярысь, со 1 миллион 100 сюрслы уногес. Озьыен, вуоно арын куазен ӧз удалты ке но, сютэм ум кыле. Угось котькуд йырлы 33,7 центнер вань. 18 ёросын 30 центнерлэсь трос сиён люкамын ни. Чакламын вал 25 ке но дасяны. Огвакытэ, сиён дасяны зоръёсын сэрен быгатымтэысь, шаерамы кышкыт учыр но ялылӥзы. Нош бусыосын али ке но гурето на комбайнъёс — силослы турынъёс туннэ ке но ваньмыз утялтымтэ. Озьыен, лыдпусъёс йылозы на.

— Сиёнлэн ӟечлыкез сюлмаськытэ. Эскеремез пӧлысь ог 10 процентэз начар. Нош кӧняез чакламтэ на. Умоятон вылысь мултэс уксё кисьтоно луоз: биодобавкаос басьяно. Сотэк но туэ уборка дыръя хозяйствоослэн топливолы трос уксёзы кошкиз ни вал, — пусйиз Александр Аркадьевич.

Нялтас вераса, югдурысь потыны юрттӥз туала техника. Кылем арын сярысь, туэ ӟеч, кужмо комбайн-тракторъёс 1,5 поллы уногес басьтэмын. Та азьланяз но ужаны юрттоз. Угось вуоно арын пудо сиён будэтон вылысь но бусыосты паськытатыны чакламын. Скал уллё ялан йылэ, сое маин ке сюдоно.

— Таяз арын уллёез 2 сюрс 161 йырлы йылтӥмы. Туэ 1-тӥ октябрьлы, кылем арын сярысь, 24 сюрс тонналы уногес йӧл кыскимы. Вавож, Можга, Балезино, Шаркан, Алнаш, Ува ёросъёс 30 сюрс тонналэсь но трос сётӥзы, — шуиз Александр Прохоров.

Пудо йылэ бере, сое кырын уд возьы. Туэ чакламын 96 объект пуктыны, быдэстэмын ни 30-эз. Александр Прохоров пусъемъя, гид ӝутӥсьёслы азьланяз но субсидия висъяськоз. Пуктӥськисьёслы 2 ар ӵоже шаермы 600 миллион манетлэсь трос висъяз ни. Зэм, туннэ со ваньмыз куддыр дыраз гуртоос дорозь уг вуы. Но та ужез азьланьтон быдэстоно ужпумъёс пӧлын нырысетӥез луэ.

Туннэ гуртоос азе ужпум пуктэмын уногес йӧл кыскыны но сое мукет улосъёсы но келяны.

— Кыӵе производство кызьы азинтӥське шуыса чаклано ке, переработкаен вырисьёс, сиён-юон поттӥсьёс котьку азьпалан вал. Удмуртия 63 улосэ вуз келя. Но њеч урожай уд потты урод музъем вылын. Музъемлэн ӟечлыкез арысь аре начарме. Берло аръёсы удобрение понӥськомы ке, мукет химикатъёс сярысь вунэтӥськомы. Музъемын чырсэз мултэс люкаськемын. Со урожай басьтыны люкетэ, — шуэ Александр Прохоров.

Соин ик чакламын музъем бордын ужанлы бадӟымгес саклык висъяны. Тросгес урожай калтыны пӧрмиз ке, соку, йӧл кысконэн вырем сяна, ош-кунян будэтон борды но басьтӥськыны луысал. Таиз удыс Удмуртиын туннэ кулэезъя азинтымтэ на.

Елена Сараматова

Туспуктӥз А. Горбунов

Удмурт Дунне
By Удмурт Дунне Октябрь 23, 2017 15:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*