Малы фермеръёс арысь аре кулэсмо?

Удмурт Дунне
By Удмурт Дунне Октябрь 24, 2017 15:08

Фермеръёслэсь йӧлзэс но 2-тӥ сортэн лыдъяло, солы ичи дун пукто.

10 ар талэсь азьло гуртоос ас гидъёсазы вордӥзы 32 сюрс скал. Туннэ та лыдпус ог 2 поллы кулэсмемын.

Зэм, гуртын улӥсьёс но берло дыре синэмын. 1990-тӥ аръёсын ӵошатоно ке, гурт удысын ужасьёс али 3 поллы ичигес кылемын. Адямиос скал борды думиськыса уг уло ни.

— Голландиысь калык азьвыл ик ас гидаз скал уг ворды ни вал, — шуэ гурт удыс наукаосъя доктор, Ижысь гурт удысъя академиысь проректор Ильдус Фатыхов. — Шумпотоно соизлы: фермеръёс вань, югдурысь потыны юртто. Соос ёросъёсысь кыдёкысь гуртъёсты возё на.

 

Зэм, фермеръёслы но капчи уг йӧты. Бадӟымесь заводъёс соосты отӥгес каро, таин валче йӧлзэс но 2-тӥ сортэн лыдъяло, солы ичи дун пукто. Эштосъёсын оградэ султон вылысь шаерысьтымы подсобной хозяйство возисьёс, фермеръёс кылдытъяны кутскизы кооперативъёс. Зэм, Ильдус Фатыхов верамъя, переработкаен но заготовкаен вырись кооперативъёс совето вакытэ но вал, но али туссы воштӥськиз. Али кинлэн кыӵе фермерен кылыз тупа, валче ужан понна огазеясько. Алнаш ёросысь огез сыӵе кооператив 2014-тӥ арын 5 фермерез огазеяз. Пӧлысьтызы огез, 1990-тӥ арысен Чумолё гуртын фермер кариськыса ужась Сергей Константинов, шуэ:

— Оген ужаны секыт, тужгес но — кутскись фермерлы. Кооператив кылдытэм бере заводъёслы табере асьмеос дун пуктыны быгатӥськомы. Азьвыл уго огнад 500-600 литр йӧл заводлы ӵектӥськод вал. Нош дэмен — 7-10 тонна. Валамон ни, 1 литрзэ 1,5 поллы дуноенгес келяськод, завод но ачид бырйиськод. Собере, кооперативлы пудо эмъясьлэсь справказэ басьтыны но дунтэмгес усе: ваньмылы 1 кулэ уго, быдэн лэсьтонэз ӧвӧл ни. Со сяна, кооперативен бадӟым кредит басьтыны капчигес. Шуом, 1 техника 4-5 миллион манет сылэ ке, фермерлы огназлы сое басьтыны туж дуно усе, асдунзэ со олоку берыктоз ай. Нош дэмен трослы капчигес. Зэм, техникаез кысык бусы ужъёс дыръя куспамы люкыны секытгес.

Фермеръёс арысь аре кулэсмо. Куке-соку соос шаерамы 400 пала вал, туннэ 80-озь но уг вуо ни.

Сергей Константинов верамъя, кооперативен ужаку, бухгалтер но, молоковоз но 1 кулэ, ужась но ичигес кутоно. Та экономика ласянь туж юрттэ. Но кооператив кылдытыны дыртӥсьёс шаерамы трос ӧвӧл. Ваньбурез люконо луоз шуыса, кышкало. Ми но оген ужаса узырмомы малпамы вал, али гинэ валамы: дэмен капчигес, шуэ Сергей Константинов.

Дэри ёросысь гуртоос доры но кӧня ке пол ӧтчазы ни Гурт удысъя но сиён-юонъя министерствоысь специалистъёсты, визь-кенешен юрттыны курыса. Но татысь фермеръёс пӧлын но, хозяйствоос пӧлын но кооператив кылдытыны дӥсьтӥсьёс уг сюро на. Дэри ёросысь гурт удысъя управлениен кивалтӥсь Валериан Никитин верамъя, ас вакытаз 3 хозяйство огазеяськылӥз, но валче ужаны ӧз быгатэ. Ёросын агропарк но кылдытыны кутскизы, пӧртэм интыосысь продукциез татчы люкалозы но вузалозы шуыса. Агропарк туннэ ке но буш. Кооперативе кутскыны ог-огзылы но, улон-вылонлы но адямиос уг оско, шуэ Валериан Никитин. Субсидия но тросэз басьтыны уг быгато, нош бызьылонэз уно.

Фермеръёс арысь аре кулэсмо. Куке-соку соос шаерамы 400 пала вал, туннэ 80-озь но уг вуо ни. Соос но арлыдоесь, техниказы вуж, нош нылпиоссылэн музъем но пудо бордын выремзы уггес поты. Азьланяз фермеръёс тазьы ик синӥзы ке, кооператив, оло, огазеяськыны тужгес устоез амал луоз ай. Гурт удысъя но сиён-юонъя министрлэсь ужзэ быдэсъясь Александр Прохоров верамъя, туннэ частной подсобной хозяйствоын скал вордӥсьёс но кооперативъёсы огазеяськыны дасесь.

Елена Сараматова

Туспуктэм]`c: Александр Горбунов, udmurt.ru

Удмурт Дунне
By Удмурт Дунне Октябрь 24, 2017 15:08