Кык кыл вискын… Кин кызьы валаз Президентлэсь верамзэ

Удмурт Дунне
By Удмурт Дунне Октябрь 16, 2017 12:10

Россиысь фин-угор калыкъёслэн ортчем ӧтчамазы тужгес бугырес юанъёс-вераськонъёс герӟаськемын вал элькунъёсысь кун кылъёсты дышетонэн.

Макем тросгес кылъёсты тодӥськод — сокем тон азинскем адями.

Валтӥсь интыын — мылкыд

Пӧсьтолэзе Йошкар-Олаын ортчиз Калык кусыпъёсъя советлэн кенешез, солэн ужаз пыриськиз Владимир Путин. Отын со шуиз:

— Тодады вайытэме потэ, Россиын кун кыл луэ ӟуч кыл, соин ик сое кыӵе ке мукетыныз воштыны уг яра! Ӟуч кылэз тодыны кулэ котькудӥз Россиын улӥсь. Кунысьтымы калыкъёслэн кылъёссы — со озьы ик асьме лулчебермы, культурамы, аспӧртэмлыкмы. Соосты дышетыны право Конституциен сётӥське, но — мылкыд каремъя. Анай кыл луисьтэм кылэз дышетыны косыны уг яра! Уг яра со понна ӟуч кылъя урокъёсты кулэстыны.

Та кылъёс бере кин ке гуньдӥз, кин ке шумпотӥз.

Президентлэсь кылъёссэ ас палазы берыктӥсьёс шедизы. Соос пелязы понӥзы вераськемысьтыз нырысетӥ люкетсэ гинэ — ӟуч кылэз гажан сярысь. Нош мукет кылъёсты дышетыны право сярысь быдэс абзацлы йылпумъян 2 кылын лэсьтӥзы — «мылкыд каремъя».

Элькунъёсысь кылъёсъя югдурез тодыса, валатскыны луэ кадь, В. Путин, озьы вераськыкуз, нырысь ик Татарстан, Башкортостан но куд-ог Кавказ улосъёс сярысь малпаз шуыса. Но соос шараямын ӧй вал ук! Соин ик мукет улос кивалтӥсьёс, кудъёсыз ялан кык тыл вискын уло (огез шуэ: дышетоно, мукетыз — ӧвӧл), капчияк шокчизы кадь. Но мар карыны али но уг валало: угось национальной политикая стратегия дурбасьтэ выжы калыкъёслы, сое одно чакланы кулэ, но макем шуг трос пӧртэм калыкъёслэсь мылкыдъёссэс лыдэ басьтыны.

Та пумысен фин-угор калыкъёслэн 6-тћ ќтчамазы журналистъёс вазиськизы Россиысь Президентлэн администрациеныз кивал-тӥсьлэн воштӥсезлы Магомедслам Магомедовлы.

— Та удысъя туж чакласькыса ужано, уг яра чутрак карыны. Мон соглаш Президентэн: ӟуч кыл кунамы валтӥсь луэ, но со дыре ик нокин уг малпа выжы калыкъёслэсь кылъёссэс дышетонлэсь алыны. Солы пумит, ми вераськиськом луонлыкъёс кылдытон сярысь: юрттоно учебникъёс, книгаос поттыны, анай кылын ивор вӧлмытыны но мукет…

ДышетыТОН

Огласянь, паймоно: школаосын вань учебной планъёс юнматэмын, кызьы луэ кадь ӟуч кылъя урокъёсты кулэстыны? Президент янгышаз, дыр — угось милям пумисько учыръёс, куке анай кылэз кулэсто ӟуч кылъя ЕГЭ-лы дасяськон вылысь, оло, сое мыдлань вераз?

— Президент уг янгыша! Сыӵе учыръёс вань, — валэктӥз Кун Думаысь Ханты-Манси округлэсь депутат, Национальностьёсъя комитетлэн ёзчиез Татьяна Гоголева. — Башкириын, кылсярысь…

Зэм оло даур? Но Башкириысь Татышлы ёросысь Улын Балтач школалэн директорез Людвиг Зидымаков (со ӵапак ачиз но ӧтчамлэн делегатэз вал) зэмзэ но шуэ: бен, сыӵе учыръёс луыло. Вогъясько сьӧрлось лыктэмъёс, њучъяськыны турттӥсьёс, та интыосын кемалась улӥсьёс дышемын ини татысь сямъёслы: кулэ бере, башкир кылэз дышето. Мон, кылсярысь, шуэ Л. Зидымаков,  школаын дышетӥ башкир кылэз, тодӥсько сое, но улонын шер кутӥсько, малы ке шуоно ми палан чылкыт башкиръёс ӧжытгес уло, тросгес ӟучъёс, удмуртъёс, сураськем калыкъёс. Зэмзэ вераса, со вакытэ бырйыны луысал ке, пе, кужмысь дышетонлэсь палэнскысал, дыр — шуг потылӥз. Со амалъя ик кариськыны туртто табере куд-ог школаос — Башкириысь 3-яз школаын, пе, кун (башкир) кылэз дышетэмлэсь аналскиллям ни…

Нош Татарстанысь удмуртъёслэн автономизылэн кивалтӥсезлэн воштӥсез Марина Иванова дурбасьтэ элькунъёсысь 2-тӥ кун кылъёсты одно дышетытонлы:

— Мон Татарстанын будӥ. Малпанмы но ӧй вал бигер кыллэсь палэнскыны, дышетӥ, вераськисько, уг жаляськы — монэ бигеръёс но, удмуртъёс но гажало. Уг оскиськы «дыр быдтон» яке «вормонтэм шуг» шуисьёслы. Артэ улӥсь бускельёстэ тодон — со дыр быдтон шат? Соосты тодэм-валамедлы луыса тон азьланяз чальгес огъя кыл шедьтод, лэсьтоно ужъёстэ ӝоггес быдэстод. Шугез ласянь ке, татын мултэс кышкатъясько кадь потэ, угось кун кылэз дышетонъя программа «анай кыл» предметлэсь капчигес — нырысетӥяз огъя тодон-валан гинэ сётӥське, со урокъёсы ветлыса, кылтодос удысын бадӟым специалист уд луы, но бускельдэ валаны быгатод, солэсь историзэ, культуразэ, литературазэ тодод.

Азьлань мынон понна — берлань!

Ӧтчам бере, 3-тӥ коньывуонэ, ТАСС ивортӥз: Национальностьёслэн ужпумъёссыя федерал агентстволэн кивалтӥсез Игорь Баринов «Языковая политика: общероссийская экспертиза» форумын вераз: покчи классъёсын предметъёсты дышетыны луысал 2 кылын.

— Мон лыдъясько, улӟытоно 2 кылын дышетонэз. Озьы ӟуч луисьтэм пиналъёсты 2014-тӥ арозь дышетӥзы Уйпал Осетиын. Отын начальной классъёсын предметъёсты огдыре дышетӥзы анай кылынызы но, ӟуч кылын но. Та проект туж юрттысал Россиысь калыкъёслэсь кылзэс утьыны, — шуиз И. Баринов.

Валамон, та ужез улонэ пыӵатон понна тросгес кулэ луозы 2 кылэз ӟеч тодӥсь дышетӥсьёс, нимысьтыз дышетон пособиос. Кылсярысь, учебникын одӥг параграф сётэмын 2 кылын: огпалаз анай кылын, мукет палаз — ӟуч. Озьы пинал, огдыре кыксэ ик кылэз тодыса, будэ.

Усто! Тае лыдӟыса, сюлэм ик лычсузиз. Угось ӵапак та манеръя покчи классъёсын дышетӥзы милемды но. Зэм, соку ӧй вал 2 кылын учебникъёс, но милемлы удалтӥз дышетӥсен — ӟуч кылын лыдӟеммы бере со валэктэ вал, кызьы со луоз удмурт сямен. Озьы 2-тӥ классозь ми дышим ни ӟучез валаны, нош 4-тӥ классэ бадӟым школае мыныса, кылэз тодонын ӟуч эшъёсмес сутӥм но, кельтӥм но — изложениосмес-сочинениосмес «4»-лы, «5»-лы гожъям.

Мон малпамъя, 2000-тӥ аръёслэн кутсконазы оптимизациен йырин национальной школаосты ӧй пытсаллясалзы, анай кылэз предмет чотын утьысалзы ке, «одно дышетытон» котыр керетонъёс али ӧй луысалзы, угось асьмелэн кылмы нырысь ик кулэ асьмелы, нош куке тынэсьтыд мадэ ке талало, амалтэк кесяськем потыны кутске…

Мылкыдъёс

Валерий Марков, Коми Республикалэсь Федерация Кенешлэн ёзчиез:

— Палэнысен учконо ке, кылэз одно ик дышетытоно ӧвӧл. Чаклано, дась-а солы общество. Но соку малпаськоно: кызьы кылмес, одно дышетытытэк, утёно?

Совето вакытэ ай, 1959-тӥ-1960-тӥ аръёсы, реформа ортчиз. Соку кылъёсты ас мылкыдъя дышетыны лэзизы, нош со дырозь вал национальной школаос. Мон со системаез пырпотӥ, милям классамы вал ӟуч нылпиос, кудъёсыз милемын ӵош коми кылэз дышетӥзы. Реформа ортчем бере школаысьтымы 4 классъёс пӧлысь огез нырысетӥ араз ик куштӥськиз коми кыллэсь. Вуоно араз сыӵе классъёс 2 вал ини. Нош 2 ар ортчыса, 4 класс пӧлысь огаз но комиез ӧз ни дышетэ. Со вакытъёсы ми али берытскыны ум ни быгатэ — туж троссэ ыштӥмы. Улӟытыны котьку секытгес.

Ольга Смирнова, Вологда улосысь крезьгуръя дышетӥсь:

— Анай кылэз одно ик дышетоно. Туж алама, тросэз егитъёс али ас кылзэс уг тодо ни шуыса. Мон кивалтӥсько вепс нылпи ансамблен, но дорам вепс пиналъёс гинэ уг ветло, ӟучъёсыз но гожтӥсько. Соос тунсыкъясько вепс культураен но, кылэн но. Уг малпаськы, тодэмзы соослы куке люкетоз шуыса, эшшо лыдэ басьтоно ке, ёросамы кӧня ке вепс гуртъёс шуыса.

Пусйыны кулэ на: мон ӟуч черкогуртын улӥсько, но берло дыре татчы тросгес но тросгес калык улыны выже матысь гуртъёсысь, соин черкогуртмы каллен вепсомыны кутске ини.

Татьяна Шкляева, Удмуртиысь «Лудорвай» музейлэн директорез:

— Дышетскон ноку уродзэ ӧз лэсьты на. Туж умой пример — палэнысь удмуртъёс. Татарстанысь потэмын тодмо адямиос Пётр Данилов, Геннадий Кузнецов. Соос 3-4 кыл тодо. Со понна соосты асьсэлэн каро удмуртъёс но, бигеръёс но, поръёс но, ӟучъёс но. Кияса ёросысь Уддядиысь Ӝакы апай, сям-йылолъёсты, вашкала кырӟанъёсты утись, тодэ бигерзэ но, порзэ но. Со нокинлэсь юаса ӧз улы, дышетоно-а, ӧвӧл-а со кылъёсты. Мукет калыкъёсын кусып возьыса, соослэн кылынызы вераськыны кутскиз.

Зинаида Рябинина

Туспуктӥз А. Горбунов

 

Удмурт Дунне
By Удмурт Дунне Октябрь 16, 2017 12:10