Кыӵе мылкыд кузьмаз Егитъёслэн но студентъёслэн фестивальзы

Удмурт Дунне
By Удмурт Дунне Октябрь 26, 2017 15:00

Таяз арняе Сочиын йылпумъяськиз Дуннеысь егитъёслэн но студентъёслэн 19-тӥ фестивальзы. Кыӵеен со тодэ кылёз? Асьсэ мылкыдъёссэс верало отчы ветлэм егитъёс.

 

Мария Галеева, журналист:

— Сочие вуэммы бере ик ми, Удмуртиысь делегация, флешмобмес эктӥм, адӟытӥм, удмуртъёс лыктӥзы шуыса. Фестиваль ӵоже удмурт эшъёсыным ӵош удмурт дэремен ветлӥм, мукетъёсыз — удмурт пужыосын вакчи саестэмъёсын. Удмурт сямен эктылӥм, кырӟаллям. Адямиос милемыз тодмало вал ни: «Ӟечбуресь, удмуртъёс!» шуыса ортчылӥзы. Берлогес фестивальын концерт сётӥзы «Айкай» но «Сайкан» (Воткинскысь крезьчиос) ансамбльёс.

Фестивале лыктӥллям сюлмо адямиос. Кылсярысь, Непалын ӟуч архитектор ас кужмыныз школа пуктэм, нош Индиысь егит адями кутскем жуг-жаг бичаны, берло со борды мукет адямиос но итӥськиллям. Озьыен, пичи малпан бадӟым проектлы пӧрмем. Та адямиос шоры учкыса, валаськод: дуннеез умойгес карыны луэ, адямиос асьсэос тыныд юрттӥськыны дась. Мылкыд ӝутске: та улондэ огшоры ортчытоно ӧвӧл — пайда ваёно.

Туж трос пумиськылонъёс, лекциос, мастер-классъёс ортчылӥзы. Нырысь тодмо артистъёс доры ветлыны тыршылӥм, но черодын сылыса, туж трос дыр быре. Малпамы: пайдаёгес луоз лекторъёсты кылзыны. Дизайнъя лекциын вераськимы фестивальлэн пусэз сярысь. Лектормы шуиз: со туж яркыт, чебер, но отын пуштросэз ӧвӧл. Почталэн сэрегаз милемлы открытка сётъязы, мон отысен ик кӧнязэ ке Иже ыстӥ. Озьы ик вуылӥ кунгожсьӧр ужъёсъя министр С. Лавров доры. Но политик огъя кылъёсын гинэ вераськиз. И. Бутман джазменлэн концертаз туж шуг сюрыны вал, но ми пыримы. Артистлы но быдэс оркестрезлы удмурт саламъёс кузьмамы, тау каримы, соос П. Чайковский нимо фестивале дорамы вуылӥзы шуыса. И. Бутман шумпотӥз, «мон ваньмыныды туспуксё», шуиз.

Фестивальын адӟиськиз котькуд калыклэн сямыз. Асьме калык кезьыт ке, Америкалэн лымшор палъёсысьтыз адямиос туж ӟырдытэсь. Выль тодмоосын англи кылын вераськылӥмы. Но, кылъёсты тодытэк но, ог-огдэ валаны луэ вал. Выль эшъёсмес «Инстаграмын», «Фейсбукын» шедьтылӥм, ог-огмылы кузьмаськылӥм. Мон Пакистанысь нылашлы помада кузьмай, кӧня ке улыса, со мыным кышет сётэ, ӵапак удмурт дэремелы тупа, дыртонъям кышет кутыны вунэтӥськем вылэм. Адямиос асьсэ уксёенызы вошъяськизы. Удмурт делегацилэн малпанэз кылдӥз пӧртэм калыкъёслэн манетъёссылэсь бадӟым уксётӥрлык лэсьтыны.

Юрий Николаев, спортсмен:

— Удмуртиысь делегациямы пыриз 125 адями, чылк-чылк удмурт кылын вераськись удмуртъёс ӧжыт вал, 8-9 адями. Нимаз мынӥзы на ог 60 кузя волонтёръёс. Фестивальлы зол дасяським, вуоно эшъёсмылы кузьымъёс лэсьтылӥмы: удмурт мунёос, валъёс но мукет… Фестивальын иностранецъёсты капкаен шудыны дышетӥм, мон арганэн шудӥ, Вася эше — баянэн.

Кыкетӥ нуналаз гожтӥськи 4 иськеме бызьылонъя ӵошатсконэ. Стартэ ог 3 сюрс адями потӥз. Ӝыны сюресме, дыр, 4-тӥ бызи, финише вуыкум, 3-тӥ интые потӥ ни.

Тырши спортивной форумъёсы ветлыны. Сюлмам зол пыӵаз ЦСКА клубысь баскетболистэн, олимпийской чемпионэн Сергей Таракановен пумиськон. 5 час пала со милемын баскетболэн шудӥз, дышетӥз. Трос выльзэ тодӥ. Форуме вуэмъёс пӧлын спортсменъёс трос ӧй вал бере, спорт ужрадъёсын но калыкез ичи вал. Бадӟым черодъёс вал столовойын — ӵукназэ сиськон, озьыен ужан нунал но, 6 часысен кутскылӥз, тросэныз адямиосын, черодын сылыкумы яке ӝӧк сьӧрын пукыкумы, тодматскылӥмы. Выль эшъёсы кылдӥзы Австралиын, Молдавиын, Африкаын, Сербиын, Кубаын… Дизайнъя мастер-классын Пакистанысь адямиен парен ужамы, бизнес-план лэсьтӥмы, со англи кылэз умой уг тоды, кызьы но озьы ог-огмес валамы ни…

Фестивалез ворсан нуналэ Владимир Путин вуылӥз, вискамы ог 30 метр вал. Шуиз: фестивальын басьтэм тодон-валанъёстэс сьӧрады нуэ но улонэ пыӵатэ. Кунгож сьӧрысь вуэмъёс президентмес гажало, калык кесяське: «Путин, Путин!» Иностранецъёс Россия сярысь туж трос лякыт кылъёс веразы.

Илья Ишмуратов, туспуктылӥсь:

— Фестивальын мон фотограф сямен ужай. Радъясьёс юромо журналистъёслэсь команда кылдытӥзы, соос фестивальлэн улонэз сярысь мерлыко бамъёсы мед гожъялозы шуыса. Ог 5 газет но поттӥм. Фестивальлэн пуш улонэз огыр-бугыр пӧзиз. Уй но нунал тыршим. Нуназе ужрадъёсы вуылӥм, уйин монтировать каримы, фотоос бырйылӥмы. Изьыны одӥг час сяна ӧз кыльылы.

Ми матысь ужам дуннеысь тодмо фотографъёсын но видеооператоръёсын. Пыриськи кинолабораторилэн ужаз. Видео шоры мукет синмын учкыны кутски. Туспуктэм но видео кулэ возьматыны адямилэсь мылкыдзэ, пӧртэм чыры-пырыос пыр — мур малпанэз.

Кылдӥз футболэн шудыны, Казахстанысь футболъя сборнойлэн валтӥсь тренерез Юрий Красножан монэ Азия континентлэн сборнояз ӧтиз. Вормыны ӧз кылды. Но 3-тӥ инты басьтӥ флэтболын. Та выль амал — пичи бусыын кык адямиос ог-огзылы пумит шудо.

Малпасько, талэсь бадӟым ужрадъёс улонам уз луэ ни.

Мария Векшина

Туспуктӥз И. Ишмуратов

Удмурт Дунне
By Удмурт Дунне Октябрь 26, 2017 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*