Компьютерлэсь люкоз киуж

Удмурт Дунне
By Удмурт Дунне Октябрь 9, 2017 15:54

Пичи Пурга черкогуртысь нылпиослы ватсаса тодон-валан сётонъя центрысь кивалтӥсьлэн воштӥсез Ольга Хохрякова тодэ, кызьы туала пиналъёсты компьютерлэсь но телевизорлэсь люкыны луэ. Киужен гочатоно!

Пичи Пургаысь нылпиослы ватсаса тодон-валан сётонъя центрысь дышетӥсьёс.

— Ольга Витальевна, кыӵе удысъёсын туннэ пиналъёсты бордады кыскыны тыршиськоды?

— Нылпиослэсь быгатонлыкъёссэс котыр ласянь волятон понна 6 ӧръёс борды басьтӥськимы: «Туризм но шаертодон», «Физкультура но спорт», «Чеберлыко дунне», «Наука», «Улон-вылонын юрттэт сётон», «Техника».

Нылпиос дорамы ветло, дун тырытэк. Соос тужгес кельшыто «Чеберлыко дуннеез». Отчы гожтӥськемын 800-лэсь ятыр адями. Мугез, малпасько, валамон: та ӧръя кылдытӥмы 37 пумо тунсыко программаос, соос герӟаськемын суредаськонэн, эктонэн, крезьгурен, киужъёсын… Тани киужъёсты басьтоно ке, пиналъёсты туала но, вашкала но амалъёсын тодматыны тыршиськомы. Небыт шудонъёс гинэ уг вуро, куролэсь, горд сюйлэсь, ыльняньлэсь арбериос лэсьто.

«Туризм но шаертодон» люкетэ гожтӥськемын ог 200 мурт. Соос шаермылэн ортчем сюресэныз тодматско, Яган-Докъялась но Пугачёвоысь школа музейёсы вуыло, нюлэскы потало. Техникаен тросгес пиос тунсыкъясько. Паймыто милемыз — роботъёс, самолётъёс пӧрмытъяло, компьютерен программаос шаплы кылдыто.  Наука котыре кыстӥськись пиналъёс дышетӥсьёсын ӵош пӧртэм семинаръёслы докладъёс дасяло. «Улон-вылонын юрттэт сётонын» психологъёсын пумиськонъёс луо.

Ичигес нылпиос люкасько «Физкультурае но спортэ» — 58 мурт. Соин, дыр — шашкиен яке шахматэн шудон понна, визьмо сяна, чидась луоно, нош тросэз пиналъёс интыязы пукыны уг ярато. Азьланяз, оло, удысъёсмес паськытатомы на. Угось туала дышетскисьёслэн выль малпанъёссы йыразы пӧзё. Ӵектонъёссэс нуналлы быдэ сямен верало.

— Пусъёно, дыр, сое но: центр таза нылпиосын гинэ уг ужа, ас котыраз висисьёссэ но люка.

— Зэм, та дырлы ми доры 7 покчи инвалид ветлэ. Пӧлысьтызы куд-огез воксё абдратэ: тазалыкез ляб шуыса уг учкы, 1 гинэ ӧвӧл, 2 но, 3 но кружокъёсы вуттӥське.

Киоссы но, сюлэмъёссы но — зарни

— Центрлэн юртэз но, ужасьёсыз но синмаськымонэсь. Соин малпан кылдэ: шуг-секытъёс палэнтӥды ортчо.

— Сюлмаськонъёсмы вань. Юртмы чебер ке но, пичи. Пиналъёсты огвакытэ огазе люканы ум быгатӥське. Нош дорамы лыктыны мылкыд карисьёс али трос. Матысь дыре нылпи садэ ветлӥсьёслы — 50 муртлы — 5 группа усьтыны чакласькомы. Кылем арын 25 нылпиен ужамы вал ини. Дышетӥсьёсмы соосты школалы дасяло. Анай-атайёс та понна уксё тыро.

Мукет но малпанмы вань — бадӟымъёслы киужен вырыны кружок. Тазэ но дунын каромы, вылды. Угось центрмес тупатъянлы, ӝӧк-пукон басьтонлы трос уксё кулэ. Та сяна, ӧвӧл техникамы. Пиналъёсты пӧртэм конкурсъёсы, смотръёсы вуттон понна анай-атайёслы сюлмаськоно луэ.

— Пӧртэм ӵошат-сконъёсын вормыны удалтэ-а?

— Пиналъёсмы адӟем карымонэсь. Соослэсь вань вормонъёссэс гожтыны газет бам уз тырмы. Кылсярысь, туэ Анна Корепановамы «Зелёная планета» элькун конкурсын 1-тӥ луиз, Снежана Овчинниковамы «Рукотворные чудеса» ӵошатсконын вормиз. Юля Кабановамы «Удмурт дуннелэн» конкурсаз вормыса, «Шундыкар» лагере вуылӥз. Нош Кирилл Возняковмылы удалтӥз ини Удмуртилэн палэназ но кужымзэ мертаны. Сочиын ортчиз калыккуспо но ӟуч шашкиен шудонъя ӵошатскон. Отысь со Россилэн чемпионэз луыса бертӥз, озьы Россиысь ӟуч шашкиен шудӥсь егитъёслэн сборной командаязы шедиз. «Блеск» театрмы но республикамылэн палэназ потаз ини. Россиын ортчем «Звёздный старт», «На крыльях таланта», «Московское время» но мукет конкурсъёсысь дипломъёсын но кузьымъёсын бертӥз.

Ольга Корепанова

 

Удмурт Дунне
By Удмурт Дунне Октябрь 9, 2017 15:54