«Камамберез» воштоз «Пурысьта»

Удмурт Дунне
By Удмурт Дунне Октябрь 19, 2017 15:31

Кеч йӧллэсь сыр лэсьтон.

Ижын усьтӥськиз кеч йӧллэсь сыр лэсьтонъя пичи завод — «ТурынГурт». Отчы йӧл вуттон сярысь сюлмаське Дэри ёросысь «Шурдымка» кооператив.

Туннэ нуналлы «Шурдымка» бурд улаз басьтӥз ини ёросысь 46 подсобной хозяйствоосты. Одӥгъёсыз 2-3 кеч вордо, мукетъёсыз — 10-лэсь ятыр. Кин ке 2-3 литр йӧл вуттэ, кин ке 35 но люканы быгатэ. Кооперативлэн тӧроез Людмила Иванова вера:

— Пудолэн одно ик ветеринарной книжкаез луыны кулэ. Сотэк калыклэсь йӧлзэ ум кутӥське. Кинлэн сое ми дӥне вайыны луонлыкез ӧвӧл, сыӵеос доры асьмеос потаськомы. Тани ёросысьтымы Маня песянаймылы 84 арес ини, но со али но кеч вордэ, 3-5 литр йӧл кыске. Нуналлы быдэ дораз вуылӥськомы. 1 литрзэ 80 манетэн кутӥськомы.

Кооператив ёросысь кеч вордӥсьёс пӧлын юалляськон ортчытӥз: кыӵе шуг-секытъёсын соос пумиськыло, кызьы юрттыны луоно? Гуртоос пусйиллям: уг тырмы музъем, пудо вордон сэрег. Та ужпумъёсты «Шурдымка» азьланяз сэрттыны-пертчыны малпаське.

— Азямы 2 бадӟым уж пуктӥськомы, — вера Людмила Леонидовна. — Нырысетӥез: пудолэсь выжызэ воштон. Шаерамы кечъёс трос, но соос огшоры выжыысь, йӧл ӧжыт сёто. Соин ик азьланяз чешской выжыысь 100 кеч басьтыны малпаськомы. Та пудо асьме куазьлы туж тупа, котькуд нунал 4 литр йӧл сётэ, наплыкез но усто — ӵапак сыр дасянлы кадь. Али утчаськомы юрттӥсьёсты, угось талы трос коньдон кулэ луоз — 1 кеч ог 40 сюрс манет сылэ.

Кыкетӥез: турын дасян. Кеч пуж-пуж йӧл мед сётоз шуыса, сое 250 пумо турынэн, ньӧрен, емышен сюдоно. Ваньзэ тае воштыны быгатэ 1 соргосудантовой турын. Сакырез кукурузаынлэсь тросгес — 16 процент, ӝуждалаез — 2 но ӝыны метр. Шаерамы паськыт вӧлмемын ӧвӧл на. Адӟод сое Алнаш, Пичи Пурга, Глазов ёросъёсысь гинэ. Соин ик, пӧртэм тодосчиосын огазе кариськыса, сое кизён борды басьтӥськомы. Ас кужыменымы гинэ та ужез ум ворме — турын трос утялтэмез, тодон-валанэз кулэ каре, — вера Людмила Иванова.

«ТурынГуртын» та вакытэ кеч йӧллэсь 8 пумо сыр лэсьто.

«ТурынГуртын» та вакытэ кеч йӧллэсь 8 пумо сыр лэсьто. Котькудӥзлэн шӧмыз аспӧртэмлыко, нимыз мудрон: «Пужйола», «Кечийола», «Пурысьта»… «Пурысьта» тупа Франциысь туж дуно «Камамбер» сырлы, губилэсь дасямын кожалод. Но отчы со чик йылтэмын ӧвӧл. Ог 3 арня куспын сырлэсь шӧмзэ лэсьто нимысьтыз бактериос. Адями сырез интыысьтыз одӥг-ог вырӟытъялля гинэ.

Заводэз усьтонэ вуылӥзы Правительстволэн Тӧроезлэн нырысетӥ воштӥсез Александр Свинин, гурт удысъя но сиён-юонъя министрлэсь ужзэ быдэсъясь Александр Прохоров. Горд лентаез вандэмез бӧрсьы А. Свинин шуиз:

— 1-тӥ ноябрьысен завод гижысь-пиньысь ужалоз — нунал куспын 600 литр йӧл бичалоз но ог 80 килограмм сыр дасялоз. Туннэ огкылэ вуимы ини Санкт-Петербург, Тверь городъёсын. Отчы но дасям сиёнмес келяломы. Кооперативъёс усьтӥськозы на Сарапул, Дэбес ёросъёсын.

А. Прохоров ватсаз на: та выллем проектъёс Удмуртиез ӟеч азинтыны юртто. Луонлык сёто йӧл поттонэз 2020-тӥ арлы 1 миллион тоннаозь вуттыны. Озьыен, та завод берпуметӥез луыны кулэ ӧвӧл.

Ольга Корепанова

Удмурт Дунне
By Удмурт Дунне Октябрь 19, 2017 15:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*