Ижысь гурт удысъя академиын экономикая диктант ортчоз

Удмурт Дунне
By Удмурт Дунне Октябрь 9, 2017 13:35

Кутскоз со 12-тӥ октябре 10 часын ӵукна. Удмуртиын гинэ со нырысьсэ уз радъяськы — быдэс Россиын.

Диктант пыр потыны быгатозы доразы пукисьёс но. Со понна нырысь Россиысь экономикая огазеяськонлэн (ВАО) сайтаз пусйиськоно.

Диктантэз гожтыны быгатэ котькуд мылкыд карись. Со понна паспортэн лыктоно Ижысь Свердлов ульчаысь 30-тӥ юртэ — гурт удысъя академие. Та ужрадлы чакламын 3 аудитория. Диктант понна кыл кутэ шаерысьтымы тодмо экономист, ИжГСХА-ысь профессор Пётр Акмаров.

— Малы сое ортчытоно кариськимы? — вера Пётр Борисович. — Милям тодэммы потӥз, калыкмы экономика удысэз макем мур вала, таин валче дышетон учреждениослы малы бадӟымгес саклык висъяно. Пӧртэм аресъемъёслы диктантлэсь 3 вариантсэ дасямы. Юанъёс сяна, отын луозы задачаос но. Соосты сэрттыны-пертчыны сётӥськоз 1 час.

Диктант пыр потыны быгатозы доразы пукисьёс но. Со понна нырысь Россиысь экономикая огазеяськонлэн (ВАО) сайтаз пусйиськоно. Татын визь сынан 12 часын кутскоз. Йылпумъянъёсты адӟыны луоз 13 часын.

Кин сое бумага вылэ гожтоз, баллъёссэ тодоз 25-тӥ октябре. 80 но солэсь тросгес балл люкам студентъёс, школаын дышетскисьёс ӧтемын луозы экономикалы сӥзем фестивале.

Ольга Корепанова

 

Удмурт Дунне
By Удмурт Дунне Октябрь 9, 2017 13:35