Герман Ходыревлы — 85 ар. Малы сое «шундыё» нимало вал?

Удмурт Дунне
By Удмурт Дунне Октябрь 24, 2017 11:07

Герман Ходырев ӧз люкиськылы балалайкаеныз.

Нылпи писателез буре вайыса, Ижысь Эшъяськон юртын ортчиз паймымон ужрад, со милемыз выльысен нылпи вакытэ берыктӥз кадь.

Быдэс зал тыр вуиллям Герман Алексеевичлэн матысь эшъёсыз, ӵош ужам юлтошъёсыз, лыктӥллям кыдёкысь Алнашысь но — писательлэн вордӥськем черкогуртысьтыз. Ӝыт ӵоже чузъяськизы кылбур чуръёс, кырӟанъёс, тодэ ваёнъёс но критикъёслэн малпанъёссы. Соос ваньзы сямен пусъё кылбурчилэсь бадӟым талантсэ, нылпиосты валаны быгатэмзэ но пальышась сямзэ — та понна сое ӵемысь «шундыё» нималлязы.

Герман Алексеевич пушкын улӥзы кылбурчи но крезьгурчи. Со ӧз люкиськылы балалайкаеныз.

— Герман Ходыревен эшъяськеммы — Удмуртиысь крезьгуро улонмылэн огез тужгес узырез вакытэз, — вера крезьгурчи Юрий Толкач. — Со вал туж крезьгуро адями, ялан ветлылэ вал милям концертъёсамы. Ӵошен ми ог 40 произведение гожтӥмы. 70-тӥ-80-тӥ аръёсы кырӟанъёсмы туж тодмоесь вал, соосты быдэсъязы шаерысьтымы нылпи коллективъёс. Куд-огъёсыз али нылпи садъёсын но, крезьгуро школаосын но чузъясько.

Озьы Герман Ходыревлэн кылбуръёсызъя гожтэм кырӟанъёсты быдэстӥзы Ижысь пӧртэм школаосын, крезьгуро колледжын дышетскисьёс.

— Атайлэн кылбуръёсызлы, крезьгурезлы, солэн ӟеч сямызлы луыса мон таӵе будӥ, — вера писательлэн нылыз — Удмуртиысь Крезьгурчиослэн огазеяськонэнызы кивалтӥсь Марина Ходырева. — Пичи дыры ортчиз балалайкалэн чузъяськемез улсын. Атае ялан монэ лӧпкытъя вал, тынад ваньмыз пӧрмоз шуыса. Марлы паймисько вал? Мон изьыны выдӥсько — атае, кылбуръёс гожъяса, пуке, школае мыныны султӥсько — со нош гожъяськыса пуке. Ку изьыса вуттылӥз? Котькуд ӝытсэ пальпотыса бертылӥз, малы ке шуоно со вал нылпиосын пумиськонын яке ёросэ потаз. Отысь трос пӧртэм учыръёсты вайылӥз, кудъёсыз берло кылбуръёс луылӥзы.

Ижын улыны кутскемез бере калык писатель ялан вуылӥз шоркарысь 20-тӥ школае. Али отысь музей нуллэ Герман Ходыревлэсь нимзэ. Арбериосты, книгаосты утем сяна, со радъялля вольыт лыдӟиськисьёс, суредаськисьёс куспын конкурсъёс, нуэ эскерон уж.

Кылем арын Марина Ходырева Йӧскалык библиотекалы атаезлэсь 120 книгазэ кузьмаз, котькудаз Г. Ходыревлэн киыныз маке но гожтэмын. Та пумысен нимысьтыз эскерон уж лэсьтэ Йӧскалык библиотекаын ужась Лариса Дмитриева.

Кылбуръёс сяна, Герман Ходырев гожъялляз документальной повестьёс, публицистика, критика. Нош солэсь творчествозэ эскерисьёс вань меда? Кызьы вера кылосбур наукаосъя доктор Татьяна Зайцева, Герман Ходыревез, векчи темаосъя гожъяськиськод шуыса, янгыше уськытъязы. Нылпи литература азбар сьӧры уг поты, шуылӥзы (Герман Ходыревлэн огез книгаез «Милям азбарамы» нимаське). Таӵе кылъёс бере тросэз куатаськысалзы но литератураысь кошкысалзы ни. Нош кыӵе кужмо вылэм Герман Ходырев. Жаляса верано, удмурт нылпи литературалэн историез гожтымтэ на, одӥг нылпи авторъя но монография ӧвӧл.

Оглом вераса, Герман Ходырев дуннеез нылпи синмын адӟиз. Озьы ӧй луысал ке, писательлэн творчествоез ӧй лякиськысал нылпилэн сюлмаз. Уго али но, быдэ вуыса, «шундыё» Ходыревлэн книгаосыз вылын будэм адямиос учкытэк вераны быгато солэсь чуръёссэ.

 

Мария Векшина

Удмурт Дунне
By Удмурт Дунне Октябрь 24, 2017 11:07