Фин-угор прессалэн фестивалез: «Удмурт дунне» газетлэсь адӟем кароно!

Удмурт Дунне
By Удмурт Дунне Октябрь 11, 2017 11:13

Фин-угор газет-журналъёсын ужасьёслэн фестивальёссы ортчыло ини 2003-тӥ арысен. Нырысетӥ фестиваль радъяськиз Марий Элын. Но историез тодэ ваёно ке, солы кутскон сётэмын вал удмурт музъем вылын.

Удмуртиысь делегация.

Ог 15 ар талэсь азьло Глазовын ортчиз фин-угор журналистъёслэн семинарзы. Сое дасян бордын соку ужазы «Удмурт дунне» газет но Удмуртиысь Журналистъёслэн огазеяськонзы. Та семинарын огкылэ вуэмын вал: Россиысь фин-угор газетчиослэн сюлмаськонъёссы огвыллемесь, соосты капчиенгес сэрттыны-пертчыны луысал, ӵемгес пумиськылыса. Тӥни озьы 2 арлы одӥг пол ортчылыны кутскизы фин-угор СМИ-ослэн фестивальёссы, соосты радъян сярысь журналистъёс гинэ ӧвӧл, интыосысь кивалтэт но сюлмаське. Та дыр ӵоже фин-угор иворчиос ог-огенызы юн кусып тупатӥзы, огазеяськонзэс кылдытӥзы, зэмос ӵыжы-выжыос кадь луизы. Улонэ пыӵазы трос гинэ тунсыко проектъёссы.

Ханты-Мансийскын фестиваль нырысьсэ радъяськиз. Зэм, куд-ог улосъёсъёсысь журналистъёс сокеме вуыны ӧз быгатэ, коньдон ласянь но шугъяськонъёс шӧдӥськизы, лэся. Озьы фестивале пыриськизы Ханты-Манси автономной округысь, Удмуртиысь, Мордовиысь, Марий Элысь, Коми Республикаысь, Пермь улосысь журналистъёс. Интыысь кивалтӥсьёс ужрадлы бадӟым саклык висъязы. Правительствоезлэн юртаз ортчиз финн-угор СМИ-ослэн туала вакытэ улэмзылы сӥзем кенеш. Солэн ужаз пыриськизы Пӧртэм калыкъёслэн журналистиказыя гильдилэн кивалтӥсез Маргарита Лянге (Москва), Югра губернаторлэн нырысетӥ воштӥсез Алексей Шипилов, Уйпалась ӧжыт лыдъем калыкъёслэн ассамблеяенызы кивалтӥсь Еремей Айпин, Россиысь фин-угор журналистъёслэн огазеяськонзылэн кивалтӥсез Николай Ишуткин, «Ханты-Ясанг» и «Луима серипос» газетъёслэн огазеям редакцизылэн кивалтӥсез Раиса Решетникова но мукетъёс. Кенешын оглом фин-угор журналистикаысь югдур сярысь верамын вал. Удмуртъёслэн нимынызы доклад лэсьтӥз «Удмурт дунне» газетлэн редакторезлэн воштӥсез Елена Миннигараева.

Ханты-Мансийскын фестиваль нырысьсэ радъяськиз.

Кенеш бере вераськон азинскиз котрес ӝӧк сьӧрын. Кызьы газет-журналъёслы выль технологиосты кутыса ужано? Марлы тужгес бадӟым саклык висъяно? Паймоно кадь, но куд-ог редакциос али но малпало на: азьвыл сямен ик ужаса, огсыр улыны луоз. Но улон воштӥське. Соин валче воштӥськыны кулэ газет-журналъёс но, соослэн ужан амалъёссы но. Тросэз ӝожтӥсько Интернет вотэс, пӧртэм гаджетъёс пумысен, соосын сэрен, пе, изданимес лыдӟемысь дугдӥзы. Нош асьсэос изданиос мар каризы сыӵе югдурысь потон понна? Мар лэсьтӥзы калыклы матэгес, тунсыкогес луон вылысь? Кыӵе проектэнызы, яркыт уженызы ушъяськыны быгато?

 

Котрес ӝӧк сьӧрын «Удмурт дунне» газетлэсь туала амалъёсты кутыса ужамзэ умоен пусйизы, та ласянь удмурт газетлэсь адӟем кароно, шуизы. Егит журналистъёслы, кылсярысь, тужгес яраз «Удмурт дунне» газетлэн социальной сетьёсын шаплы ужамез но мобильной приложенизэ кылдытон сярысь малпанэз. Тунсыко ужан амалъёссы сярысь мадизы мукет улосъёсысь газетчиос но. Кылсярысь, Мордовиысь «Якстерь Тяштеня» («Горд кизили») нылпи журнал творчествоя мастерскойёсты радъя, нош Марий Элысь «Кугарня» егит лыдӟисьёсты кыскон вылысь гурт шудонъёс ортчытъя. Удмуртиысь «Вордскем кыл» дышетӥсьёслы чакламын ке но, покчиослы пичи книгаос поттэ.

Фото Константина Ижболдина.

Котрес ӝӧк сьӧрын «Удмурт дунне» газетлэсь туала амалъёсты кутыса ужамзэ умоен пусйизы, та ласянь удмурт газетлэсь адӟем кароно, шуизы.

Оглом таӵе малпан кылдиз: Россиысь фин-угор газетъёсты 3 люкетлы висъяны луоз. Одӥгъёсыз ялан дасяк улыны тыршо на, вылӥысь гинэ коньдон но юрттэт возьмало, тросгес ӝожтӥсько (кивалтӥсьёс вылэ но, начар лыдзисьёссы вылэ но). Кыкетӥосыз мылысь-кыдысь ужало, но туала амалъёс шоры кышкасагес учко, сайтсы вань ке, ярам ни. Куинетӥосыз газет но потто, кыдёке азьпала учкыса, выль технологиосты но куто, оско: одӥгез мукетызлы уг люкеты. Валамон соиз но: вань фин-угор изданиос — со огшоры СМИ-ос гинэ овол, со аспӧртэм центръёс, кудъёсыз котыре бинисько анай кылзэс, культуразэс утись, дунъясь но азинтыны тыршись адямиос. Соин ик сюлмаськонъёс трос ке но, азьлань вамышъяно.

Фестивале пыриськисьёс нимысьтыз резолюция кутӥзы. Соя Россиысь фин-угор журналистъёслэн огазеяськонзы интыосысь парламентъёсы вазиськыны кулэ СМИ-ос сярысь законэ воштонъёс пыртон ласянь. Резолюциын пусъемын на: газет-журналъёс мыло-кыдогес ужаны кулэ сайтъёссы бордын. Азинтоно журналистъёслэсь но фотокорреспондентъёслэсь тодон-валанзэс будэтонъя семинаръёсты радъянэз, кадръёсын ужанэз.

Ханты культураен тодматскон.

Фестивальын ик тужгес быгатыса ужась фин-угор изданиос портэм дипломъёсын пусъемын вал. Шумпотымон, сыӵеос радэ Удмуртиысь 5 издание пыриз. Тунсыко но пайдаё проектъёссы понна пусъемын «Удмурт дунне» газет, «Кенеш», «Кизили», «Вордскем кыл» журналъёс но «Иднакар» газет.

Фестиваль туж чебер йылпумъяськиз: вань фин-угор журналистъёс Ханты-Мансийскысь «Ханты Ясанг» газетэз 60 аръем юбилееныз ӟечкылазы. Ужрадэ ӧтемын вал хант газетын уно аръёс ӵоже ужам ветеранъёс, кылбурчиос, писательёс. Соос туннэ нуналлы но туж шаплыесь, уйпал калыкъёслэн общественной огазеяськонъёсазы пырисько, асьсэ кылзэс но культуразэс туж гажало, яратоно газетсылы кылбуръёс, кырӟанъёс сӥзё. Туннэ нуналлы Ханты-Манси округын 30 сюрс пала хантыос уло. Но зэмзэ но асьсэ кылынызы верасько, пе, 4,5 сюрсэз гинэ. Валамон, таӵе дыръя бадӟым тиражъёс сярысь вераськыны уг луы. Но «Ханты Ясанг» газетлы луыса уноез анай кылзэс выльысь дышетыны кутско. Шумпотымон соиз но: газетын трос егитъёс ужало.

 Елена Миннигараева

Туспуктэмъёс: fb.com (Елена Миннигараева)

Удмурт Дунне
By Удмурт Дунне Октябрь 11, 2017 11:13