«Элькуновидение» вожвылъяськонэ вуиз ни 18 куриськон

Удмурт Дунне
By Удмурт Дунне Октябрь 6, 2017 09:28

21-тӥ коньывуонэ «Мынам Удмуртие» телекомпания 6-тӥзэ ни ортчытэ «Элькуновидение» вожвылъяськон. Отчы куриськонъёс 7-тӥ коньывуонозь гинэ кутӥськозы на. Кин ӧз вутты, дыртэлэ!

Конкурс арлы быдэ концертной залын, телевизоръёс азьын люка быдэс элькунэз. Кин вормоз — калык бордысь потэ вал. Но туэ конкурсэ куд-ог воштӥськонъёс пыртэмын.

— Азьло «Элькуновидение»  — со кырӟанлэн конкурсэз вал, али шуиськом: со — кырӟасьёс куспын вожвылъяськон, — вера «Мынам Удмуртие» ТРК-ысь журналист Светлана Пикулева. — Воштӥськемын дунъян амалъёс. СМС-куара сётон кыле — кин  тросгес куара басьтоз, соослы учкисьёслэсь кузьым сётӥськоз. Нош вормисьёсты быръёз нимысьтыз жюри. Кин отчы пыроз, тодмо луоз конкурслэн финалаз гинэ.

Та дырлы вожвылъяськонэ итӥськизы ни 18 кырӟасьёс. Ижысь, элькунмылэн сэрегъёсысьтыз сяна, Башкириысь но Татарстанысь. Тросэз нимъёс ми понна вылесь.

Кырӟасьёс пӧлын уноез егитъёс. Кылсярысь, Пичи Пурга ёрослэсь данзэ уте «Эрик» группа, кырӟанлэсь кылъёссэ гожтэм Анастасия Шумилова, Ижысь Устинов ёрос понна кырӟа рэпер Алексей Пикулев, нош Индустриальной ёрос понна — Владимир Вахрушев… Башкириысь Татышлы ёрос ыстэ Лилиана Нуриахметоваез, со быдэстоз удмурт кылэ берыктэм башкир кырӟанэз. Пыртозы-а егит кырӟасьёс конкурсэ выль омыр? Матысь дыре тодомы, вожвылъяськон тунсыко но ӟырдыт луоз, вылды! Куд-ог ёросъёсын (Шарканын но Балезиноын) кырӟасьёссэс, нимысьтыз вожвылъяськон ортчытыса ик, бырйизы.

Кырӟасьёс но кырӟанъёслэн авторъёссы ог-огенызы тодматскозы ни 8-тӥ коньывуонэ.  «Мынам Удмуртие» ТРК-ын соос нырысетӥ эскеронэз ортчозы: вань конкурсантъёс куронъёсты чаклазы яке ӧз. Уго кырӟанлэн быдэстӥсез но, крезьгурчиез но, кылбурчиез но одӥг ёросысь потэмъёс, одӥг азьын улӥсьёс луыны кулэ. Азьлань уз вамыштэ ляб кырӟасьёс но.

— Кин кырӟанэзлы авторез кутэ мукет ёросысь, малпа, вылды, ум валатске шуыса. Но озьы уз пӧрмы, — вера Светлана Пикулева.

21-тӥ коньывуонэ «Аксион» культурая юртын концерт ортчоз. Жюриын пукозы ёросъёсысь дунъясьёс. Кырӟасьёс пӧлысь соос быръёзы 10 тужгес устооссэ. Таос ик потозы финалэ. 4-тӥ шуркынмонэ, Кунлыклэн нуналаз, «Мынам Удмуртие» телевидение конкурслэсь финалзэ возьматоз. Ӵапак татын вормисез быръёз нимысьтыз жюри — отчы пырозы композиторъёс, писательёс, нимо-дано артистъёс.  Нош учкисьёс СМС-куараоссэс сётозы.

Заявка сётон йылпумъяське ни таяз арняе. Кин ӧз вутты на куриськон сётыны, дыртэлэ. 0+

Мария Векшина

 

Удмурт Дунне
By Удмурт Дунне Октябрь 6, 2017 09:28