Эгралан Кедра Митрейлы сӥзем сэрег усьтӥськиз

Удмурт Дунне
By Удмурт Дунне Октябрь 2, 2017 15:50

Эгралась ёрос библиотекаын пӧртэм ужрадъёс ортчытъяло. Та нуналъёсы К. Митреез данъязы, 29-тӥ сентябре К. Митрейлэн вордскем дырысеныз 125 ар тырмиз.

К. Митрейлэн выжы писпуэз кылдытэмын.

Кылем арня пумын Эграысь ёрос библиотекаын усьтӥзы К. Митрейлы сӥзем сэрег. Библиотека вазенгес нуллэ ни вал К. Митрейлэсь нимзэ, нош аспал гожъясьсэс данъян сэрегзы вылымтэ на. Библиотекаысь шаертодонъя ёзэн кивалтӥсь Ольга Степанова верамъя, К. Митрейлэн выжы писпуэз кылдытэмын. Материалъёсты люканы юрттэм Эгра каргуртын улӥсь шаерчи Елена Захаровна Абрамович.

Кедра Митрейлы сӥзьыса ёросын ортчытыны чакламын кылбур лыдӟонъя, верос мадёнъя конкурс. Со быдэсак сӥземын Инкуазез утён арлы но шаерысьтымы писательёслы-юбиляръёслы. «Удмурт Кенеш» огазеяськонлэн ёросысь ёзэныз кивалтӥсьлэн воштӥсез Надежда Данилова ивортэмъя, конкурслы йылпумъян лэсьтозы толэзь пумын. Жюриын пукисьёс пӧлы одно ик пыртэмын луо, пе, кылем арын та конкурсын вормисе потэм муртъёс. Нош та вакытэ конкурслэн нырысетӥ люкетэз мынэ муниципал кылдытэтъёсын. Гуртъёсын вормисе потэмъёслы гинэ шуд усе ёрос конкурсэ пыриськыны.

Валентина Кутузова

Удмурт Дунне
By Удмурт Дунне Октябрь 2, 2017 15:50