Дэбес ёросысь Бадӟым Зетымын мотоблокъёсын ӵошатскизы

Удмурт Дунне
By Удмурт Дунне Октябрь 24, 2017 09:22

 Отын, уробоен мотоблокъёсы пуксьыса, шумприч ворттылыны быгатэмзэ возьматӥз 9 воргорон.

Кужымзэс мертаны мылкыд каризы пӧртэм пиосмуртъёс. Тужгес арлыдоезлы — 62 арес, тужгес егитэзлы 21 сяна ӧй вал.

Нырысь кышкатскизы вал: куазь зориз ке, ворттылыны уз луы. Но 14-тӥ октябре Бадӟым Зетым вадьсын шунды кузёяськиз. Озьы ӵошатсконэз учкыны 100-лэсь ятыр адями вуиз.

— Гуртын улон-вылонмес шулдыргес кареммы потӥз, — вера муниципал кылдытэтлэн йырыз Сергей Корепанов. — Соин ик библиотекаен, клубен, егитъёсын, ужасьёсын ӵош кариськыса, «МотоБум» ортчытыны малпамы. Малы одно мотоблокъёсын? Со гуртоослэн воштонтэм юрттӥсьсы луиз ини. Сотэк бакчаысь одӥг ужез но син азе уд пукты. Тросгес калыкез кыскон вылысь, вожвылъяськонмы мӧзмыт медаз луы шуыса, ӵошатсконмес шоулы пӧрмытыны турттӥм. Юрттӥз Интернет — та выллем ужрадъёс ортчыло ини вылэм. Соослэсь адӟем карыса, ми но бадӟымъёслы адӟытон, нылпиослы квадроциклъёсын ворттылонъёс радъямы на.

 

Кужымзэс мертаны мылкыд каризы пӧртэм пиосмуртъёс. Тужгес арлыдоезлы — 62 арес, тужгес егитэзлы 21 сяна ӧй вал. Тросэз колхозын, вуз карон удысын тыршо. Мотоблокен соослы 400 метрез ортчоно, берласянь гараже пыроно, уробоын груз ворттоно, бекчеос вискытӥ кый сямен ширтоно луиз.

— 6 дунъясьёсмы котькуд руль бергатӥсез сак эскеризы, — валэктэ С. Корепанов. — Мотоблоксэс чеберъям 5 водительёслы ватсаса баллъёс пуктылӥзы, нош сюрес вылын янгышасьёслы штрафъёс лякылӥзы. Ӵошатсконэ пыриськисьёслы 2 пол ворттылыны луонлык сётэмын вал. Кудӥз ӟечгес пӧрмиз, созэ ик лыдэ басьтӥмы. Озьы нырысетӥ интые потӥз Владимир Ичетовкин. Вормисьёсты коньдон премиен пусйимы.

Воргоронъёс люкаськемъёсты паймытӥзы на адӟытонын но. Кылсярысь, Александр Тронин, Алексей Иванов, Александр Хохряков, Андрей Шкляев асьсэос «корт валъёс» бичаллям. Баггиосазы, трициклъёсазы но мини-тракторъёсазы котькуд мылкыд карись пуксьылыны быгатӥз. «МотоБум» улсын ик ужазы пӧртэм азбаръёс. Одӥгаз чорыген вуз каризы ке, мукетаз — сиён-юонэн, емышен, киужен но мукет.

— Ужрадмес егитъёс, клёво шуыса, бадӟымъёс, пӧлызэс выллань ӝутыса, дунъязы. Соин огкылэ вуимы: вуоно арын но «МотоБум» одно ик ортчытомы. Но сӥзьыллы ум кельтэ — ворттылӥсьёсты гужем ик люкаломы, — веранзэ йылпумъяз Сергей Геннадьевич.

Удмурт Дунне
By Удмурт Дунне Октябрь 24, 2017 09:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*