Большевикъёс вормизы 1918-тӥ арын

Удмурт Дунне
By Удмурт Дунне Октябрь 31, 2017 16:30

Февраль революция бере Удмуртиын кивалтыны кутскизы Рабочийёслэн, крестьянъёслэн но солдатъёслэн депутатъёссылэн советъёсы. Нырысь-валысь отысь депутатъёс пӧлын тросгес вал меньшевикъёс, эсеръёс, но пумен калык берытскиз большевикъёс пала. Малы?

Туала Пичи Пурга ёросысь Брангуртысь крестьянъёс. 1917-тӥ ар.

Кин кивалтэ?

Буржуазно-демократической революция бере калыклэн улонэз ӧз капчия. Соин валче 1917-тӥ арын гужем крестьянъёс пумит султӥзы Временной правительстволэн политикаезлы. Соос няньзэс ватылӥзы, государстволэсь но помещикъёслэсь музъемъёссэс киултылӥзы, казённой тэлез ас валамзыя кораллязы.

Рабочийёсты 12-14 час ужатылӥзы, но уждунзы сиён-юон дун сьӧры будыны ӧз вуттӥськылы. Рабочийёс кылзӥськемысь дугдӥзы, вылысьтыз вылаз вошъяллязы мастеръёссэс но цехъёслэсь начальникъёссэс.

Сарапулын но Глазовын запасной полкъёс интыяськемын вал. Солдатъёс но пумен сётӥськизы революцилэн пельтӥсь тӧлъёсызлы. Юэм солдатъёс аракыен складъёсты сузяллязы, магазинъёсты сутылӥзы, фронтэ мыныны пумитъяськылӥзы.

Калыклэсь мылкыдзэ ас палазы берыктыны быгатӥзы большевикъёс, соос заводъёсы-гуртъёсы трос потазы, валэктон уж нуизы, асьмелы социалистической революция кулэ шуыса. Озьы май толэзе Ижын меньшевикъёслэн радазы 1 сюрс 400 адями пыремын вал ке, сӥзьыл соос 300 сяна ӧз кыле ни.

Глазов уездысь красногвардеецъёс. 1917-тӥ ар.

Выль властьлэн карез — Глазов

Война но соин валче экономикалэн куашкамез, калыклэн куанермемез, сютэм улон нош ик вуттӥзы революцие.

Удмуртиын большевикъёс пала берытскизы пыӵал тӥрлык поттӥсь предприятиосын данакез ужасьёс. Асьме большевикъёслы юрттӥськыны Петроградысь, Москваысь, Екатеринбургысь агитаторъёс вуизы. 2-тӥ-4-тӥ октябре ватскысагес ортчиз РСДР(б)-лэн нырысетӥ Вятской губернской конференциез. Отчы лыктӥзы большевикъёслэн 7 огазеяськонысьтызы 16 делегатъёс. Кивалтӥсе бырйизы Глазовысь И. Поповез (председатель), М. Драгуновез, А. Злобинэз. Озьы партилэн шорсюлмыз луиз Глазов. Глазов уездлэн советэз промышленникъёслэсь, вузчиослэсь выт бичаз, ватэм товаръёссэс но сиён-юонзэс шараялляз.

Августысен Ижын но властез быдэсак киултӥзы советъёс. Временной правительстволэсь комиссарзэ уллязы, милицилы начальнике пуктӥзы М. Шутов большевикез. Советъёс кивалтӥзы почтаен но телеграфен, сиён-юон басьязы но калыклы люкылӥзы, спекулянтъёслэсь товаръёссэс талаллязы. Металлистъёслэн профсоюззы заводын ужез радъяз.

Нырысетӥ декретъёс

1917-тӥ арын 25-тӥ октябре (вуж стилья) Петроградын большевикъёс восстание ӝутӥзы но властез басьтӥзы. Временной правительство пегӟиз. Рабочийёслэн но солдатъёслэн советъёссылэн 2-тӥ всероссийской съездазы кутэмын «Мир сярысь», «Музъем сярысь», «Власть сярысь» декретъёс. Быръемын Всероссийской Исполнительной Комитет Л. Каменев кивалтэм улсын но рабочийёслэн но крестьянъёслэн правительствозы — Калык Комиссаръёслэн Советсы (Совнарком) В. Ленин кивалтэм улсын. Шуэмын вал: та кык органъёс кивалтозы, Учредительной собрание ортчытозь.

Ижысь заводын революция сярысь иворез бадӟым шумпотонэн пумитазы. 28-тӥ октябре рабочийёс но солдатъёс демонстрацие потӥзы, советской властьлэн нырысетӥ декретъёсызлы дурбасьтэмзэс возьматыса. Ижысь советын большевикъёс эсеръёсын-максималистъёсын ӵош ужазы, Глазовын — левой эсеръёсын.

Временной правительстволы дурбасьтӥсьёс: меньшевикъёс, кадетъёс, правой эсеръёс — большевикъёслы пумит султӥзы. Соин сэрен Воткинске, Камбаркае, Сарапулэ советской власть кематэк ӧз вуы. Сарапул Вятка бере кыкетӥ бадӟым городэн лыдъяськылӥз, татын Временной правительстволэн адямиосыз кивалтӥзы, окружной суд, прокуратура интыяськемын вал. Калык меньшевикъёслы, кадетъёслы тросгес дурбасьтӥз. Соин ик большевикъёс малпазы советской властез кужмысь пыӵатыны. Муг шедиз: 9-тӥ-10-тӥ ноябре 166-тӥ запасной полкысь юэм солдатъёс бунт ӝутӥзы, складъёсты-магазинъёсты бушатӥзы. 17-тӥ ноябре Сарапулэ вуизы Казаньысь, Ижевскысь но Камбаркаысь красногвардеецъёс но Временной правительстволэсь милицизэ пазьгизы, меньшевикъёслэсь но кадетъёслэсь азьветлӥсьёссэс ӝегатӥзы. Но 1918-тӥ арын январе Сарапулын властез киултӥз милицилэн начальникез правой эсер Я. Сморкалов 166-тӥ полкысь командиръёс юрттэмъя. Табере ини большевикъёсты пытсэтэ ӵогазы. 21-тӥ январе нош ик вуиз Горд гвардия… 23-тӥ-25-тӥ январе Сарапулын выль советъёсты бырйизы, таяз радэ — большевикъёслэсь.

Советъёслэсь вормемзэс юнматыны кулэ вал Учредительной собрание. Отчы быръён ортчиз 12-тӥ ноябре 12 партийной списокъёсъя. Быдэс странаын кадь ик, Вятской губерниын тросгес куара люказы эсеръёс, большевикъёс 2-тӥ интые гинэ кылизы, 3-тӥе потӥзы меньшевикъёс. Но зэмос власть большевикъёс киын вал бере, соос шуизы: милем сыӵе Учредительной собрание кулэ ӧвӧл. 6-тӥ январе ВЦИК-лэн декретэныз отысь адямиос уллямын вал.

Советской властьлы пумитъяськисьёсын нюръяськон понна 7-тӥ декабре кылдӥз Всероссийской Чрезвычайной Комиссия (ВЧК). 1918-тӥ арын гужем Удмуртиын ужаны кутскиз солэн ёзэз — Ижысь ЧК, соин кивалтӥз А. Бабушкин.

1918-тӥ арын 5-тӥ-8-тӥ январе ортчиз Вятской губерниысь советъёслэн нырысетӥ съездзы. Советской власть ассэ властен ялӥз.

Ирина Зайцева, Шор кун архивын ужась

Туспуктэмъёс басьтэмын Шор кун архивысь

Удмурт Дунне
By Удмурт Дунне Октябрь 31, 2017 16:30