«Билингва», «Нуныкай» но «Анай клуб». Мар бордын пӧртэмлыксы?

Удмурт Дунне
By Удмурт Дунне Октябрь 2, 2017 14:35

2015-тӥ арын нылпиосты кык кылын дышетонъя «Билингва» центр усьтӥськем бере удмурт анайёслэн нимысьтыз огазеяськонзы кылдӥз кадь: соос пӧртэм проектъёс малпало, ӵем люкаськыло.

Мумы-бубыос кенешыку, пиналъёс шудӥзы.

Берлоез пумиськон, кылсярысь вал кылем кӧснуналэ, 30-тӥ куарусёнэ — Эшъяськон юртын ортчиз кык кылын нылпиосты дышетонлы сӥзем семинар. Отчы пыриськиз 50 адями.

Семинар кутскыку, нылпиос удмурт кылын сценка пуктӥзы. Инкуазь кужымъёс сярысь выжыкылэз лыдӟиз дышетӥсь, нош геройёс понна вераськизы асьсэос нылпиос.

Семинарлэн кыкетӥ люкетаз нылпиос но анай-атайёс нимаз ужазы. Котьку сямен анай-атайёс понна радъямын вал психологъёсын но дышетӥсьёсын вераськон. Педагогика наукаосъя доктор И. Ворожцова но нылпи психолог О. Смирнова юанъёслы валэктонъёс сётъязы.

— Анай-атайёслэн туж трос юанъёссы луыло, — вера проектлэн кивалтӥсез Татьяна Волкова. — Кылсярысь, нылпиен анаез вераське удмурт кылын, нош атаез — ӟучен. Нош нылпи котьку вазе ӟучен. Мар кароно? Специалистъёсмы верало: нылпиез зӥбоно ӧвӧл, возьмано. Нылпилэн арлыдыз вуиз ке, со усьтӥськоз. Нош али солы капчигес ӟучен вераськыны.

Семинар кутскыку, нылпиос удмурт кылын сценка пуктӥзы.

Мумы-бубыос кенешыку, пиналъёс шудӥзы — пӧртэм шуг-секытъёсты вормылыса, «Нылпи карлэсь» сюрессэ ортчизы. Та семинаре пӧртэм арлыдъем нылпиос люкасько бере, соос 2 группаослы люкемын вал. Шудон пумын ваньзы ческыт салам басьтӥзы.

Та семинаръёс сяна, удмурт анай-атайёс но нылпиос мукет но ужрадъёсы пырисько. Кылсярысь, туэ кылдӥз «Нуныкай» центр.

— «Билингва» проект кылдӥз 2015-тӥ арын интернет-проект кадь, юрттӥськиз Нациосын ужан политикая министрество. Но сайт кылдэм бере ми валамы: кулэ анай-атайёсын но нылпиосын улэпкын пумиськылыны. Соин ик ми чаклам толэзьлы огпол семинаръёс ортчытъяны, — вера Татьяна Волкова. — Татын ми мумы-бубыослы методической юрттэт сётӥськом, кызьы кык кылын вераськись нылпиосты будэтоно.

Но толэзяз огпол пумиськылыны — со тырмыт ӧвӧл. Соин сэрен «Удмурт Кенеш» огазеяськонлэн юрттэмезъя «Нуныкай» проект гожтэмын вал. Татын нылпиос толэзяз 3 пол люкаськыло. Соос шудо, киужен выро, крезьгурен тодматско — ваньмыз удмурт кылын. Таизлэн проектлэн ужпумез — нылпиослэсь удмурт кылзэс волятон.

— Анайёс ужало пӧртэм удысъёсын, соин ик удмурт кылын ӵем вераськыны уг кылды. Озьы вордӥськиз мукет малпан — «Анай клуб». Анайёсын пумиськылӥськом кафеын, я мукет интыын, куспамы котькыӵе темаосъя вераськыса пукиськом. Кылсярысь, толон кыӵе кино учкимы, — вера Татьяна Волкова.

Мария Векшина

Туспуктэмъёс: vk.com (Татьяна Волкова)

Ми — туала анайёс! Кыӵе ужпумъёс ас азяз пуктэ «Нуныкай» центр?

Удмурт Дунне
By Удмурт Дунне Октябрь 2, 2017 14:35