Басьтӥсь удмурт картошкаез уг дунъя

Удмурт Дунне
By Удмурт Дунне Октябрь 23, 2017 12:45

Картошка но бакча сиён будэтӥсь хозяйствоос ужзэс ӧз йылпумъялэ на. Мае утялтыны вань.

Туэ шаерысьтымы хозяйствоос но фермеръёс, дэмен вераськыса сямен, картошка, кубиста, кешыр, кушман бусыоссэс кулэстоно кариськизы вал. Озьы картошка бусыосты 29,7 гектарозь кулэстӥзы. Миым сярысь, со 6,3 сюрс гектарлы ичигес. Мукет бакча сиёнэз верано ке, бусыос 1 сюрс пала гектарлы сюбегатэмын — 5,8 гектар. Топливолы, кидыслы уксё трос быре, вузан инты уг сюры, асьме магазинъёсын кенешыны шуг, шуо хозяйствоослэн кивалтӥсьёссы. Эшшо ке толалтэ возьыны секыт. Туэ тани Пичи Пургалан но Воткинскын емыш возьыны хранилище лэсьтыны чаклало вал, но ужзы каллен мынэ.

Зэм, хозяйствоос, бусыоссэс кулэстэмысьтызы, гырпумъёссэс куртчыло. Урожай уго удалтӥз.

Басьяськисьлы чебер картошка кулэ, со Египетысь ваемзэ сиёз, со уго пычеен портэмын ӧвӧл. Кызьы сое пычей портоз, со химикатэн пазямын ке. Таиз сярысь басьяськисьёс уггес малпасько.

— Котькуд гектарысь шорлыдын 209 центнер картошка потэ, Вавожын гектарысь 390 центнер люкаське. Нош октонэз вань на. Кылем арын гектарысьтыз шорлыдын 135 центнер люкаськиз, — шуэ Гурт удысъя но сиён-юонъя министерствоысь музъем кусыпъёсъя но будосъёсъя ёзэн кивалтӥсь Алевтина Бурдина. — Мукет бакча сиёнэз верано ке, гектарысьтыз 350 люкаськиз. Миым сярысь, со ог 30 центнерлы тросгес. Зэм, туэ картошкалы куазь ӧзгес кельшы — тросэз сисьмоз. Та хозяйствоос понна нош ик йыр висён луоз ни.

Азьвыл гуртоос тодылӥзы: кӧнязэ бакча сиёнэз кые дунын кун басьтоз. Туннэ сыӵе закупкаосын нокин уг выры — котькуд хозяйство но фермер ачиз утчано луэ басьтӥсь. Соин ик ӵемысь кулэстэ бусыоссэ. Басьтӥсь дорозь сюрес кыдёкын уго — ӵемысь со Казахстан. Удмуртиысь магазин ӝажыосы сюрыны секыт. Алевтина Бурдина верамъя, басьяськисьлы чебер картошка кулэ, со Египетысь ваемзэ сиёз, со уго пычеен портэмын ӧвӧл. Кызьы сое пычей портоз, со химикатэн пазямын ке. Таиз сярысь басьяськисьёс уггес малпасько.

Таӵе югдур асьме хозяйствоосмес шукке. Кылсярысь, 10 ар талэсь азьло картошка но мукет бакча сиён будэтӥсь хозяйствоос шаерамы 5-6 вал ке, туэ 3 кылемын: Пичи Пурга ёросысь «Надежда», Можга ёросысь «Заря» но Уваысь «РикоАгро». Алевтина Бурдина верамъя, фермеръёс арысь аре та удыслэсь палэнско, вылаз ик, туэ субсидия но висъямысь дугдӥзы.

Елена Сараматова

Туспуктӥз А. Горбунов

Удмурт Дунне
By Удмурт Дунне Октябрь 23, 2017 12:45