Александр Бречалов пумиськылӥз «Удмурт Кенешлэн» азьветлӥсьёсыныз

Удмурт Дунне
By Удмурт Дунне Октябрь 5, 2017 12:10

Элькунлэн Тӧроез Александр Бречалов  нош ик пумиськылӥз «Удмурт Кенеш» огазеяськонысь азьветлӥсьёсын. Пумиськон ортчиз элькунысьтымы Искусствоосъя нылпи школаын.

Школалэн директорез Надежда Иванова кивалтӥсез тодматӥз школаенызы но усточи нылпиосын. «Удмурт Кенеш» огазеяськонлэн тӧроез, Кун Кенешысь ялан ужась комиссилэн кивалтӥсез Татьяна Ишматова мадиз удмурт делегацилэн алигес Сыктывкарын ортчем фин-угор ӧтчаме пыриськемез сярысь. Со вераз, шаерысьтымы делегатъёс котькуд секциын туж азинлыко тыршизы шуыса, котькудаз чузъяськизы асьме ужан амалъёсынымы тодматонъя но сюлмаськытӥсь ужпумъёсты сэрттонъя докладъёс. Ваньмыз сямен ӵектонъёсмы ӧтчамлэн резолюцияз пыризы.

Александр Бречалов тау кариз делегатъёслы Удмуртиез Россиын но дуннеын азинтэмзы, ӟечен возьматэмзы понна. Азьланяз но та удысын тазьы ик ӟеч тыршоно, со понна кулэ рос-прос план лэсьтыны, шуиз со. Одӥг ужрад но ньӧмыз понна медаз лэсьтӥськы, соос калыклы но элькунлы одно ик пайда  мед ваёзы.

Элькун кивалтӥсьлэн Удмуртиын ӝыны ар ӵоже ужатозяз та кыкетӥ пумиськонэз ни. Нырысетӥяз, кылсярысь, ӝутэмын вал Удмуртилэн кунлык басьтэм дырысеныз 100 ар тырмонлы дасяськонэз мытон  но Ижкарын Удмурт лулчеберетъя центр усьтон, анай кылэз дышетон сярысь юанъёс. Соку кивалтӥсь вазиськонъёсын соглаш кариськиз, ӵектонъёслы дур-басьтӥз но «Удмурт Кенешлы» уж сётӥз: центрлэсь концепцизэ тӥ асьтэос дасяны кулэ. Туннэ вераны луэ ни: ужась группа сое 2 толэзь ӵоже быдэстӥз, концепция сётэмын ни экспертъёслы.

— Та нуналъёсы Кун Кенеш коньдон ужпумъёсъя министре юнматӥз Станислав Евдокимовез, — ивортӥз А. Бречалов. — Мон сое косӥ центрлы проект но смета лэсьтон понна коньдон шедьтыны, собере ини та проектэн пыриськеммы луоз федерал программае. 2020-тӥ арлы Удмурт культурая центр одно луыны кулэ!

Шумпоттӥз Александр Владимирович удмурт иворчиосты но:

— Мон валасько анай кылын потӥсь программаослэсь, иворъёслэсь кулэлыксэс, — шуиз со. — Учкисьёслэсь, лыдӟисьёслэсь верамысьтызы тодӥсько, ӟеч ужаськоды шуыса, соин ик «Мынам Удмуртие» телеканал но, «Удмурт дунне» газет но юрттэттэк уз кыле. Но оскисько, уката золгес  тыршоды, пайдаёгес ужалоды шуыса.

Зинаида Рябинина

Туспуктэм: udmurt.ru 

 

Удмурт Дунне
By Удмурт Дунне Октябрь 5, 2017 12:10