20 минут куддыр уг тырмы

Удмурт Дунне
By Удмурт Дунне Октябрь 26, 2017 10:37

Шаерысьтымы ӝог юрттэт сётон удысын тыршисьёс конференцие люкаськылӥзы. Ужамзылы йылпумъянъёс лэсьтӥзы, азьланьын быдэстоно ужпумъёсты сэрттӥзы-пертчизы.

Элькунамы та удысын али 138 врач ужа — кулэезлэсь 64 процент, 815 эмъясь сузэръёс — кулэезлэсь 86 процент.

Кенешонэз нуиз элькунысьтымы ӝог юрттэт сётонъя валтӥсь врач Олег Прузан. Шуиз: ӝог юрттэт сётонын шуг-секытъёс ӧжыт ӧвӧл, но удысэз азинтоно.

Одӥгез валтӥсез шугъяськон — уг тырмо специалистъёс. Элькунамы та удысын али 138 врач ужа — кулэезлэсь 64 процент, 815 эмъясь сузэръёс — кулэезлэсь 86 процент. Зэм, мукет улосъёсын ӵошатоно ке, асьмелэн югдур урод ӧвӧл ай.

Ӝог юрттэт сётӥсьёс али ужало 2015-тӥ арын юнматэм куронъёсъя. Соку быдтэмын вал куд-ог бригадаос, кылсярысь, сюлэм но сэр, лулсэр висёнъёсын шугектэмъёслы юрттэт сётыны чакламъёсыз.

— Та пумысен калыклэн трос юанъёсыз кылдӥзы вал, малы та удысын но оптимизация ортчытоно шуыса, — вераз Олег Прузан. — Но со оптимизациен герӟаськемын ӧй вал, выль куронъёс сыӵеесь: котькудӥз ӝог юрттэт сётӥсь врач сюлэмзы кутӥсьёслы но, керӟегъяськисьёслы но юрттыны быгатыны кулэ. Но быдтэмын ӧвӧл нылпиослы юрттэт сётӥсь бригадаос — 5-ез кельтэмын, озьы ик вань нуны вайисьёслы юрттонъя, реанимацияя бригадаос.

Вераны кулэ: ӝог юрттэтлы кулэяськон уг кулэсмы. Кылсярысь, кылем арын «скоройёс» 487 сюрслэсь ятыр пол ӧтёнъёсы потазы. Шуге-леке вуэм муртъёс пӧлысь ог 25 процентсэ эмъян учреждениосы нуизы. Ог 51 сюрс пала адями арлы быдэ шудтэм учыре шеде, 2016-тӥын сюрес вылын шуккиськонъёс 2 сюрс 195 вал.

2015-тӥ арын 85 процентэз машинаос вужесь, ярантэмесь вал ни. Туннэ ог 40 процентэз 5 ар но ужамын ӧвӧл на. 2016-тӥ арын 102 ӵыжак-выль машина басьтэмын.

— Адями доры ӝог юрттэт сётӥсьёс ӧтем нуналэ ик вуыны кулэ, — валэктӥз О. Прузан. — Но куд-ог учыръёсы юрттэт кулэ ӝегатскытэк — таизлы 20 минут дыр висъяське. Асьмелэн 89,9 процентаз учыръёсы «скорой» туж ӝог вуэ. Но кызьы 20 минут куспын вуод, кылсярысь, Дэри ёросысь Ожмосэ? Соин ик Удмуртиысь кун гарантиосы воштонъёс пыртэмын вал — отчы пусйим гуртъёсты, кудъёсаз «скорой» чаклам дыр куспын вуыны уг быгаты. Табере мукет улосъёс но Удмуртия сямен ужаны кутскизы.

Зэм, палэнысь гуртъёсты ӝог юрттэт сётонтэк кельтонтэм вылысь 2017-тӥ — 2018-тӥ аръёслы ужпум пуктэмын: ӝог юрттэт сётонэ мед пыриськозы гуртъёсысь амбулаториосын, ФАП-ёсын ужась фельдшеръёс но. Тая нимысьтыз документъёс али дасясько.

Нош «Скоройёсын» югдур али умойгес луиз. 2015-тӥ арын 85 процентэз машинаос вужесь, ярантэмесь вал ни. Туннэ ог 40 процентэз 5 ар но ужамын ӧвӧл на. 2016-тӥ арын 102 ӵыжак-выль машина басьтэмын. Вуыны кулэ туэ но. Вань автомобильёс «Глонасс» системае пыртэмын ни.

О. Прузан ӝог юрттэт сётӥсьёсты индылӥз: сюлэм но сэр висёнъёсын черламъёсты ӝегатскытэк учконо. Озьы ик адямилэн 2 нунал ӵоже температураез возиське, эмъюмъёс уг юртто ке, койкае одно нуоно, угось кышкытлык вань, шырвисён кырмиськемын шуыса.

Элина Кумачёва

Туспуктэмъёс: А. Горбунов, Э. Кумачёва

 

Удмурт Дунне
By Удмурт Дунне Октябрь 26, 2017 10:37