161 гуртын улӥсез ӧвӧл. Бадӟымзэ утьыса, пичизэ воксё ум аналтӥське-а?

Удмурт Дунне
By Удмурт Дунне Октябрь 27, 2017 11:20

туннэ 1 но улӥсез ӧвӧл 161 гуртын. 2010-тӥ арен ӵошатоно ке, со 40 гуртлы уногес.

Россиын гуртъёсты азинтон программа 2003-тӥ арысен ужа. Зэм, берло аръёсы федерал бюджетысь но республикалэн казнаысьтыз солы ичигес но ичигес коньдон висъяське.

Гуртоослэсь улон-вылонзэс умоятон вылысь 2014-тӥ арысен федерал бюджетысь висъямын ни 2 миллиард 548 миллион манет. Эшшо 3 миллиард 10 миллион манет вуэмын республикалэн бюджетысьтыз. Гурт удысъя но сиён-юонъя министрлэсь ужзэ быдэсъясь Александр Прохоров верамъя, висъям уксё тырмиз 185 сюрс 457 квадрат метр улон инты лэсьтыны, 1 сюрс 852 иськем газ гумыос, 221 иськем ву гумыос кыскыны но мукет ужъёсты быдэстыны. Ӵапак та программа ужамен, шутэтскон интыос, спортъя площадкаос выльдӥсько. Александр Прохоров верамъя, гуртэ кылись егит специалистъёс берло 5 ар ӵоже 2 поллы уногес луизы. Гуртэ егитъёсты кельтон вылысь ик малпамын вал уго со программа.

Зэм, котыр ласянь учконо ке, та программа бадӟым гуртъёсты но поселениосты гинэ азинтыны чакламын. Кылсярысь, Глазов но Вотка ёросъёсын компактной застройкалы 2 проект лэсьтэмын. Сарапул ёросысь Сигаево черкогуртын спортъя площадка усьтэмын. Туэ сыӵе ик площадка лэсьтӥське Шаркан черкогуртын.

— Ву гумыос вуизы Красногорске, Можга ёросысь Пичи Сюга, Вотка ёросысь Июльское гуртъёсы, — вера Гурт удысъя но сиён-юонъя министерствоысь гуртъёсты азинтонъя управлениен кивалтӥсь Михаил Юдин. — Миым Ува ёросысь Ува-Тукля но Дэри ёросысь Кияик гуртъёсы фельдшер-акушер пунктъёс ӝутэмын. Али сыӵе ик ӟеч ФАП ӝутӥське Якшур-Бӧдья ёросысь Новая Чернушка гуртэ. Таос шоры пичи гуртъёс но вожъяськыса учко, дыр. Но уксё висъян пумысен куронъёсты юнматӥз Москва. Гуртын я котыраз нокыӵе предприятие уг ужа ке, матысь 2-3 ар ӵоже со отын кылдыны уг малпа ке, отчы коньдон висъяны воксё чакламын ӧвӧл.

Михаил Юдин верамъя, лыктӥсь уксёлы шумпотыны кулэ ай. Со арысь аре кулэсме. Кылсярысь, кылем арен ӵошатыса, туэ бюджетъёсысь 51 миллион манетлы ӧжытгес уксё вуэмын. Тросгес кошке со корка пуктӥсьёслы, гуртоос улон сэрегзэс умоятыны мед быгатозы, юртлы ёрмыса, гуртысь медаз кошке шуыса. Туэ шаерамы 236 семья субсидия басьтыны быгатӥз ни. Котькуд ёросын черодэ 200-300 мурт султэмын. Кылсярысь, Якшур-Бӧдья ёрос администрациын 200 мурт черодын сылэ.

2014-тӥ арысен гуртъёсты азинтон программая шаерамы 185 сюрс 457 квадрат метр улон интыос пуктэмын.

— Туэ 10 адями гинэ коркалы сертификат басьтӥз. Таос пӧлысь 4-ез гинэ гурт удысын тыршо, мукетъёсыз дышетӥсьёс я эмчиос луо, — шуэ Якшур-Бӧдья ёрос администрацилэн йырызлэн воштӥсез Сергей Широбоков. — Миым 7 мурт субсидия басьтӥз. Туэ угось со бадӟымгес — ёрослы 5 миллион манет сётӥськиз, сое ик куспазы люкимы. Но сое басьтыны но ваньмыз уг быгато ук. Коньдон сётӥське липет улэ пыртэм коркаез йылпумъян понна гинэ. Одно чаклало, корка 70 процентлы дась мед луоз шуыса. Нош кӧня коньдон кулэ фундамент кисьтыны ик! 7 арен но пуктӥськисьёс гуртъёсын сюро. Таин сэрен но пыдлось гуртъёсы уггес пуктӥсько ни — райцентр котыре кыстӥсько. Пичи гуртъёс уго пуктӥськытозяд бырыны но быгатозы. Отын я садзы, я школазы, я медпунктсы ӧвӧл. Зэм, бырись гуртын дунтэм дунын корка басьясьёс вань ик. Ӵемысь сыӵеос городысь лыктэмъёс пӧлын пумисько. Нырысь-валысь малпало: Ижлы кыдёкын ӧвӧл, ветлылом, нылпиосын дэмен улом. Но нылпиоссылэн анай-атайёссы сьӧры кыдёке лыктэмзы уг поты ни. Егитъёслэн умой интыын улэмзы потэ. Бадӟым гуртъёсты али ӧм возе ке, отысь но калык палэнэ кошкыны кутскоз.

Таӵе малпанъёсын ик ёросысь Новая Чернушка гуртын фельдшер-акушер пункт лэсьтон борды басьтӥськизы. Тани-тани сое усьтозы ни. Зэм, гуртын ФАП туннэ вань. Но со пулэсь, пыртӥз тӧл сӥсъя. Нош татын 823 улӥсез. Ог 40 процентэз — арлыдоос. Гуртазы кылись егитъёс но тачак. Татысен Ижозь уго машинаен ог 20 минут сяна мыноно ӧвӧл. Школа, сад, магазин — ваньмыз вань.

— ФАП-лы вуж дыръя специалист шедьтыны ёрмиськомы вал. Ар талэсь азьло Анатолий Калугин вуиз семьяеныз ӵош. Егит пиосмурт военной врачын ужамын, фельдшере дышетскиз. Татысь кошкемез уг поты ни, гуртоослэн но сое лэземзы уг поты — умоен гинэ со сярысь верало, — шуэ Чернушинское гурт поселениен кивалтӥсь Юрий Соболев. — Зэм, туннэ со семьяеныз библиотекаын улэ. Пуктӥськыны мылкыдъёсыз вань, но музъем висъян ласянь шуг-секытъёс кылдэмын ай.

Гурт удысъя но сиён-юонъя министерствоысь Михаил Юдин верамъя, бадӟым гуртъёсты азинтыны пӧрмытӥмы ке, пичиосыз но соос сьӧры, оло, кыстӥськозы. Кылсярысь, берло дыре Алнаш ёросын одӥг бырись гурт но ӧвӧл ни. Солэсь ортчыт, Алнаш черкогурт котырысь вань пичи гуртъёс паськытазы, мукетъёсыз но бадӟымало, отын фермеръёс ужаны кутско. Ачиз черкогурт но ялан паськыта. Кылсярысь, ёрос больница котырысь выль ӝужам посёлоказы ог 5 иськем ву гумыос кыскыны туэ 19 миллион манет программая висъязы. Соосты лэзён, скважинаос борды герӟан понна эшшо 40 миллион манет кулэ на, шуэ ёрос администрацилэн кивалтӥсезлэн воштӥсез Александр Салтыков. Татын уго туннэ вутэк пуко.

Уноез пичи гуртъёс карта вылысь воксёлы ӵушисько. Удмуртстатысь ёзэн кивалтӥсь Людмила Сушкова верамъя, туннэ 1 но улӥсез ӧвӧл 161 гуртын. 2010-тӥ арен ӵошатоно ке, со 40 гуртлы уногес. 273 гуртын 50-100 адями улэ. Лыдпусъёс арысь аре ӝожомыто. Ӵемысь быро удмурт гуртъёс. Городэ я райцентре выжыса, калык уката ӟучоме.

Елена Сараматова

Туспуктӥз А. Горбунов

Удмурт Дунне
By Удмурт Дунне Октябрь 27, 2017 11:20