10 нунал асэныд нюръяськон. Сюресъёсты яратӥсьлэн дневникысьтыз

Удмурт Дунне
By Удмурт Дунне Октябрь 4, 2017 16:40

Туэ август толэзе котыръяй Алтай гурезьёсты. Валай, гурезьёс кужмо адямилы гинэ ас чеберзэс, аспӧртэмлыксэс усьто. Соин, нуналлы быдэ сямен, гурезьёсын ӧй, асэным, пӧртэм шуг-секытъёсын нюръяськи.

Алтайысь Крепкое чагыр ты

1-тӥ нунал. Алтай шаерысь Бийскысен 400 иськем пала зуркыт сюресъёстӥ Маральникозь автобусэн уйлы пумит вуимы. 17 мурт палаткаосмес выж улэ пуктӥмы. Гурезьысь бызись Михайловка шурлэсь ӵашетэмзэ, сюреслэсь жадьыса, ӧм ик шӧдылэ.

Ӵукна тыбыр сьӧрамы 10 нуналлы тырмымон сиён-юонэн — 10-15 килограммъем  рюкзакъёсын — гурезьёс пала шонтӥм. Шунды пыже ке но, эшъёсын сюрес сокем секыт уг поты. Дышымтэ вылысь пельпумъёсысь бадӟым рюкзаклэсь ӝоггес мозмытскем потэ. Паймымон, адямиос трос ик уг пумисько. Зэм, Женя гидмы юромо сыӵе сюресъёсты быръе, кытчы адями пыдзэ уггес лёга. Угось кытын трос адями, отын  кырсь. Пумитамы шедизы 2 егит анайёс, тыбыр сьӧразы 2-3 аресъем нылпиоссы. Пичиос уг керӟегъясько, котыр инкуазез учкыса пуко.

Гурезьёс йылъёсын лымы ноку уг шуналля

2-тӥ нунал. 5 час 20 минут, черодэн тубиськом гурезь йылэ — шундылэсь ӝужамзэ пумитаны.

Тыбыр сьӧрын рюкзакъёс ӧвӧл ке но, меӵ гурезез вормыны капчи ӧвӧл. Вырйылэ тубыса вуттӥм гинэ, гурезь сьӧрысь шунды сиос адӟиськизы, туннэ нуналэз вайись нырысетӥ сиос шунытэнызы пылатӥзы. Пушкын гань-гань луиз. Шундыез ӵукна пумитаны, нош ӝытазе келяны походын ӟеч сямен лыдъяське.  Гурезьын кадь ӟардонъёсты кытысь адӟод на!

Гурезьёсы вылӥегес но вылӥегес тубиськомы. Бере кылё куаро но лысо писпуосын нюлэсъёс, ӝужыт кедр сикъёс, макем вылӥе ӝутӥськиськом, сокем лапег луо будосъёс, син шорын воштӥсько инкуазь суредъёс. Куазь пӧсь, вакчи саесо футболкаосын ветлӥськом. Гурезьлэн огпал бамаз мар ке юг-юг пиштэ. Осконтэм кадь, но со лымы вылэм. Гужем куспын уйпал бамалъёсысь со шунаса уг вутты. Выжыкылын гинэ гужем но тол ваче ки ветло. Шаянъяськыса лымы люкъёс погыллям, лымыен лэзяським. Сое шунтыса, шыд пӧзьтӥм но чай юим.

Гурезьёсысь васькись шуръёс тыос кылдыто. Соос татын вылысьтыз вылаз, шуыны луоз

3-тӥ нунал. Сюресмы нуэ Мультинской тыос дуре. 3-тӥ нуналзэ сюрес вылын, одӥг тыэз но ӧм адӟе на. Мультинской шуисько 5 пӧртэм тыос, но зэмзэ соос тросгес, гурезьёсысь визыласа васькись шуръёс, огинэ люкаськыса, тыос кылдыто, соос татын сокем трос, куд-огез картае но пусйытэк кылемын. Нуназе бере гурезь йылысен адӟиськиз, кырымпыдэсэ кадь гинэ тэрымон, ты. Но матаз вуыса, со бадӟым тылы пӧрмиз. Огпал ярдураз асьсэ коже поръясь валъёсыз пумитамы. Соосыз чакласьёс ӧвӧл. Тыэз асьме куспамы Вал ты нимамы, угось картаын солэн нимыз пусйымтэ вал. Пылаським, но тыэ, чукынскыны сяна, ӧм пыралэ, укыр кезьыт вуэз, шунаса уг вуттылы.

4-тӥ нунал. Быдэс нунал изъёс вылтӥ мынӥмы. Нунал неномыртэм кузь потӥз. Изъёс синазькыль луизы. Палаткаосмес пуктыны инты мырдэм шедьтӥмы. Группаысь куд-огез сиёнлэсь пӧземзэ ӧз возьмалэ ни, жадьыса умме усизы. Уйвӧтам но изъёс пӧлтӥ вамышъяй.

Быдэс нунал тыбыр сьӧрын 10-15 килограммъем рюкзак

5-тӥ нунал. Изъёсыз чидатэк, туннэ пӧсьтӥз одӥгез пыдкутчанэ. Сое скотчен бинялляй. Вуимы выжыкылысь кадь югыт-чагыр Крепкое ты дуре. Узьмагын (рай) кадь инкуазь усьтӥськиз котыр. Татчы днёвкае султӥм — быдэс нуналлы лагерь пуктӥмы но шутэтскимы. Но котырысь инкуазез усьтӥсьёслы тэк пукыны маза ӧй вал: кин ке пыласькиз, мукетъёсыз кедр ӵыжинъёс утчазы, куинетӥосыз кудымульы бичазы, умой, гурезьёсысь нюлэсъёсын емышъёс туэ удалтӥллям. Мон водопад дуре ветлӥ. 30 метрысь усись ву ас кужыменыз паймытӥз. Ӝытазе ваньместы вите вал тылскем вылын пыжем мильым, нош пушкесэзлы лэсьтӥмы пырдэм печенняез мульыен, сгущёнкаен сураса лэсьтэм залипон. Зэм, походъёсын ческыт сиён туж уг окмы, соин котькуд чечымлы неномыртэм зол шумпотӥськод. Ваньмылы бадӟым кузьым луиз мунчо. Кузь походэ нырысьсэ мынэмъёс уг оско вал, тэльын пӧсятскыны но, пыласькыны но луэ шуыса. Мунчо бере ныс-ныс изимы.

6-тӥ нунал. Туннэ тубимы 2 сюрс 500 метр кеме. Гурезьёсын бырем туристъёслы синпелетэз адӟимы, паймымон, соослэсь улонзэс куспетӥ карем ботулизм — кӧт пуш висён. Озьыен, гурезьёсын шуккиськонлэсь утиськем сяна, сиёнэз но чакласа быръёно. Зорыны ӧдъяз. Ваньмы, 17 мурт, вольыт но паськыт изэз шедьтыса, котыр пуксимы, полиэтилен плёнкаен шобырскимы. Зорез кырӟаса уллямы. Ортчимы Детской перевалэз. Зэм, со пичиослы кадь гинэ чик вылымтэ. Сое ортчыло спорт туризмен вырисьёс. Шуг-секытъёслы дышымтэ муртлы та перевалэз вормыны шуггес ик луоз. Соин но, дыр, группаысьтымы куд-огез чутрак пумит луизы гурезь йылэ тубемзы бере гозы кузя уллань васькыны, угось гурезь укыр меӵ. Но огез кылдэм шуг-секытэз ворме ке, мукетъёсызлэн но кужымзылы осконзы юнма.

Алтайысь водопадъёс выжыкылэ вутто кадь

7-тӥ нунал. Туннэ малпай, Алтай гурезьёсын кадь нокытын чебер инкуазь ӧвӧл ни. Угось син азе выжыкылын верантэм, чуръёсын гожтонтэм суредъёс пуксизы — вылысьтыз вылаз водопадъёс, визыласа васькись шуръёс, пичи но бадӟым тыос, ӝуйлэсь вожектэм изъёс. Татысь инкуазь сярысь шонергес луоз тазьы вераны: трос пол кылэмлэсь ӟечгес одӥг пол адӟыны.

8-тӥ нунал. Васькимы адямиос доры. Лагерьмес Катуньской заповеднике пуктӥм. Чебер интыосыз учкыны рюкзакъёстэк ветлӥм. Адӟимы Мультинской тыос пӧлы пырись Верхней, Нижней, Средней но Поперечной тыосты.

9-тӥ нунал. 3 сюрс метр кеме тубыны ваньзы ӧз дӥсьтэ. 7 мурт гурезь йылэ ӝутӥськимы 6 но ӝыны час куспын. Татысен милемлы удалтӥз адӟыны Алтай гурезьёсысь одӥгзэ тодмо инкуазь синпелетэз — Белуха гурезез, ӝуждалаез 4 сюрс 509 метр. Куд-ог дыръя та гурезь чималиен шудыны яратэ, пилемъёс пӧлы ватӥськыса. Вырйылысь из улэ ватыса кельтӥм мукет туристъёслы салам — Ижысь гожтэт.

Мультинской тыос пӧлысь Поперечное ты

Пеймыт луытозь, лагере васькыны ӧм вуттэ, зорлэсь ортчемзэ гурезьёсын витимы. Та нуналэ нырысьсэ гуртэ бертэме потӥз. Угось лагерьмы доры уйшор бере гинэ вуимы. Нюлэскытӥ фонариктэк котькуд гопе, писпу выжые канжаськыса мынӥмы, зор бере вань кырсез бичамы, оло.

10-тӥ нунал. Берыктӥським Маральник гурт доры. мунчое пыримы туристъёлэн базаязы. Пушкын кык пӧртэм мылкыдъёс бугыръясько: огласянь, мылкыд лӧптэмын, доре бертӥськом шуыса, мукет ласянь, уг поты люкиськем кужмо Алтай гурезьёсын.

Ангелина Снигирёва

 

 

Удмурт Дунне
By Удмурт Дунне Октябрь 4, 2017 16:40