Вискамы — борддор Малы удмурт гожъяськисьёс нимазъясько?

Удмурт Дунне
By Удмурт Дунне Сентябрь 1, 2017 15:00

Вискамы — борддор  Малы удмурт гожъяськисьёс нимазъясько?

Россиысь лулчеберетэн но искусствоен вырись 18-30 аресъем егитъёс понна «Крымская Таврида» форум ужа. Одӥгаз сменае люкаськылӥзы кылбурчиос, писательёс, критикъёс но библиотекарьёс. Отчы эксперт сямен вуылӥз егит тодосчи, кылбурчи но публицист, кылосбур тодосъя доктор Алексей Арзамазов. Со вераз, кыӵе уж нуиз форумын, но дунъет сётӥз туала удмурт егитъёслэн творчествозылы.

«Таврида» форуме эксперт сямен вуылӥз егит тодосчи, кылбурчи но публицист, кылосбур тодосъя доктор Алексей Арзамазов.

Одӥг интыын — пӧртэм калыкъёс

— «Крымская Таврида» калыкез дышетонъя туж бадӟым форум луэ. Берло аръёсы та выллем ужрадъёс модае пыризы. Нырысь Тверь улосвылын «Селигер» ортчытъяны кутскизы, собере кылдӥз «Территория смыслов на Клязьме» форум. Нош 2015-тӥ арысен «Крымская Таврида» ужзэ мытӥз. Форумлэн кулэлыкез бадӟым шуыса, валамон: кылем арын отчы вуылӥз Россилэн Президентэз Владимир Путин, нош туэ бадӟым куно луиз Россиысь дышетонъя но тодосъя министр Ольга Васильева.

Лагерь ортче пӧсьто-лэзьысен гудырикошкон пумозь, арнялы быдэ сменаос ог-огзэс вошто. Ужало пӧртэм секциос. Кылсярысь, литераторъёслэн сменазы дыръя ужаз «Литературной газеталэн», М. Горький нимо литературая институтлэн, кылбуретъя Влад Маленколэн школаоссы но милямез — «Программа поддержки национальных литератур народов Российской Федерации» школа.

Озьы пӧрмиз, монэ та форуме экспертэз сямен ӧтизы. Экспертлэн вань аслаз авторской группаез, со ортчытэ мастер-классъёс но ваньмыз понна лекциос лыдӟе. Та ӧнерчилэн должностез дано, шуыны луоз. Вераны кулэ, «Тавридаын» монэн ӵош экспертъёс луизы критик но писатель Павел Басинский, «Российской газетаысь» литературая обозреватель Михаил Визель, кылысь кылэ берыктӥсь но кылбурчи Виктор Куллэ. Секциенымы кивалтӥз туж яркыт адями — Дмитрий Ицкович, книга поттӥсь, ресторатор но тодмо «Полит.ру» порталлэн кузёез. Со ОГИ издательствоен кивалтэ, кудӥз Россиысь калыкъёслэн литератураоссыя антологиосты поттэ.

Школамылэн ужаз 60 адями пыриськиз. Ваньзы пӧртэм выжыысь. Мынамаз группаям Кавказысь вуэм егитъёс трос вал, со сяна, уйпал калыкъёс — ненецъёс, якутъёс. Ӧжыт ӧй вал фин-угоръёс, пӧлазы удмуртъёс но. Ми группаямы тунсыко ужен вырим: Михаил Гершензонэн малпам «дыртытэк лыдӟон» амалъя И. Бродскийлэсь, В. Хлебниковлэсь но асьсэлэсь егитъёслэсь кылбуръёссэс эскерыны дышетским. Тунсыко соиз: котькудӥз кылбурез ас калыкезлэн дунне валанэз пыр валэктӥз. Озьы шуыны луоз: Бродскийлэн кылбуръёсызлы чечен, якут, удмурт валэктонъёс вань.

А. Арзамазов но кылбурчиос.

Ог-огмес ум шӧдӥське

— Жаляса верано, удмуртъёслэн нимаз улыны дышемзы туж зол шӧдӥськиз. Кылсярысь, лезгинъёс, аварецъёс, калмыкъёс ог-огенызы соку ик тодматскизы но эшъяськизы. Нош удмуртъёс огазе луыны ӧз тырше. Михаил Визель, пельпумам чабкылыса, шуылӥз: «Ватско, ватско тынад удмуртъёсыд».

Та кылъёс бере но мон малпаськонэ уси: удмурт лулчеберет но удмурт литература озьы ик ог-огзылэсь висъяськемын. Туннэ мон учки «Кенеш» журналлэсь выль номерзэ. «Кенешлэн» аслаз литература шоры учконэз, аслаз авторъёсыз. Басьтом  «Ингожез», со кӧня ке авторъёслэсь гинэ творческой улонзэс возьматэ. Вань эшшо Интернетысь геройёс — соос «Кенешлэн» но, «Ингожлэн» но геройёссы пӧлы уг пыро, ас кожазы уло. Басьтом Лёша Пикулевез — солэн аслаз рэп-проектъёсыз. Богдан Анфиногеновен ӵошатоно ке, Пикулев сокем тодмо ќвќл, палэнын сылэ. Тӥни озьы туала лулчеберетэз кылдыто ваче луисьтэм «гожъёс». Одӥг ласянь, со умой: возьматэ литературалэсь трос ваё луэмзэ, нош мукет ласянь, адямиос ас понназы, ас сэрегъёсазы уло, печатлало текстъёссэс.

Мон малпамъя, асьмелэн гуманитарияя огинмы (сообщество) секыт югдурын — ум тунсыкъяськиське ог-огенымы. Егитъёсмы но, арлыдоосмы но, шоро-куспо арлыдъемъёс ваче вуо. Котькудзылэн асьсэлэн геройёссы, мукетъёсыныз уг тунсыкъясько. Туала студентъёс — «удмурт литература» специализацияя бакалавриатэз быдтэмъёс — уг тодо, кин со Лариса Орехова, Пётр Захаров. Мон малпасько, университетын удмурт литератураез дышетонын туала удмурт литературалы саклык уггес висъяло.

 Нимъёс ӝог вуно

— Удмурт гуманитарияя огин туж бырйыса но куд-ог дыръя гинэ тодэ вае лулчеберет удысысь дано нимъёсты. Кылсярысь, 2012-тӥ арын Афанасий Лужанинлэн вордскемез дырысен 100 ар тырмиз. Книгаоссэ но выльысь ӧз поттэ, конференциос но ортчытэмын ӧй вал. Со — эшшо одӥгез вунэтэм ним. Нош солэн басняосыз туж тунсыкоесь, юморескаосыз туннэ нуналлы тупало.     А. Лужанинлэн творчествоез мукет сямен усьтэ удмурт литератураез.

Кылем арын «Кылкуазь» проект улсын Дарали Лелиен, Богдан Анфиногеновен но мукет удмурт авторъёсын мон потай Яр но Глазов ёросъёсы литературая пумиськонъёсы. Валай, милемыз отын нокин уг тоды шуыса. Соос понна тодмо ним — Геннадий Ганьков, Алексей Ложкинэз тодо на. Калыкын вань азьветлӥсьёс, но жаляса верано, тросэз пассивной луо. Но творческой интеллигенцилы ужано, ассэ возьматоно, туж ик витьытэк, сое кин ке адӟоз но синйылтоз шуыса.

Писательлы котьку но азинскыны, лыдӟиськонзэ паськытатыны, коллегаосыныз умой кусып возьыны кулэ. Нош асьмелэн кусыпъёсмы секытэн кылдо. Соин секыт пыриськыны бадӟым проектъёсы. Европейской но ӟуч культура бадӟым мастерствоез, тодэ валанэз кулэ каро. «Удмуртъёслэн мылкыдзы туж бадӟым, но быгатонлык уг тырмы» — таӵе верамез кылэме вань. Зэмзэ но, удмуртъёслэн мылкыдзы пќзе, нош куке бадӟым шудон кутске, кыӵе ке тодон-валанзы я быгатонзы уггес тырмы.

Мон, удмурт кылэз ас поннам дышетэм мурт, туж дунъясько ӟеч удмурт кылын гожтэм текстъёсты, туала удмурт литератураын но кылбуретын мыным туж уг тырмо удмурт кылэз ӟеч тодыса-шӧдыса кылдытэм ужъёс. Кутскись авторъёслэн ужъёссы тырмемын грамматика, синтаксис ласянь янгышъёсын. Студентъёсылы мон ӵемысь Светлана Ручкиналэсь «Отчы кылиз, мар ми карим…» кырӟанзэ верасько. Та выллем мыдлань конструкциос туж трос. Уг тырмы чылкыт удмурт кыл. Нош туала удмурт авторъёс пӧлын чебер удмурт кылын гожъяськисьёс шер пумисько. Соос пӧлын берлоез выль яркыт ним — Аня Бурдина. Солэн нылкышно кылбуретэз мыным яраз. Огласянь, со азинтэ удмурт нылкышно лирикалэсь традициоссэ, нош мукет паласен, нылмуртлэн инкуазен сётэм быгатонлыкез но вань.

Лариса Дмитриева

 

Удмурт Дунне
By Удмурт Дунне Сентябрь 1, 2017 15:00