Удмуртия бырйиз выль Тӧро

Удмурт Дунне
By Удмурт Дунне Сентябрь 11, 2017 13:03

Толон Россиын ортчиз Огъя куара сётон нунал.

Кунысьтымы 85 улос пӧлысь 82-аз (Ингушетиын, Магадан улосын но Санкт-Петербургын сяна) пӧртэм интыосы быръёнъёс ортчизы. 66 улосын асьсэлы тӧро бырйизы, 16-аз — закон кылдытъясь ёз.

Удмуртия пыриськиз сояз но, таяз но быръёнэ – Кун Кенеше выль ӧтчамлы дыр вуиз, нош Элькун Тӧро асьмеос быръёно луим дырызлэсь вазь (азьвылэз – Александр Соловьев – Россилэн Президентэзлэсь осконзэ быдэстымтэез понна 4-тӥ апреле ужысьтыз мозмытэмын вал).

Быръёнэ калык мыло-кыдо пыриськиз шуыны уг луы – участокъёсы вамыштӥз куара сётыны быгатӥсьёс пӧлысь 30 процентэз гинэ. Чиньыен лыдъямон вал, шуыны луоз, егитъёс.
Но оглом быръёнъёс умой ортчизы, катъёсты тӥян учыръёс шараямтэ. Озьы Кун Кенеше сюрон вылысь 6 партия нюръяськиз. Нырысь чотамъёсъя, ваньмызлэсь трос куара люказ «Огъя Россия» — 63, 16 процент. КПРФ, котьку сямен – 2-тӥ интыын, со пала дурбасьтӥз 14, 86 апроцентэз бырйисьёс. ЛДПР-лы синмаськемзэ вераз 8,95 процентэз, «Зэмлыко Россиялы» — 6,57. «Родина» люказ 1,94 процент, нош «Россиысь коммунистъёс» – 1,44 процент.

Элькунды тӧрое нюръяськиз 5 мурт. ЦИК-лэн азьвыл лыдпусъёсызъя 78 процентлэсь куара люкаса, ваньзэс азьпалтӥз Александр Бречалов. Владимир Бод-ров понна куаразэ сётӥз 8.73процентэз. Со бере мыно Фарид Юнусов (4,82 процент) Тимур Ягафаров (3,17 процент) но Андрей Иванов (2,5 процент).

Зэмос лыдпусъёс тодмо луозы бергес, вань протоколъёс пыр-поч эскерыса потэм бере.

Удмурт Дунне
By Удмурт Дунне Сентябрь 11, 2017 13:03