Удмурт кыл но шумпотон синкыли

Удмурт Дунне
By Удмурт Дунне Сентябрь 1, 2017 15:24

Таиз ар отчы-татчы мынон-ветлонъёслы туж бай луиз. Пӧртэм кунъёсысь эшъёсы кылдӥзы. Валай: удмуртъёсын тунсыкъяськисьёс кунгож сьӧрын но трос вылӥллям.

Евгения Гусоргина мадьяр пияшъёсын (паллян палысез Золтан).

 Будапештын

Тулыспаллэн шораз милемыз, Удмурт кылосбуръя, финно-угроведениея но журналистикая институтысь 8 студентъёсты, лэзизы Венгрие научной конференцие. Талэсь азьвыл мон кунгож сьӧрын одӥг пол гинэ вал: 4-тӥ классын дышетскыкум, анай-атаеным ӵош Казахстанэ ӵыжы-выжыосмы доры ветлӥмы.

Арня куспын тодматскимы Будапешт карен, Венгрилэн историеныз, лулчеберетэныз но тодмо интыосыныз. Дышетскем сяна, институтмылэн директореныз Наталья Владимировна Кондратьеваен ӵош вуылӥмы Парламентэ, Дун-чылкыт Иштванлэн базиликаяз (черке), Мадьяр батыръёслэн карлудазы. Но тужгес тодэ кылизы Геллерт гурезь но Холокостлы сӥзем синпелет: Дунай шурлэн огпал ярдураз сыло чугунлэсь лэсьтэм 60 пар пиосмурт, нылкышно но нылпи пыдкутчанъёс. Кыӵе вӧсь вал та шоры учкыны но малпаны, мар вал со куанер адямиослэн йыръёсазы…

Озьы ик тодматскимы выль адямиосын, удмурт но ӟуч кылэз дышетӥсьёсын. Ми, фин группаысь студентъёс, пукимы фин кылъя урокын: эскеримы, кыӵе тодон-валанъёсмы милям, нош кыӵе — мадьяр студентъёслэн. Капчи, чаляк но туж пайдаё ортчиз арнямы…

 Туркуын

Но таин ваньмыз ӧз йылпумъяськы. Со дунне котыръянэлэн кутсконэз гинэ вал. Мадьяр шаере кошкон азям мон Финляндиын ортчись фин кылъя курсъёсы мынон понна вожвылъяськонэ пыриськи. Куартолэзь шорын электрон почтаям вуиз кема возьмам гожтэт… 8-тӥ пӧсьтолэзе бадӟым чемоданэным сылӥсько ини вал чугун сюрес вокзалын. Бурдъяськемын но шумпотэмын. 2 нунал ортчыса, чылкыт, шыпыт урамъёсыныз но вазиськись адямиосыныз монэ пумитаз Турку.  Толэзь куспын ми дышетскимы, карен но выль адямиосын тодматскимы, Kuralan Kylämäki музей-гуртэ, Тампере каре вуылӥмы, Turun linna замокез адӟимы но огшоры калгимы.

Мае мон адӟи? Турку — велосипедистъёслэн но спортэн вырисьёслэн карзы. Уй но нунал отын бызьылӥсьёсты пумитаны луэ, нош уже калык ветлэ великен, соин ик урамъёссы машинаосын тырмемын ӧвӧл. Отын мон асме гуртам кадь шӧдылӥ: котькытын писпуос, куакъёс, сюрес кузя ик чурен будо горд но тӧдьы сутэр куакъёс. Урам тыр легезьпу сяськаослэн ческыт зынзы лӧсъяське, котькуд ӵукна со мылкыдэз ӝутэ но изись йыръёсмес сайкатэ.

Табере мынам дуннемылэн котькыӵе интыосаз тодмоосы но эшъёсы вань: Эстониын, Польшаын, Чехиын, Италиын, Африкаын, Германиын, Япониын, Китайын, Венгриын…

Нош Венгриысь одӥг пияшен туж паймымон но сюлме пырись учыр луиз. Котькуд вордӥськонэ ми компьютерен ужаллямы. Луиз озьы: ми эстон нылашен Саскиаен ӵош пуксимы, милемлы пумит — Эстониысь мукет нылаш Кармен но Венгриысь пияш Золтан. Курсъёс кутскыку, йырам малпан вуылӥз: вань-а меда та 72 адями пӧлын одӥгез ке но удмурт кылэз валасез яке Удмуртиез тодӥсез? Кызьы вуиз, озьы ик кошкиз со малпан, малы ке шуоно йыр дышетсконэн, фин кылэн но мукет арбериосын пачыла вал. Уж бордын пукыкумы, Кармен мынэсьтым англи кылын юаз:

— Вераськиськод-а удмурт кылын?

— Вераськисько, — шуисько. — Мон удмурт.

Собере Золтан пала йырзэ берыктӥз но, мон кылӥсько: «Мон но вераськисько удмурт кылын». Удмурт кыл! Мынам киосы асьсэос ворсазы ымнырме, синкылиосы бамъёстӥм  быльыраны кутскизы, ваньмыз бусомиз. Но мон адӟи, кызьы Золтан интыысьтыз султӥз, со лыктӥз но ӟыгыртӥз монэ.

— Кыӵе проблема? — юа мадьяр эше.

— Удмурт кылэз кемалась кылэме вал ини, —  шуисько.

— Мынам но, — шуэ.

Сыӵе мӧзмиськем улэп, синмысь синме удмурт кылын вераськонлэсь.

Та учыр бере группаосысь адямиос мыным трос юанъёс сётъязы: кинъёс со удмуртъёс, кытын соос уло, шуг-а кылзы… Польшаысь, Германиысь но Кениысь нылъёс удмуртъёс сярысь тросгес тодон понна нимысьтыз ӝытсэс но висъязы. Ми кылзӥськимы Брангурт песянайёслэсь тодмо Party for everybody кырӟанзэс, учкимы Богдан Анфиногеновлэсь клипъёссэ, пукимы Шонер нылаш (Анастасия Иванова) кырӟасьлэн «Инстаграмысь» меӵак эфираз. Со вискын мон юанъёссылы валэктонъёс сётъяй. Вераськимы фин кылын, малы ке шуоно англи кылэз мон дышетэмын ӧвӧл. Озьы мон фин кылъя тодон-валанме будэтӥ но аслым азьланяз выль ужпум пуктӥ: англи кылэз дышетоно.

Евгения Гусоргина

 

 

Удмурт Дунне
By Удмурт Дунне Сентябрь 1, 2017 15:24